శ్రీమద్వాల్మీకీయ రామాయణే అయోధ్యాకాండమ్ ।
అథ సప్తదశస్సర్గః ।
స రామో రథమాస్థాయ సంప్రహృష్టసుహృజ్జనః ।
పతాకాధ్వజసంపన్నం మహార్హాగరుధూపితమ్ ॥ 1 ॥
అపశ్యన్నగరం శ్రీమాన్నానాజనసమాకులమ్ ।
స గృహైరభ్రసంకాశైః పాండురైరుపశోభితమ్ ॥ 2 ॥
రాజమార్గం యయౌ రామో మధ్యేనాగరుధూపితమ్ ।
చందనానాం చ ముఖ్యానామగరూణాం చ సంచయైః ॥ 3 ॥
ఉత్తమానాం చ గంధానాం క్షౌమకోశాంబరస్య చ ।
అవిద్ధాభిశ్చ ముక్తాభిరుత్తమైస్స్ఫాటికైరపి ॥ 4 ॥
శోభమానమసంబాధైస్తం రాజపథముత్తమమ్ ।
సంవృతం వివిధైఃపుష్పైర్భక్ష్యైరుచ్చావచైరపి ॥ 5 ॥
దదర్శ తం రాజపథం దివి దేవపథం యథా ।
దధ్యక్షతహవిర్లాజైర్ధూపైరగరుచందనైః ॥ 6 ॥
నానామాల్యోపగంధైశ్చ సదాఽభ్యర్చితచత్వరమ్ ।
అశీర్వాదాన్బహూన్ శృణ్వన్సుహృద్భిస్సముదీరితాన్ ॥ 7 ॥
యథార్హం చాపి సంపూజ్య సర్వానేవ నరాన్యయౌ ।
పితామహైరాచరితం తథైవ ప్రపితామహైః ॥ 8 ॥
అద్యోపాదాయ తం మార్గమభిషిక్తోఽనుపాలయ ।
యథాస్మ పోషితాః పిత్రా యథా సర్వైః పితామహైః ॥ 9 ॥
తతస్సుఖతరం రామే వత్స్యామస్సతి రాజని ।
అలమద్య హి భుక్తేన పరమార్థైరలం చ నః ॥ 10 ॥
యది పశ్యామ నిర్యాంతం రామం రాజ్యే ప్రతిష్ఠితమ్ ।
అతో హి నః ప్రియతరం నాన్యత్కించిద్భవిష్యతి ॥ 11 ॥
యథాఽభిషేకో రామస్య రాజ్యేనామితతేజసః ।
ఏతాశ్చాన్యాశ్చ సుహృదాముదాసీనః కథాశ్శుభాః ॥ 12 ॥
ఆత్మసంపూజనీశ్శృణ్వన్యయౌ రామో మహాపథమ్ ।
న హి తస్మాన్మనః కశ్చిచ్చక్షుషీ వా నరోత్తమాత్ ॥ 13 ॥
నర శ్శక్నోత్యపాక్రష్టుమతిక్రాంతేఽపి రాఘవే ।
యశ్చ రామం న పశ్యేత్తు యం చ రామో న పశ్యతి ॥ 14 ॥
నిందిత స్సర్వల్లోకేషు స్వాత్మాఽప్యేనం విగర్హతే ।
సర్వేషు హి స ధర్మాత్మా వర్ణానాం కురుతే దయామ్ ॥ 15 ॥
చతుర్ణాం హి వయః స్థానాం తేన తే తమనువ్రతాః ।
చతుష్పథాందేవపథాంశ్చైత్యాన్యాయతనాని చ ॥ 16 ॥
ప్రదక్షిణం పరిహరన్ జగామ నృపతే స్సుతః ।
స రాజకులమాసాద్య మేఘసంఘోపమై శ్శుభైః ॥ 17 ॥
ప్రాసాదశృంగైర్వివిధైఃకైలాస శిఖరోపమైః ।
ఆవారయద్భిర్గగనం విమానైరివ పాండురైః ॥ 18 ॥
వర్ధమానగృహైశ్చాపి రత్నజాలపరిష్కృతైః ।
తత్పృథివ్యాం గృహవరం మహేంద్రసదనోపమమ్ ॥ 19 ॥
రాజపుత్రః పితుర్వేశ్మ ప్రవివేశ శ్రియా జ్వలన్ ।
స కక్ష్యా ధన్విభిర్గుప్తాస్తిస్రోఽతిక్రమ్య వాజిభిః ॥ 20 ॥
పదాతిరపరే కక్ష్యే ద్వే జగామ నరోత్తమః ।
స సర్వా స్సమతిక్రమ్య కక్ష్యా దశరథాత్మజః ।
సన్నివర్త్య జనం సర్వం శుద్ధాంతః పురమభ్యగాత్ ॥ 21 ॥
తస్మిన్ ప్రవిష్టే పితురంతికం తదా జన స్స సర్వో ముదితో నృపాత్మజే ।
ప్రతీక్షతే తస్య పునః స్మ నిర్గమం యథోదయం చంద్రమసస్సరిత్పతిః ॥ 22 ॥
ఇత్యార్షే శ్రీమద్రామాయణే వాల్మీకీయ ఆదికావ్యే అయోధ్యాకాండే సప్తదశస్సర్గః ॥
