śrīmadvālmīkīya rāmāyaṇē ayōdhyākāṇḍam ।
atha saptadaśassargaḥ ।
sa rāmō rathamāsthāya samprahṛṣṭasuhṛjjanaḥ ।
patākādhvajasampannaṃ mahārhāgarudhūpitam ॥ 1 ॥
apaśyannagaraṃ śrīmānnānājanasamākulam ।
sa gṛhairabhrasaṅkāśaiḥ pāṇḍurairupaśōbhitam ॥ 2 ॥
rājamārgaṃ yayau rāmō madhyēnāgarudhūpitam ।
chandanānāṃ cha mukhyānāmagarūṇāṃ cha sañchayaiḥ ॥ 3 ॥
uttamānāṃ cha gandhānāṃ kṣaumakōśāmbarasya cha ।
aviddhābhiścha muktābhiruttamaissphāṭikairapi ॥ 4 ॥
śōbhamānamasambādhaistaṃ rājapathamuttamam ।
saṃvṛtaṃ vividhaiḥpuṣpairbhakṣyairuchchāvachairapi ॥ 5 ॥
dadarśa taṃ rājapathaṃ divi dēvapathaṃ yathā ।
dadhyakṣatahavirlājairdhūpairagaruchandanaiḥ ॥ 6 ॥
nānāmālyōpagandhaiścha sadā'bhyarchitachatvaram ।
aśīrvādānbahūn śṛṇvansuhṛdbhissamudīritān ॥ 7 ॥
yathārhaṃ chāpi sampūjya sarvānēva narānyayau ।
pitāmahairācharitaṃ tathaiva prapitāmahaiḥ ॥ 8 ॥
adyōpādāya taṃ mārgamabhiṣiktō'nupālaya ।
yathāsma pōṣitāḥ pitrā yathā sarvaiḥ pitāmahaiḥ ॥ 9 ॥
tatassukhataraṃ rāmē vatsyāmassati rājani ।
alamadya hi bhuktēna paramārthairalaṃ cha naḥ ॥ 10 ॥
yadi paśyāma niryāntaṃ rāmaṃ rājyē pratiṣṭhitam ।
atō hi naḥ priyataraṃ nānyatkiñchidbhaviṣyati ॥ 11 ॥
yathā'bhiṣēkō rāmasya rājyēnāmitatējasaḥ ।
ētāśchānyāścha suhṛdāmudāsīnaḥ kathāśśubhāḥ ॥ 12 ॥
ātmasampūjanīśśṛṇvanyayau rāmō mahāpatham ।
na hi tasmānmanaḥ kaśchichchakṣuṣī vā narōttamāt ॥ 13 ॥
nara śśaknōtyapākraṣṭumatikrāntē'pi rāghavē ।
yaścha rāmaṃ na paśyēttu yaṃ cha rāmō na paśyati ॥ 14 ॥
nindita ssarvallōkēṣu svātmā'pyēnaṃ vigarhatē ।
sarvēṣu hi sa dharmātmā varṇānāṃ kurutē dayām ॥ 15 ॥
chaturṇāṃ hi vayaḥ sthānāṃ tēna tē tamanuvratāḥ ।
chatuṣpathāndēvapathāṃśchaityānyāyatanāni cha ॥ 16 ॥
pradakṣiṇaṃ pariharan jagāma nṛpatē ssutaḥ ।
sa rājakulamāsādya mēghasaṅghōpamai śśubhaiḥ ॥ 17 ॥
prāsādaśṛṅgairvividhaiḥkailāsa śikharōpamaiḥ ।
āvārayadbhirgaganaṃ vimānairiva pāṇḍuraiḥ ॥ 18 ॥
vardhamānagṛhaiśchāpi ratnajālapariṣkṛtaiḥ ।
tatpṛthivyāṃ gṛhavaraṃ mahēndrasadanōpamam ॥ 19 ॥
rājaputraḥ piturvēśma pravivēśa śriyā jvalan ।
sa kakṣyā dhanvibhirguptāstisrō'tikramya vājibhiḥ ॥ 20 ॥
padātiraparē kakṣyē dvē jagāma narōttamaḥ ।
sa sarvā ssamatikramya kakṣyā daśarathātmajaḥ ।
sannivartya janaṃ sarvaṃ śuddhāntaḥ puramabhyagāt ॥ 21 ॥
tasmin praviṣṭē piturantikaṃ tadā jana ssa sarvō muditō nṛpātmajē ।
pratīkṣatē tasya punaḥ sma nirgamaṃ yathōdayaṃ chandramasassaritpatiḥ ॥ 22 ॥
ityārṣē śrīmadrāmāyaṇē vālmīkīya ādikāvyē ayōdhyākāṇḍē saptadaśassargaḥ ॥
