ශ්රීමද්වාල්මීකීය රාමායණේ අයෝධ්යාකාංඩම් ।
අථ සප්තදශස්සර්ගඃ ।
ස රාමෝ රථමාස්ථාය සංප්රහෘෂ්ටසුහෘජ්ජනඃ ।
පතාකාධ්වජසංපන්නං මහාර්හාගරුධූපිතම් ॥ 1 ॥
අපශ්යන්නගරං ශ්රීමාන්නානාජනසමාකුලම් ।
ස ගෘහෛරභ්රසංකාශෛඃ පාංඩුරෛරුපශෝභිතම් ॥ 2 ॥
රාජමාර්ගං යයෞ රාමෝ මධ්යේනාගරුධූපිතම් ।
චංදනානාං ච මුඛ්යානාමගරූණාං ච සංචයෛඃ ॥ 3 ॥
උත්තමානාං ච ගංධානාං ක්ෂෞමකෝශාංබරස්ය ච ।
අවිද්ධාභිශ්ච මුක්තාභිරුත්තමෛස්ස්ඵාටිකෛරපි ॥ 4 ॥
ශෝභමානමසංබාධෛස්තං රාජපථමුත්තමම් ।
සංවෘතං විවිධෛඃපුෂ්පෛර්භක්ෂ්යෛරුච්චාවචෛරපි ॥ 5 ॥
දදර්ශ තං රාජපථං දිවි දේවපථං යථා ।
දධ්යක්ෂතහවිර්ලාජෛර්ධූපෛරගරුචංදනෛඃ ॥ 6 ॥
නානාමාල්යෝපගංධෛශ්ච සදාऽභ්යර්චිතචත්වරම් ।
අශීර්වාදාන්බහූන් ශෘණ්වන්සුහෘද්භිස්සමුදීරිතාන් ॥ 7 ॥
යථාර්හං චාපි සංපූජ්ය සර්වානේව නරාන්යයෞ ।
පිතාමහෛරාචරිතං තථෛව ප්රපිතාමහෛඃ ॥ 8 ॥
අද්යෝපාදාය තං මාර්ගමභිෂික්තෝऽනුපාලය ।
යථාස්ම පෝෂිතාඃ පිත්රා යථා සර්වෛඃ පිතාමහෛඃ ॥ 9 ॥
තතස්සුඛතරං රාමේ වත්ස්යාමස්සති රාජනි ।
අලමද්ය හි භුක්තේන පරමාර්ථෛරලං ච නඃ ॥ 10 ॥
යදි පශ්යාම නිර්යාංතං රාමං රාජ්යේ ප්රතිෂ්ඨිතම් ।
අතෝ හි නඃ ප්රියතරං නාන්යත්කිංචිද්භවිෂ්යති ॥ 11 ॥
යථාऽභිෂේකෝ රාමස්ය රාජ්යේනාමිතතේජසඃ ।
ඒතාශ්චාන්යාශ්ච සුහෘදාමුදාසීනඃ කථාශ්ශුභාඃ ॥ 12 ॥
ආත්මසංපූජනීශ්ශෘණ්වන්යයෞ රාමෝ මහාපථම් ।
න හි තස්මාන්මනඃ කශ්චිච්චක්ෂුෂී වා නරෝත්තමාත් ॥ 13 ॥
නර ශ්ශක්නෝත්යපාක්රෂ්ටුමතික්රාංතේऽපි රාඝවේ ।
යශ්ච රාමං න පශ්යේත්තු යං ච රාමෝ න පශ්යති ॥ 14 ॥
නිංදිත ස්සර්වල්ලෝකේෂු ස්වාත්මාऽප්යේනං විගර්හතේ ।
සර්වේෂු හි ස ධර්මාත්මා වර්ණානාං කුරුතේ දයාම් ॥ 15 ॥
චතුර්ණාං හි වයඃ ස්ථානාං තේන තේ තමනුව්රතාඃ ।
චතුෂ්පථාංදේවපථාංශ්චෛත්යාන්යායතනානි ච ॥ 16 ॥
ප්රදක්ෂිණං පරිහරන් ජගාම නෘපතේ ස්සුතඃ ।
ස රාජකුලමාසාද්ය මේඝසංඝෝපමෛ ශ්ශුභෛඃ ॥ 17 ॥
ප්රාසාදශෘංගෛර්විවිධෛඃකෛලාස ශිඛරෝපමෛඃ ।
ආවාරයද්භිර්ගගනං විමානෛරිව පාංඩුරෛඃ ॥ 18 ॥
වර්ධමානගෘහෛශ්චාපි රත්නජාලපරිෂ්කෘතෛඃ ।
තත්පෘථිව්යාං ගෘහවරං මහේංද්රසදනෝපමම් ॥ 19 ॥
රාජපුත්රඃ පිතුර්වේශ්ම ප්රවිවේශ ශ්රියා ජ්වලන් ।
ස කක්ෂ්යා ධන්විභිර්ගුප්තාස්තිස්රෝऽතික්රම්ය වාජිභිඃ ॥ 20 ॥
පදාතිරපරේ කක්ෂ්යේ ද්වේ ජගාම නරෝත්තමඃ ।
ස සර්වා ස්සමතික්රම්ය කක්ෂ්යා දශරථාත්මජඃ ।
සන්නිවර්ත්ය ජනං සර්වං ශුද්ධාංතඃ පුරමභ්යගාත් ॥ 21 ॥
තස්මින් ප්රවිෂ්ටේ පිතුරංතිකං තදා ජන ස්ස සර්වෝ මුදිතෝ නෘපාත්මජේ ।
ප්රතීක්ෂතේ තස්ය පුනඃ ස්ම නිර්ගමං යථෝදයං චංද්රමසස්සරිත්පතිඃ ॥ 22 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ සප්තදශස්සර්ගඃ ॥
