ଶ୍ରୀମଦ୍ଵାଲ୍ମୀକୀୟ ରାମାୟଣେ ଅୟୋଧ୍ୟାକାଂଡମ୍ ।
ଅଥ ଅଷ୍ଟାଶୀତିତମସ୍ସର୍ଗଃ ।
ତଚ୍ଛ୍ରୁତ୍ଵା ନିପୁଣଂ ସର୍ଵଂ ଭରତ ସ୍ସହ ମଂତ୍ରିଭିଃ ।
ଇଂଗୁଦୀମୂଲମାଗମ୍ୟ ରାମଶୟ୍ୟାମଵେକ୍ଷ୍ୟ ତାମ୍ ॥ 1 ॥
ଅବ୍ରଵୀଜ୍ଜନନୀ ସ୍ସର୍ଵା ଇହ ତେନ ମହାତ୍ମନା ।
ଶର୍ଵରୀ ଶୟିତା ଭୂମାଵିଦମସ୍ୟ ଵିମର୍ଦିତମ୍ ॥ 2 ॥
ତଚ୍ଛ୍ରୁତ୍ଵା ନିପୁଣଂ ସର୍ଵଂ ଭରତ ସ୍ସହ ମଂତ୍ରିଭିଃ ।
ଇଂଗୁଦୀମୂଲମାଗମ୍ୟ ରାମଶୟ୍ୟାମଵେକ୍ଷ୍ୟ ତାମ୍ ॥ 3 ॥
ଅବ୍ରଵୀଜ୍ଜନନୀ ସ୍ସର୍ଵା ଇହ ତେନ ମହାତ୍ମନା ।
ଶର୍ଵରୀ ଶୟିତା ଭୂମାଵିଦମସ୍ୟ ଵିମର୍ଦିତମ୍ ॥ 4 ॥
ମହାଭାଗକୁଲୀନେନ ମହାଭାଗେନ ଧୀମତା ।
ଜାତୋ ଦଶରଥେନୋର୍ଵ୍ୟାଂ ନ ରାମସ୍ସ୍ଵପ୍ତୁ ମର୍ହତି ॥ 5 ॥
ଅଜିନୋତ୍ତରସଂସ୍ତୀର୍ଣେ ଵରାସ୍ତରଣସଂଚୟେ ।
ଶୟିତ୍ଵା ପୁରୁଷଵ୍ୟାଘ୍ରଃ କଥଂ ଶେତେ ମହୀତଲେ ॥ 6 ॥
ପ୍ରାସାଦାଗ୍ରଵିମାନେଷୁ ଵଲଭୀଷୁ ଚ ସର୍ଵଦା ।
ହୈମରାଜତଭୌମେଷୁ ଵରାସ୍ତରଣଶାଲିଷୁ ॥ 7 ॥
ପୁଷ୍ପସଂଚୟଚିତ୍ରେଷୁ ଚଂଦନାଗରୁଗଂଧିଷୁ ।
ପାଂଡୁରାଭ୍ରପ୍ରକାଶେଷୁ ଶୁକସଂଘରୂତେଷୁଚ ॥ 8 ॥
ପ୍ରାସାଦଵରଵର୍ୟେଷୁ ଶୀତଵତ୍ସୁ ସୁଗଂଧିଷୁ ।
ଉଷିତ୍ଵାମେରୁକଲ୍ପେଷୁ କୃତକାଂଚନ ଭିତ୍ତିଷୁ ॥ 9 ॥
ଗୀତଵାଦିତ୍ରନିର୍ଘୋଷୈର୍ଵରାଭରଣନିସ୍ସ୍ଵନୈଃ ।
ମୃଦଂଗଵରଶବ୍ଦୈଶ୍ଚ ସତତଂ ପ୍ରତିବୋଧିତଃ ॥ 10 ॥
ଵଂଦିଭିର୍ଵଂଦିତଃ କାଲେ ବହୁଭି ସ୍ସୂତମାଗଧୈଃ ।
ଗାଥାଭିରନୁରୂପାଭି ସ୍ସ୍ତୁତିଭିଶ୍ଚ ପରଂତପଃ ॥ 11 ॥
ଅଶ୍ରଦ୍ଧେୟମିଦଂ ଲୋକେ ନ ସତ୍ୟଂ ପ୍ରତିଭାତି ମା ।
ମୁହ୍ୟତେ ଖଲୁ ମେ ଭାଵ ସ୍ସ୍ଵପ୍ନୋଽୟମିତି ମେ ମତିଃ ॥ 12 ॥
ନ ନୂନଂ ଦୈଵତଂ କିଂଚିତ୍କାଲେନ ବଲଵତ୍ତରମ୍ ।
ୟତ୍ର ଦାଶରଥୀ ରାମୋ ଭୂମାଵେଵ ଶୟୀତ ସଃ ॥ 13 ॥
ଵିଦେହରାଜସ୍ୟ ସୁତା ସୀତା ଚ ପ୍ରିୟଦର୍ଶନା ।
ଦୟିତା ଶୟିତା ଭୂମୌ ସ୍ନୁଷା ଦଶରଥସ୍ୟ ଚ ॥ 14 ॥
ଇୟଂ ଶୟ୍ୟା ମମ ଭ୍ରାତୁରିଦଂ ହି ପରିଵର୍ତିତମ୍ ।
ସ୍ଥଂଡିଲେ କଠିନେ ସର୍ଵଂ ଗାତ୍ରୈ ର୍ଵିମୃଦିତଂ ତୃଣମ୍ ॥ 15 ॥
ମନ୍ୟେ ସାଭରଣା ସୁପ୍ତା ସୀତାଽସ୍ମିଂଛୟନୋତ୍ତମେ ।
ତତ୍ର ତତ୍ର ହି ଦୃଶ୍ୟଂତେ ସକ୍ତାଃ କନକବିଂଦଵଃ ॥ 16 ॥
ଉତ୍ତରୀୟମିହାଽସକ୍ତଂ ସୁଵ୍ୟକ୍ତଂ ସୀତୟା ତଦା ।
ତଥା ହ୍ୟେତେ ପ୍ରକାଶଂତେ ସକ୍ତାଃ କୌଶେୟତଂତଵଃ ॥ 17 ॥
ମନ୍ୟେ ଭର୍ତୁ ସ୍ସୁଖା ଶୟ୍ୟା ୟେନ ବାଲା ତପସ୍ଵିନୀ ।
ସୁକୁମାରୀ ସତୀ ଦୁଃଖଂ ନ ହି ଵିଜାନାତି ମୈଥିଲୀ ॥ 18 ॥
ହା ହଂତାଽସ୍ମି ନୃଶଂସୋଽହଂ ୟତ୍ସଭାର୍ୟଃ କୃତେ ମମ ।
ଈଦୃଶୀଂ ରାଘଵଶ୍ଶୟ୍ୟାମଧିଶେତେ ହ୍ୟନାଥଵତ୍ ॥ 19 ॥
ସାର୍ଵଭୌମକୁଲେ ଜାତ ସ୍ସର୍ଵଲୋକସ୍ୟ ସମ୍ମତଃ ।
ସର୍ଵଲୋକପ୍ରିୟସ୍ତ୍ୟକ୍ତ୍ଵା ରାଜ୍ୟଂ ସୁଖମନୁତ୍ତମ୍ ॥ 20 ॥
କଥମିଂଦୀଵରଶ୍ୟାମୋ ରକ୍ତାକ୍ଷଃ ପ୍ରିୟଦର୍ଶନଃ ।
ସୁଖଭାଗୀ ନ ଦୁଃଖାର୍ହ ଶ୍ଶୟିତୋ ଭୁଵି ରାଘଵଃ ॥ 21 ॥
ଧନ୍ୟଃ ଖଲୁ ମହାଭାଗୋ ଲକ୍ଷ୍ମଣ ଶ୍ଶୁଭଲକ୍ଷଣଃ ।
ଭ୍ରାତରଂ ଵିଷମେ କାଲେ ୟୋ ରାମମନୁଵର୍ତତେ ॥ 22 ॥
ସିଦ୍ଧାର୍ଥା ଖଲୁ ଵୈଦେହୀ ପତିଂ ୟାଽନୁଗତା ଵନମ୍ ।
ଵୟଂ ସଂଶୟିତା ସ୍ସର୍ଵେ ହୀନାସ୍ତେନ ମହାତ୍ମନା ॥ 23 ॥
ଆକର୍ଣଧାରା ପୃଥିଵୀ ନୌଃ ଇଵ ପ୍ରତିଭାତି ମା ।
ଗତେ ଦଶରଥେ ସ୍ଵର୍ଗଂ ରାମେ ଚାରଣ୍ୟମାଶ୍ରିତେ ॥ 24 ॥
ନ ଚ ପ୍ରାର୍ଥୟତେ କଚ୍ଚିନ୍ମନସାପି ଵସୁଂଧରାମ୍ ।
ଵନେଽପି ଵସତସ୍ତସ୍ୟ ବାହୁଵୀର୍ୟାଭିରକ୍ଷିତାମ୍ ॥ 25 ॥
ଶୂନ୍ୟସଂଵରଣାରକ୍ଷାମୟଂତ୍ରିତହୟଦ୍ଵିପାମ୍ ।
ଅପାଵୃତପୁରଦ୍ଵାରାଂ ରାଜଧାନୀମରକ୍ଷିତାମ୍ ॥ 26 ॥
ଅପ୍ରହୃଷ୍ଟବଲାଂ ଶୂନ୍ୟାଂ ଵିଷମସ୍ଥାମନାଵୃତାମ୍ ।
ଶତ୍ରଵୋ ନାଭିମନ୍ୟଂତେ ଭକ୍ଷାନ୍ଵିଷକୃତାନିଵ ॥ 27 ॥
ଅଦ୍ୟପ୍ରଭୃତି ଭୂମୌ ତୁ ଶୟିଷ୍ୟେଽହଂ ତୃଣେଷୁ ଵା ।
ଫଲମୂଲାଶନୋ ନିତ୍ୟଂ ଜଟାଚୀରାଣି ଧାରୟନ୍ ॥ 28 ॥
ତସ୍ୟାର୍ଥମୁତ୍ତରଂ କାଲଂ ନିଵତ୍ସ୍ୟାମି ସୁଖଂ ଵନେ ।
ତଂ ପ୍ରତିଶ୍ରଵମାମୁଚ୍ୟ ନାସ୍ୟ ମିଥ୍ୟା ଭଵିଷ୍ୟତି ॥ 29 ॥
ଵସଂତଂ ଭ୍ରାତୁରର୍ଥାୟ ଶତ୍ରୁଘ୍ନୋ ମାଽନୁଵତ୍ସ୍ୟତି ।
ଲକ୍ଷ୍ମଣେନ ସହତ୍ଵାର୍ୟୋ ହ୍ୟୟୋଧ୍ୟାଂ ପାଲୟିଷ୍ୟତି ॥ 30 ॥
ଅଭିଷେକ୍ଷ୍ୟଂତି କାକୁତ୍ସ୍ଥମୟୋଧ୍ୟାୟାଂ ଦ୍ଵିଜାତୟଃ ।
ଅପି ମେ ଦେଵତାଃ କୁର୍ୟୁରିମଂ ସତ୍ୟଂ ମନୋରଥମ୍ ॥ 31 ॥
ପ୍ରସାଦ୍ୟମାନ ଶ୍ଶିରସା ମୟା ସ୍ଵୟଂ ବହୁପ୍ରକାରଂ ୟଦି ନାଭିପତ୍ସ୍ୟତେ ।
ତତୋଽନୁଵତ୍ସ୍ୟାମି ଚିରାୟ ରାଘଵଂ ଵନେଚରନ୍ନାର୍ହତି ମାମୁପେକ୍ଷିତୁମ୍ ॥ 32 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ଅୟୋଧ୍ୟାକାଂଡେ ଅଷ୍ଟାଶୀତିତମସ୍ସର୍ଗଃ ॥
