ଶ୍ରୀମଦ୍ଵାଲ୍ମୀକୀୟ ରାମାୟଣେ ଅୟୋଧ୍ୟାକାଂଡମ୍ ।
ଅଥ ସପ୍ତଦଶସ୍ସର୍ଗଃ ।
ସ ରାମୋ ରଥମାସ୍ଥାୟ ସଂପ୍ରହୃଷ୍ଟସୁହୃଜ୍ଜନଃ ।
ପତାକାଧ୍ଵଜସଂପନ୍ନଂ ମହାର୍ହାଗରୁଧୂପିତମ୍ ॥ 1 ॥
ଅପଶ୍ୟନ୍ନଗରଂ ଶ୍ରୀମାନ୍ନାନାଜନସମାକୁଲମ୍ ।
ସ ଗୃହୈରଭ୍ରସଂକାଶୈଃ ପାଂଡୁରୈରୁପଶୋଭିତମ୍ ॥ 2 ॥
ରାଜମାର୍ଗଂ ୟୟୌ ରାମୋ ମଧ୍ୟେନାଗରୁଧୂପିତମ୍ ।
ଚଂଦନାନାଂ ଚ ମୁଖ୍ୟାନାମଗରୂଣାଂ ଚ ସଂଚୟୈଃ ॥ 3 ॥
ଉତ୍ତମାନାଂ ଚ ଗଂଧାନାଂ କ୍ଷୌମକୋଶାଂବରସ୍ୟ ଚ ।
ଅଵିଦ୍ଧାଭିଶ୍ଚ ମୁକ୍ତାଭିରୁତ୍ତମୈସ୍ସ୍ଫାଟିକୈରପି ॥ 4 ॥
ଶୋଭମାନମସଂବାଧୈସ୍ତଂ ରାଜପଥମୁତ୍ତମମ୍ ।
ସଂଵୃତଂ ଵିଵିଧୈଃପୁଷ୍ପୈର୍ଭକ୍ଷ୍ୟୈରୁଚ୍ଚାଵଚୈରପି ॥ 5 ॥
ଦଦର୍ଶ ତଂ ରାଜପଥଂ ଦିଵି ଦେଵପଥଂ ୟଥା ।
ଦଧ୍ୟକ୍ଷତହଵିର୍ଲାଜୈର୍ଧୂପୈରଗରୁଚଂଦନୈଃ ॥ 6 ॥
ନାନାମାଲ୍ୟୋପଗଂଧୈଶ୍ଚ ସଦାଽଭ୍ୟର୍ଚିତଚତ୍ଵରମ୍ ।
ଅଶୀର୍ଵାଦାନ୍ବହୂନ୍ ଶୃଣ୍ଵନ୍ସୁହୃଦ୍ଭିସ୍ସମୁଦୀରିତାନ୍ ॥ 7 ॥
ୟଥାର୍ହଂ ଚାପି ସଂପୂଜ୍ୟ ସର୍ଵାନେଵ ନରାନ୍ୟୟୌ ।
ପିତାମହୈରାଚରିତଂ ତଥୈଵ ପ୍ରପିତାମହୈଃ ॥ 8 ॥
ଅଦ୍ୟୋପାଦାୟ ତଂ ମାର୍ଗମଭିଷିକ୍ତୋଽନୁପାଲୟ ।
ୟଥାସ୍ମ ପୋଷିତାଃ ପିତ୍ରା ୟଥା ସର୍ଵୈଃ ପିତାମହୈଃ ॥ 9 ॥
ତତସ୍ସୁଖତରଂ ରାମେ ଵତ୍ସ୍ୟାମସ୍ସତି ରାଜନି ।
ଅଲମଦ୍ୟ ହି ଭୁକ୍ତେନ ପରମାର୍ଥୈରଲଂ ଚ ନଃ ॥ 10 ॥
ୟଦି ପଶ୍ୟାମ ନିର୍ୟାଂତଂ ରାମଂ ରାଜ୍ୟେ ପ୍ରତିଷ୍ଠିତମ୍ ।
ଅତୋ ହି ନଃ ପ୍ରିୟତରଂ ନାନ୍ୟତ୍କିଂଚିଦ୍ଭଵିଷ୍ୟତି ॥ 11 ॥
ୟଥାଽଭିଷେକୋ ରାମସ୍ୟ ରାଜ୍ୟେନାମିତତେଜସଃ ।
ଏତାଶ୍ଚାନ୍ୟାଶ୍ଚ ସୁହୃଦାମୁଦାସୀନଃ କଥାଶ୍ଶୁଭାଃ ॥ 12 ॥
ଆତ୍ମସଂପୂଜନୀଶ୍ଶୃଣ୍ଵନ୍ୟୟୌ ରାମୋ ମହାପଥମ୍ ।
ନ ହି ତସ୍ମାନ୍ମନଃ କଶ୍ଚିଚ୍ଚକ୍ଷୁଷୀ ଵା ନରୋତ୍ତମାତ୍ ॥ 13 ॥
ନର ଶ୍ଶକ୍ନୋତ୍ୟପାକ୍ରଷ୍ଟୁମତିକ୍ରାଂତେଽପି ରାଘଵେ ।
ୟଶ୍ଚ ରାମଂ ନ ପଶ୍ୟେତ୍ତୁ ୟଂ ଚ ରାମୋ ନ ପଶ୍ୟତି ॥ 14 ॥
ନିଂଦିତ ସ୍ସର୍ଵଲ୍ଲୋକେଷୁ ସ୍ଵାତ୍ମାଽପ୍ୟେନଂ ଵିଗର୍ହତେ ।
ସର୍ଵେଷୁ ହି ସ ଧର୍ମାତ୍ମା ଵର୍ଣାନାଂ କୁରୁତେ ଦୟାମ୍ ॥ 15 ॥
ଚତୁର୍ଣାଂ ହି ଵୟଃ ସ୍ଥାନାଂ ତେନ ତେ ତମନୁଵ୍ରତାଃ ।
ଚତୁଷ୍ପଥାଂଦେଵପଥାଂଶ୍ଚୈତ୍ୟାନ୍ୟାୟତନାନି ଚ ॥ 16 ॥
ପ୍ରଦକ୍ଷିଣଂ ପରିହରନ୍ ଜଗାମ ନୃପତେ ସ୍ସୁତଃ ।
ସ ରାଜକୁଲମାସାଦ୍ୟ ମେଘସଂଘୋପମୈ ଶ୍ଶୁଭୈଃ ॥ 17 ॥
ପ୍ରାସାଦଶୃଂଗୈର୍ଵିଵିଧୈଃକୈଲାସ ଶିଖରୋପମୈଃ ।
ଆଵାରୟଦ୍ଭିର୍ଗଗନଂ ଵିମାନୈରିଵ ପାଂଡୁରୈଃ ॥ 18 ॥
ଵର୍ଧମାନଗୃହୈଶ୍ଚାପି ରତ୍ନଜାଲପରିଷ୍କୃତୈଃ ।
ତତ୍ପୃଥିଵ୍ୟାଂ ଗୃହଵରଂ ମହେଂଦ୍ରସଦନୋପମମ୍ ॥ 19 ॥
ରାଜପୁତ୍ରଃ ପିତୁର୍ଵେଶ୍ମ ପ୍ରଵିଵେଶ ଶ୍ରିୟା ଜ୍ଵଲନ୍ ।
ସ କକ୍ଷ୍ୟା ଧନ୍ଵିଭିର୍ଗୁପ୍ତାସ୍ତିସ୍ରୋଽତିକ୍ରମ୍ୟ ଵାଜିଭିଃ ॥ 20 ॥
ପଦାତିରପରେ କକ୍ଷ୍ୟେ ଦ୍ଵେ ଜଗାମ ନରୋତ୍ତମଃ ।
ସ ସର୍ଵା ସ୍ସମତିକ୍ରମ୍ୟ କକ୍ଷ୍ୟା ଦଶରଥାତ୍ମଜଃ ।
ସନ୍ନିଵର୍ତ୍ୟ ଜନଂ ସର୍ଵଂ ଶୁଦ୍ଧାଂତଃ ପୁରମଭ୍ୟଗାତ୍ ॥ 21 ॥
ତସ୍ମିନ୍ ପ୍ରଵିଷ୍ଟେ ପିତୁରଂତିକଂ ତଦା ଜନ ସ୍ସ ସର୍ଵୋ ମୁଦିତୋ ନୃପାତ୍ମଜେ ।
ପ୍ରତୀକ୍ଷତେ ତସ୍ୟ ପୁନଃ ସ୍ମ ନିର୍ଗମଂ ୟଥୋଦୟଂ ଚଂଦ୍ରମସସ୍ସରିତ୍ପତିଃ ॥ 22 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅୟୋଧ୍ୟାକାଂଡେ ସପ୍ତଦଶସ୍ସର୍ଗଃ ॥
