ශ්රීමද්වාල්මීකීය රාමායණේ බාලකාංඩම් ।
අථ අෂ්ටාවිංශස්සර්ගඃ ।
ප්රතිගෘහ්ය තතෝऽස්ත්රාණි ප්රහෘෂ්ටවදනශ්ශුචිඃ ।
ගච්ඡන්නේව ච කාකුත්ස්ථෝ විශ්වාමිත්රමථාබ්රවීත් ॥ 1 ॥
ගෘහීතාස්ත්රෝऽස්මි භගවන් දුරාධර්ෂස්සුරෛරපි ।
අස්ත්රාණාං ත්වහමිච්ඡාමි සංහාරං මුනිපුංගව ॥ 2 ॥
ඒවං බ්රුවති කාකුත්ස්ථේ විශ්වාමිත්රෝ මහාමුනිඃ ।
සංහාරං ව්යාජහාරාථ ධෘතිමාන් සුව්රතශ්ශුචිඃ ॥ 3 ॥
සත්යවංතං සත්යකීර්තිං ධෘෂ්ටං රභසමේව ච ।
ප්රතිහාරතරං නාම පරාඞ්මුඛමවාඞ්මුඛම් ॥ 4 ॥
ලක්ෂාක්ෂවිෂමෞ චෛව දෘඪනාභසුනාභකෞ ।
දශාක්ෂශතවක්ත්රෞ ච දශශීර්ෂශතෝදරෞ ॥ 5 ॥
පද්මනාභමහානාභෞ දුංදුනාභසුනාභකෞ ।
ජ්යෝතිෂං කෘශනං චෛව නෛරාශ්යවිමලාවුභෞ ॥ 6 ॥
යෝගංධරහරිද්රෞ ච දෛත්යප්රශමනෞතථා ।
සාර්චිර්මාලී ධෘතිර්මාලී වෘත්තිමාන් රුචිරස්තථා ॥ 7 ॥
පිතෘසෞමනසං චෛව විධූතමකරාවුභෞ ।
කරවීරකරං චෛව ධනධාන්යෞ ච රාඝව ॥ 8 ॥
කාමරූපං කාමරුචිං මෝහමාවරණං තථා ।
ජෘංභකං සර්වනාභං ච සංතානවරණෞ තථා ॥ 9 ॥
භෘශාශ්වතනයාන් රාම භාස්වරාන්කාමරූපිණඃ ।
ප්රතීච්ඡ මම භද්රං තේ පාත්රභූතෝऽසි රාඝව ॥ 10 ॥
බාඪමිත්යේව කාකුත්ස්ථඃ ප්රහෘෂ්ටේනාංතාරාත්මනා ।
දිව්යභාස්වරදේහාශ්ච මූර්තිමංතස්සුඛප්රදාඃ ॥ 11 ॥
කේචිදංගාරසදෘශාඃ කේචිද්ධූමෝපමාස්තථා ।
චංද්රාර්කසදෘශාඃ කේචිත්ප්රහ්වාංජලිපුටාස්තථා ॥ 12 ॥
රාමං ප්රාංජලයෝ භූත්වාऽබ්රුවන් මධුරභාෂිණඃ ।
ඉමේ ස්ම නරශාර්දූල ශාධි කිං කරවාම තේ ॥ 13 ॥
මානසාඃ කාර්යකාලේෂු සාහාය්යං මේ කරිෂ්යථ ।
ගම්යතාමිති තානාහ යථේෂ්ටං රඝුනංදනඃ ॥ 14 ॥
අථ තේ රාමමාමංත්ऱ්ය කෘත්වා චාපි ප්රදක්ෂිණම් ।
ඒවමස්ත්විති කාකුත්ස්ථමුක්ත්වාජග්මුර්යථාऽගතම් ॥ 15 ॥
ස ච තාන් රාඝවෝ ජ්ඤාත්වා විශ්වාමිත්රං මහාමුනිම් ।
ගච්ඡන්නේවාථ මධුරං ශ්ලක්ෂ්ණං වචනමබ්රවීත් ॥ 16 ॥
කින්න්වේතන්මේඝසංකාශං පර්වතස්යාවිදූරතඃ ।
වෘක්ෂෂංඩමිතෝ භාති පරං කෞතූහලං හි මේ ॥ 17 ॥
දර්ශනීයං මෘගාකීර්ණං මනෝරමමතීව ච ।
නානාප්රකාරෛශ්ශකුනෛර්වල්ගුනාදෛරලංකෘතම් ॥ 18 ॥
නිස්සෘතාඃ ස්ම මුනිශ්රේෂ්ඨ කාංතාරාද්රෝමහර්ෂණාත් ।
අනයා ත්වවගච්ඡාමි දේශස්ය සුඛවත්තයා ॥ 19 ॥
සර්වං මේ ශංස භගවන් කස්යාශ්රමපදං ත්විදම් ।
සංප්රාප්තා යත්ර තේ පාපා බ්රහ්මඝ්නා දුෂ්ටචාරිණඃ ॥ 20 ॥
තව යජ්ඤස්ය විඝ්නාය දුරාත්මානෝ මහාමුනේ ।
භගවන් තස්ය කෝ දේශස්සා යත්ර තව යාජ්ඤිකී ॥ 21 ॥
රක්ෂිතව්යා ක්රියා බ්රහ්මන්මයා වධ්යාශ්ච රාක්ෂසාඃ ।
ඒතත්සර්වං මුනිශ්රේෂ්ඨ ශ්රෝතුමිච්ඡාම්යහං ප්රභෝ ॥ 22 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ අෂ්ටාවිංශස්සර්ගඃ ॥
