ശ്രീമദ്വാല്മീകീയ രാമായണേ ബാലകാംഡമ് ।
അഥ അഷ്ടാവിംശസ്സര്ഗഃ ।
പ്രതിഗൃഹ്യ തതോഽസ്ത്രാണി പ്രഹൃഷ്ടവദനശ്ശുചിഃ ।
ഗച്ഛന്നേവ ച കാകുത്സ്ഥോ വിശ്വാമിത്രമഥാബ്രവീത് ॥ 1 ॥
ഗൃഹീതാസ്ത്രോഽസ്മി ഭഗവന് ദുരാധര്ഷസ്സുരൈരപി ।
അസ്ത്രാണാം ത്വഹമിച്ഛാമി സംഹാരം മുനിപുംഗവ ॥ 2 ॥
ഏവം ബ്രുവതി കാകുത്സ്ഥേ വിശ്വാമിത്രോ മഹാമുനിഃ ।
സംഹാരം വ്യാജഹാരാഥ ധൃതിമാന് സുവ്രതശ്ശുചിഃ ॥ 3 ॥
സത്യവംതം സത്യകീര്തിം ധൃഷ്ടം രഭസമേവ ച ।
പ്രതിഹാരതരം നാമ പരാങ്മുഖമവാങ്മുഖമ് ॥ 4 ॥
ലക്ഷാക്ഷവിഷമൌ ചൈവ ദൃഢനാഭസുനാഭകൌ ।
ദശാക്ഷശതവക്ത്രൌ ച ദശശീര്ഷശതോദരൌ ॥ 5 ॥
പദ്മനാഭമഹാനാഭൌ ദുംദുനാഭസുനാഭകൌ ।
ജ്യോതിഷം കൃശനം ചൈവ നൈരാശ്യവിമലാവുഭൌ ॥ 6 ॥
യോഗംധരഹരിദ്രൌ ച ദൈത്യപ്രശമനൌതഥാ ।
സാര്ചിര്മാലീ ധൃതിര്മാലീ വൃത്തിമാന് രുചിരസ്തഥാ ॥ 7 ॥
പിതൃസൌമനസം ചൈവ വിധൂതമകരാവുഭൌ ।
കരവീരകരം ചൈവ ധനധാന്യൌ ച രാഘവ ॥ 8 ॥
കാമരൂപം കാമരുചിം മോഹമാവരണം തഥാ ।
ജൃംഭകം സർവനാഭം ച സംതാനവരണൌ തഥാ ॥ 9 ॥
ഭൃശാശ്വതനയാന് രാമ ഭാസ്വരാന്കാമരൂപിണഃ ।
പ്രതീച്ഛ മമ ഭദ്രം തേ പാത്രഭൂതോഽസി രാഘവ ॥ 10 ॥
ബാഢമിത്യേവ കാകുത്സ്ഥഃ പ്രഹൃഷ്ടേനാംതാരാത്മനാ ।
ദിവ്യഭാസ്വരദേഹാശ്ച മൂര്തിമംതസ്സുഖപ്രദാഃ ॥ 11 ॥
കേചിദംഗാരസദൃശാഃ കേചിദ്ധൂമോപമാസ്തഥാ ।
ചംദ്രാര്കസദൃശാഃ കേചിത്പ്രഹ്വാംജലിപുടാസ്തഥാ ॥ 12 ॥
രാമം പ്രാംജലയോ ഭൂത്വാഽബ്രുവന് മധുരഭാഷിണഃ ।
ഇമേ സ്മ നരശാര്ദൂല ശാധി കിം കരവാമ തേ ॥ 13 ॥
മാനസാഃ കാര്യകാലേഷു സാഹായ്യം മേ കരിഷ്യഥ ।
ഗമ്യതാമിതി താനാഹ യഥേഷ്ടം രഘുനംദനഃ ॥ 14 ॥
അഥ തേ രാമമാമംത്റ്യ കൃത്വാ ചാപി പ്രദക്ഷിണമ് ।
ഏവമസ്ത്വിതി കാകുത്സ്ഥമുക്ത്വാജഗ്മുര്യഥാഽഗതമ് ॥ 15 ॥
സ ച താന് രാഘവോ ജ്ഞാത്വാ വിശ്വാമിത്രം മഹാമുനിമ് ।
ഗച്ഛന്നേവാഥ മധുരം ശ്ലക്ഷ്ണം വചനമബ്രവീത് ॥ 16 ॥
കിന്ന്വേതന്മേഘസംകാശം പർവതസ്യാവിദൂരതഃ ।
വൃക്ഷഷംഡമിതോ ഭാതി പരം കൌതൂഹലം ഹി മേ ॥ 17 ॥
ദര്ശനീയം മൃഗാകീര്ണം മനോരമമതീവ ച ।
നാനാപ്രകാരൈശ്ശകുനൈർവല്ഗുനാദൈരലംകൃതമ് ॥ 18 ॥
നിസ്സൃതാഃ സ്മ മുനിശ്രേഷ്ഠ കാംതാരാദ്രോമഹര്ഷണാത് ।
അനയാ ത്വവഗച്ഛാമി ദേശസ്യ സുഖവത്തയാ ॥ 19 ॥
സർവം മേ ശംസ ഭഗവന് കസ്യാശ്രമപദം ത്വിദമ് ।
സംപ്രാപ്താ യത്ര തേ പാപാ ബ്രഹ്മഘ്നാ ദുഷ്ടചാരിണഃ ॥ 20 ॥
തവ യജ്ഞസ്യ വിഘ്നായ ദുരാത്മാനോ മഹാമുനേ ।
ഭഗവന് തസ്യ കോ ദേശസ്സാ യത്ര തവ യാജ്ഞികീ ॥ 21 ॥
രക്ഷിതവ്യാ ക്രിയാ ബ്രഹ്മന്മയാ വധ്യാശ്ച രാക്ഷസാഃ ।
ഏതത്സർവം മുനിശ്രേഷ്ഠ ശ്രോതുമിച്ഛാമ്യഹം പ്രഭോ ॥ 22 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ അഷ്ടാവിംശസ്സര്ഗഃ ॥
