ශ්රීමද්වාල්මීකීය රාමායණේ අයෝධ්යාකාංඩම් ।
අථ අෂ්ටාශීතිතමස්සර්ගඃ ।
තච්ඡ්රුත්වා නිපුණං සර්වං භරත ස්සහ මංත්රිභිඃ ।
ඉංගුදීමූලමාගම්ය රාමශය්යාමවේක්ෂ්ය තාම් ॥ 1 ॥
අබ්රවීජ්ජනනී ස්සර්වා ඉහ තේන මහාත්මනා ।
ශර්වරී ශයිතා භූමාවිදමස්ය විමර්දිතම් ॥ 2 ॥
තච්ඡ්රුත්වා නිපුණං සර්වං භරත ස්සහ මංත්රිභිඃ ।
ඉංගුදීමූලමාගම්ය රාමශය්යාමවේක්ෂ්ය තාම් ॥ 3 ॥
අබ්රවීජ්ජනනී ස්සර්වා ඉහ තේන මහාත්මනා ।
ශර්වරී ශයිතා භූමාවිදමස්ය විමර්දිතම් ॥ 4 ॥
මහාභාගකුලීනේන මහාභාගේන ධීමතා ।
ජාතෝ දශරථේනෝර්ව්යාං න රාමස්ස්වප්තු මර්හති ॥ 5 ॥
අජිනෝත්තරසංස්තීර්ණේ වරාස්තරණසංචයේ ।
ශයිත්වා පුරුෂව්යාඝ්රඃ කථං ශේතේ මහීතලේ ॥ 6 ॥
ප්රාසාදාග්රවිමානේෂු වලභීෂු ච සර්වදා ।
හෛමරාජතභෞමේෂු වරාස්තරණශාලිෂු ॥ 7 ॥
පුෂ්පසංචයචිත්රේෂු චංදනාගරුගංධිෂු ।
පාංඩුරාභ්රප්රකාශේෂු ශුකසංඝරූතේෂුච ॥ 8 ॥
ප්රාසාදවරවර්යේෂු ශීතවත්සු සුගංධිෂු ।
උෂිත්වාමේරුකල්පේෂු කෘතකාංචන භිත්තිෂු ॥ 9 ॥
ගීතවාදිත්රනිර්ඝෝෂෛර්වරාභරණනිස්ස්වනෛඃ ।
මෘදංගවරශබ්දෛශ්ච සතතං ප්රතිබෝධිතඃ ॥ 10 ॥
වංදිභිර්වංදිතඃ කාලේ බහුභි ස්සූතමාගධෛඃ ।
ගාථාභිරනුරූපාභි ස්ස්තුතිභිශ්ච පරංතපඃ ॥ 11 ॥
අශ්රද්ධේයමිදං ලෝකේ න සත්යං ප්රතිභාති මා ।
මුහ්යතේ ඛලු මේ භාව ස්ස්වප්නෝऽයමිති මේ මතිඃ ॥ 12 ॥
න නූනං දෛවතං කිංචිත්කාලේන බලවත්තරම් ।
යත්ර දාශරථී රාමෝ භූමාවේව ශයීත සඃ ॥ 13 ॥
විදේහරාජස්ය සුතා සීතා ච ප්රියදර්ශනා ।
දයිතා ශයිතා භූමෞ ස්නුෂා දශරථස්ය ච ॥ 14 ॥
ඉයං ශය්යා මම භ්රාතුරිදං හි පරිවර්තිතම් ।
ස්ථංඩිලේ කඨිනේ සර්වං ගාත්රෛ ර්විමෘදිතං තෘණම් ॥ 15 ॥
මන්යේ සාභරණා සුප්තා සීතාऽස්මිංඡයනෝත්තමේ ।
තත්ර තත්ර හි දෘශ්යංතේ සක්තාඃ කනකබිංදවඃ ॥ 16 ॥
උත්තරීයමිහාऽසක්තං සුව්යක්තං සීතයා තදා ।
තථා හ්යේතේ ප්රකාශංතේ සක්තාඃ කෞශේයතංතවඃ ॥ 17 ॥
මන්යේ භර්තු ස්සුඛා ශය්යා යේන බාලා තපස්විනී ।
සුකුමාරී සතී දුඃඛං න හි විජානාති මෛථිලී ॥ 18 ॥
හා හංතාऽස්මි නෘශංසෝऽහං යත්සභාර්යඃ කෘතේ මම ।
ඊදෘශීං රාඝවශ්ශය්යාමධිශේතේ හ්යනාථවත් ॥ 19 ॥
සාර්වභෞමකුලේ ජාත ස්සර්වලෝකස්ය සම්මතඃ ।
සර්වලෝකප්රියස්ත්යක්ත්වා රාජ්යං සුඛමනුත්තම් ॥ 20 ॥
කථමිංදීවරශ්යාමෝ රක්තාක්ෂඃ ප්රියදර්ශනඃ ।
සුඛභාගී න දුඃඛාර්හ ශ්ශයිතෝ භුවි රාඝවඃ ॥ 21 ॥
ධන්යඃ ඛලු මහාභාගෝ ලක්ෂ්මණ ශ්ශුභලක්ෂණඃ ।
භ්රාතරං විෂමේ කාලේ යෝ රාමමනුවර්තතේ ॥ 22 ॥
සිද්ධාර්ථා ඛලු වෛදේහී පතිං යාऽනුගතා වනම් ।
වයං සංශයිතා ස්සර්වේ හීනාස්තේන මහාත්මනා ॥ 23 ॥
ආකර්ණධාරා පෘථිවී නෞඃ ඉව ප්රතිභාති මා ।
ගතේ දශරථේ ස්වර්ගං රාමේ චාරණ්යමාශ්රිතේ ॥ 24 ॥
න ච ප්රාර්ථයතේ කච්චින්මනසාපි වසුංධරාම් ।
වනේऽපි වසතස්තස්ය බාහුවීර්යාභිරක්ෂිතාම් ॥ 25 ॥
ශූන්යසංවරණාරක්ෂාමයංත්රිතහයද්විපාම් ।
අපාවෘතපුරද්වාරාං රාජධානීමරක්ෂිතාම් ॥ 26 ॥
අප්රහෘෂ්ටබලාං ශූන්යාං විෂමස්ථාමනාවෘතාම් ।
ශත්රවෝ නාභිමන්යංතේ භක්ෂාන්විෂකෘතානිව ॥ 27 ॥
අද්යප්රභෘති භූමෞ තු ශයිෂ්යේऽහං තෘණේෂු වා ।
ඵලමූලාශනෝ නිත්යං ජටාචීරාණි ධාරයන් ॥ 28 ॥
තස්යාර්ථමුත්තරං කාලං නිවත්ස්යාමි සුඛං වනේ ।
තං ප්රතිශ්රවමාමුච්ය නාස්ය මිථ්යා භවිෂ්යති ॥ 29 ॥
වසංතං භ්රාතුරර්ථාය ශත්රුඝ්නෝ මාऽනුවත්ස්යති ।
ලක්ෂ්මණේන සහත්වාර්යෝ හ්යයෝධ්යාං පාලයිෂ්යති ॥ 30 ॥
අභිෂේක්ෂ්යංති කාකුත්ස්ථමයෝධ්යායාං ද්විජාතයඃ ।
අපි මේ දේවතාඃ කුර්යුරිමං සත්යං මනෝරථම් ॥ 31 ॥
ප්රසාද්යමාන ශ්ශිරසා මයා ස්වයං බහුප්රකාරං යදි නාභිපත්ස්යතේ ।
තතෝऽනුවත්ස්යාමි චිරාය රාඝවං වනේචරන්නාර්හති මාමුපේක්ෂිතුම් ॥ 32 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ අයෝධ්යාකාංඩේ අෂ්ටාශීතිතමස්සර්ගඃ ॥
