શ્રીમદ્વાલ્મીકીય રામાયણે અયોધ્યાકાંડમ્ ।
અથ સપ્તદશસ્સર્ગઃ ।
સ રામો રથમાસ્થાય સંપ્રહૃષ્ટસુહૃજ્જનઃ ।
પતાકાધ્વજસંપન્નં મહાર્હાગરુધૂપિતમ્ ॥ 1 ॥
અપશ્યન્નગરં શ્રીમાન્નાનાજનસમાકુલમ્ ।
સ ગૃહૈરભ્રસંકાશૈઃ પાંડુરૈરુપશોભિતમ્ ॥ 2 ॥
રાજમાર્ગં યયૌ રામો મધ્યેનાગરુધૂપિતમ્ ।
ચંદનાનાં ચ મુખ્યાનામગરૂણાં ચ સંચયૈઃ ॥ 3 ॥
ઉત્તમાનાં ચ ગંધાનાં ક્ષૌમકોશાંબરસ્ય ચ ।
અવિદ્ધાભિશ્ચ મુક્તાભિરુત્તમૈસ્સ્ફાટિકૈરપિ ॥ 4 ॥
શોભમાનમસંબાધૈસ્તં રાજપથમુત્તમમ્ ।
સંવૃતં વિવિધૈઃપુષ્પૈર્ભક્ષ્યૈરુચ્ચાવચૈરપિ ॥ 5 ॥
દદર્શ તં રાજપથં દિવિ દેવપથં યથા ।
દધ્યક્ષતહવિર્લાજૈર્ધૂપૈરગરુચંદનૈઃ ॥ 6 ॥
નાનામાલ્યોપગંધૈશ્ચ સદાઽભ્યર્ચિતચત્વરમ્ ।
અશીર્વાદાન્બહૂન્ શૃણ્વન્સુહૃદ્ભિસ્સમુદીરિતાન્ ॥ 7 ॥
યથાર્હં ચાપિ સંપૂજ્ય સર્વાનેવ નરાન્યયૌ ।
પિતામહૈરાચરિતં તથૈવ પ્રપિતામહૈઃ ॥ 8 ॥
અદ્યોપાદાય તં માર્ગમભિષિક્તોઽનુપાલય ।
યથાસ્મ પોષિતાઃ પિત્રા યથા સર્વૈઃ પિતામહૈઃ ॥ 9 ॥
તતસ્સુખતરં રામે વત્સ્યામસ્સતિ રાજનિ ।
અલમદ્ય હિ ભુક્તેન પરમાર્થૈરલં ચ નઃ ॥ 10 ॥
યદિ પશ્યામ નિર્યાંતં રામં રાજ્યે પ્રતિષ્ઠિતમ્ ।
અતો હિ નઃ પ્રિયતરં નાન્યત્કિંચિદ્ભવિષ્યતિ ॥ 11 ॥
યથાઽભિષેકો રામસ્ય રાજ્યેનામિતતેજસઃ ।
એતાશ્ચાન્યાશ્ચ સુહૃદામુદાસીનઃ કથાશ્શુભાઃ ॥ 12 ॥
આત્મસંપૂજનીશ્શૃણ્વન્યયૌ રામો મહાપથમ્ ।
ન હિ તસ્માન્મનઃ કશ્ચિચ્ચક્ષુષી વા નરોત્તમાત્ ॥ 13 ॥
નર શ્શક્નોત્યપાક્રષ્ટુમતિક્રાંતેઽપિ રાઘવે ।
યશ્ચ રામં ન પશ્યેત્તુ યં ચ રામો ન પશ્યતિ ॥ 14 ॥
નિંદિત સ્સર્વલ્લોકેષુ સ્વાત્માઽપ્યેનં વિગર્હતે ।
સર્વેષુ હિ સ ધર્માત્મા વર્ણાનાં કુરુતે દયામ્ ॥ 15 ॥
ચતુર્ણાં હિ વયઃ સ્થાનાં તેન તે તમનુવ્રતાઃ ।
ચતુષ્પથાંદેવપથાંશ્ચૈત્યાન્યાયતનાનિ ચ ॥ 16 ॥
પ્રદક્ષિણં પરિહરન્ જગામ નૃપતે સ્સુતઃ ।
સ રાજકુલમાસાદ્ય મેઘસંઘોપમૈ શ્શુભૈઃ ॥ 17 ॥
પ્રાસાદશૃંગૈર્વિવિધૈઃકૈલાસ શિખરોપમૈઃ ।
આવારયદ્ભિર્ગગનં વિમાનૈરિવ પાંડુરૈઃ ॥ 18 ॥
વર્ધમાનગૃહૈશ્ચાપિ રત્નજાલપરિષ્કૃતૈઃ ।
તત્પૃથિવ્યાં ગૃહવરં મહેંદ્રસદનોપમમ્ ॥ 19 ॥
રાજપુત્રઃ પિતુર્વેશ્મ પ્રવિવેશ શ્રિયા જ્વલન્ ।
સ કક્ષ્યા ધન્વિભિર્ગુપ્તાસ્તિસ્રોઽતિક્રમ્ય વાજિભિઃ ॥ 20 ॥
પદાતિરપરે કક્ષ્યે દ્વે જગામ નરોત્તમઃ ।
સ સર્વા સ્સમતિક્રમ્ય કક્ષ્યા દશરથાત્મજઃ ।
સન્નિવર્ત્ય જનં સર્વં શુદ્ધાંતઃ પુરમભ્યગાત્ ॥ 21 ॥
તસ્મિન્ પ્રવિષ્ટે પિતુરંતિકં તદા જન સ્સ સર્વો મુદિતો નૃપાત્મજે ।
પ્રતીક્ષતે તસ્ય પુનઃ સ્મ નિર્ગમં યથોદયં ચંદ્રમસસ્સરિત્પતિઃ ॥ 22 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે અયોધ્યાકાંડે સપ્તદશસ્સર્ગઃ ॥
