ശ്രീമദ്വാല്മീകീയ രാമായണേ അയോധ്യാകാംഡമ് ।
അഥ സപ്തദശസ്സര്ഗഃ ।
സ രാമോ രഥമാസ്ഥായ സംപ്രഹൃഷ്ടസുഹൃജ്ജനഃ ।
പതാകാധ്വജസംപന്നം മഹാര്ഹാഗരുധൂപിതമ് ॥ 1 ॥
അപശ്യന്നഗരം ശ്രീമാന്നാനാജനസമാകുലമ് ।
സ ഗൃഹൈരഭ്രസംകാശൈഃ പാംഡുരൈരുപശോഭിതമ് ॥ 2 ॥
രാജമാര്ഗം യയൌ രാമോ മധ്യേനാഗരുധൂപിതമ് ।
ചംദനാനാം ച മുഖ്യാനാമഗരൂണാം ച സംചയൈഃ ॥ 3 ॥
ഉത്തമാനാം ച ഗംധാനാം ക്ഷൌമകോശാംബരസ്യ ച ।
അവിദ്ധാഭിശ്ച മുക്താഭിരുത്തമൈസ്സ്ഫാടികൈരപി ॥ 4 ॥
ശോഭമാനമസംബാധൈസ്തം രാജപഥമുത്തമമ് ।
സംവൃതം വിവിധൈഃപുഷ്പൈര്ഭക്ഷ്യൈരുച്ചാവചൈരപി ॥ 5 ॥
ദദര്ശ തം രാജപഥം ദിവി ദേവപഥം യഥാ ।
ദധ്യക്ഷതഹവിര്ലാജൈര്ധൂപൈരഗരുചംദനൈഃ ॥ 6 ॥
നാനാമാല്യോപഗംധൈശ്ച സദാഽഭ്യര്ചിതചത്വരമ് ।
അശീർവാദാന്ബഹൂന് ശൃണ്വന്സുഹൃദ്ഭിസ്സമുദീരിതാന് ॥ 7 ॥
യഥാര്ഹം ചാപി സംപൂജ്യ സർവാനേവ നരാന്യയൌ ।
പിതാമഹൈരാചരിതം തഥൈവ പ്രപിതാമഹൈഃ ॥ 8 ॥
അദ്യോപാദായ തം മാര്ഗമഭിഷിക്തോഽനുപാലയ ।
യഥാസ്മ പോഷിതാഃ പിത്രാ യഥാ സർവൈഃ പിതാമഹൈഃ ॥ 9 ॥
തതസ്സുഖതരം രാമേ വത്സ്യാമസ്സതി രാജനി ।
അലമദ്യ ഹി ഭുക്തേന പരമാര്ഥൈരലം ച നഃ ॥ 10 ॥
യദി പശ്യാമ നിര്യാംതം രാമം രാജ്യേ പ്രതിഷ്ഠിതമ് ।
അതോ ഹി നഃ പ്രിയതരം നാന്യത്കിംചിദ്ഭവിഷ്യതി ॥ 11 ॥
യഥാഽഭിഷേകോ രാമസ്യ രാജ്യേനാമിതതേജസഃ ।
ഏതാശ്ചാന്യാശ്ച സുഹൃദാമുദാസീനഃ കഥാശ്ശുഭാഃ ॥ 12 ॥
ആത്മസംപൂജനീശ്ശൃണ്വന്യയൌ രാമോ മഹാപഥമ് ।
ന ഹി തസ്മാന്മനഃ കശ്ചിച്ചക്ഷുഷീ വാ നരോത്തമാത് ॥ 13 ॥
നര ശ്ശക്നോത്യപാക്രഷ്ടുമതിക്രാംതേഽപി രാഘവേ ।
യശ്ച രാമം ന പശ്യേത്തു യം ച രാമോ ന പശ്യതി ॥ 14 ॥
നിംദിത സ്സർവല്ലോകേഷു സ്വാത്മാഽപ്യേനം വിഗര്ഹതേ ।
സർവേഷു ഹി സ ധര്മാത്മാ വര്ണാനാം കുരുതേ ദയാമ് ॥ 15 ॥
ചതുര്ണാം ഹി വയഃ സ്ഥാനാം തേന തേ തമനുവ്രതാഃ ।
ചതുഷ്പഥാംദേവപഥാംശ്ചൈത്യാന്യായതനാനി ച ॥ 16 ॥
പ്രദക്ഷിണം പരിഹരന് ജഗാമ നൃപതേ സ്സുതഃ ।
സ രാജകുലമാസാദ്യ മേഘസംഘോപമൈ ശ്ശുഭൈഃ ॥ 17 ॥
പ്രാസാദശൃംഗൈർവിവിധൈഃകൈലാസ ശിഖരോപമൈഃ ।
ആവാരയദ്ഭിര്ഗഗനം വിമാനൈരിവ പാംഡുരൈഃ ॥ 18 ॥
വര്ധമാനഗൃഹൈശ്ചാപി രത്നജാലപരിഷ്കൃതൈഃ ।
തത്പൃഥിവ്യാം ഗൃഹവരം മഹേംദ്രസദനോപമമ് ॥ 19 ॥
രാജപുത്രഃ പിതുർവേശ്മ പ്രവിവേശ ശ്രിയാ ജ്വലന് ।
സ കക്ഷ്യാ ധന്വിഭിര്ഗുപ്താസ്തിസ്രോഽതിക്രമ്യ വാജിഭിഃ ॥ 20 ॥
പദാതിരപരേ കക്ഷ്യേ ദ്വേ ജഗാമ നരോത്തമഃ ।
സ സർവാ സ്സമതിക്രമ്യ കക്ഷ്യാ ദശരഥാത്മജഃ ।
സന്നിവര്ത്യ ജനം സർവം ശുദ്ധാംതഃ പുരമഭ്യഗാത് ॥ 21 ॥
തസ്മിന് പ്രവിഷ്ടേ പിതുരംതികം തദാ ജന സ്സ സർവോ മുദിതോ നൃപാത്മജേ ।
പ്രതീക്ഷതേ തസ്യ പുനഃ സ്മ നിര്ഗമം യഥോദയം ചംദ്രമസസ്സരിത്പതിഃ ॥ 22 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ അയോധ്യാകാംഡേ സപ്തദശസ്സര്ഗഃ ॥
