ଶ୍ରୀମଦ୍ଵାଲ୍ମୀକୀୟ ରାମାୟଣେ ସୁଂଦରକାଂଡମ୍ ।
ଅଥ ନଵମସ୍ସର୍ଗଃ ।
ତସ୍ୟାଲୟଵରିଷ୍ଠସ୍ୟ ମଧ୍ୟେ ଵିପୁଲମାୟତମ୍ ।
ଦଦର୍ଶ ଭଵନଶ୍ରେଷ୍ଠଂ ହନୁମାନ୍ମାରୁତାତ୍ମଜଃ ॥ 1 ॥
ଅର୍ଧୟୋଜନଵିସ୍ତୀର୍ଣମାୟତଂ ୟୋଜନଂ ହି ତତ୍ ।
ଭଵନଂ ରାକ୍ଷସେଂଦ୍ରସ୍ୟ ବହୁପ୍ରାସାଦସଂକୁଲମ୍ ॥ 2 ॥
ମାର୍ଗମାଣସ୍ତୁ ଵୈଦେହୀଂ ସୀତାମାୟତଲୋଚନାମ୍ ।
ସର୍ଵତଃ ପରିଚକ୍ରାମ ହନୂମାନରିସୂଦନଃ ॥ 3 ॥
ଉତ୍ତମଂ ରାକ୍ଷସାଵାସଂ ହନୁମାନଵଲୋକୟନ୍ ।
ଆସସାଦାଥ ଲକ୍ଷ୍ମୀଵାନ୍ ରାକ୍ଷସେଂଦ୍ରନିଵେଶନମ୍ ॥ 4 ॥
ଚତୁର୍ଵିଷାଣୈର୍ଦ୍ଵିରଦୈସ୍ତ୍ରିଵିଷାଣୈସ୍ତଥୈଵ ଚ ।
ପରିକ୍ଷିପ୍ତମସଂବାଧଂ ରକ୍ଷ୍ୟମାଣମୁଦାୟୁଧୈଃ ॥ 5 ॥
ରାକ୍ଷସୀଭିଶ୍ଚ ପତ୍ନୀଭୀ ରାଵଣସ୍ୟ ନିଵେଶନମ୍ ।
ଆହୃତାଭିଶ୍ଚ ଵିକ୍ରମ୍ୟ ରାଜକନ୍ୟାଭିରାଵୃତମ୍ ॥ 6 ॥
ତନ୍ନକ୍ରମକରାକୀର୍ଣଂ ତିମିଂଗିଲଝଷାକୁଲମ୍ ।
ଵାୟୁଵେଗସମାଧୂତଂ ପନ୍ନଗୈରିଵ ସାଗରମ୍ ॥ 7 ॥
ୟା ହି ଵୈଶ୍ରଵଣେ ଲକ୍ଷ୍ମୀର୍ୟା ଚେଂଦ୍ରେ ହରିଵାହନେ ।
ସା ରାଵଣଗୃହେ ସର୍ଵା ନିତ୍ୟମେଵାନପାୟିନୀ ॥ 8 ॥
ୟା ଚ ରାଜ୍ଞଃ କୁବେରସ୍ୟ ୟମସ୍ୟ ଵରୁଣସ୍ୟ ଚ ।
ତାଦୃଶୀ ତଦ୍ଵିଶିଷ୍ଟା ଵା ଋଦ୍ଧୀ ରକ୍ଷୋଗୃହେଷ୍ଵିହ ॥ 9 ॥
ତସ୍ୟ ହର୍ମ୍ୟସ୍ୟ ମଧ୍ୟସ୍ଥଂ ଵେଶ୍ମ ଚାନ୍ୟତ୍ସୁନିର୍ମିତମ୍ ।
ବହୁନିର୍ୟୂହସଂକୀର୍ଣଂ ଦଦର୍ଶ ପଵନାତ୍ମଜଃ ॥ 10 ॥
ବ୍ରହ୍ମଣୋଽର୍ଥେ କୃତଂ ଦିଵ୍ୟଂ ଦିଵି ୟଦ୍ଵିଶ୍ଵକର୍ମଣା ।
ଵିମାନଂ ପୁଷ୍ପକଂ ନାମ ସର୍ଵରତ୍ନଵିଭୂଷିତମ୍ ॥ 11 ॥
ପରେଣ ତପସା ଲେଭେ ୟତ୍କୁବେରଃ ପିତାମହାତ୍ ।
କୁବେରମୋଜସା ଜିତ୍ଵା ଲେଭେ ତଦ୍ରାକ୍ଷସେଶ୍ଵରଃ ॥ 12 ॥
ଈହାମୃଗସମାୟୁକ୍ତ୍ତୈଃ କାର୍ତସ୍ଵରହିରମଣ୍ମୟୈଃ ।
ସୁକୃତୈରାଚିତଂ ସ୍ତଂଭୈଃ ପ୍ରଦୀପ୍ତମିଵ ଚ ଶ୍ରିୟା ॥ 13 ॥
ମେରୁମଂଦରସଂକାଶୈରୁଲ୍ଲିଖଦ୍ଭିରିଵାଂବରମ୍ ।
କୂଟାଗାରୈଶ୍ଶୁଭାକାରୈସ୍ସର୍ଵତସ୍ସମଲଂକୃତମ୍ ॥ 14 ॥
ଜ୍ଵଲନାର୍କପ୍ରତୀକାଶଂ ସୁକୃତଂ ଵିଶ୍ଵକର୍ମଣା ।
ହେମସୋପାନସଂୟୁକ୍ତଂ ଚାରୁପ୍ରଵରଵେଦିକମ୍ ॥ 15 ॥
ଜାଲଵାତାୟନୈର୍ୟୁକ୍ତଂ କାଂଚନୈଃ ସ୍ସ୍ଫାଟିକୈରପି ।
ଇଂଦ୍ରନୀଲମହାନୀଲମଣିପ୍ରଵରଵେଦିକମ୍ ॥ 16 ॥
ଵିଦ୍ରୁମେଣ ଵିଚିତ୍ରେଣ ମଣିଭିଶ୍ଚ ମହାଘନୈଃ ।
ନିସ୍ତୁଲାଭିଶ୍ଚ ମୁକ୍ତାଭିସ୍ତଲେନାଭିଵିରାଜିତମ୍ ॥ 17 ॥
ଚଂଦନେନ ଚ ରକ୍ତେନ ତପନୀୟନିଭେନ ଚ ।
ସୁପୁଣ୍ୟଗଂଧିନା ୟୁକ୍ତମାଦିତ୍ୟତରୁଣୋପମମ୍ ॥ 18 ॥
କୂଟାଗାରୈର୍ଵରାକାରୈର୍ଵିଵିଧୈସ୍ସମଲଂକୃତମ୍ ।
ଵିମାନଂ ପୁଷ୍ପକଂ ଦିଵ୍ୟମାରୁରୋହ ମହାକପିଃ ॥ 19 ॥
ତତ୍ରସ୍ଥସ୍ସ ତଦା ଗଂଧଂ ପାନଭକ୍ଷ୍ୟାନ୍ନସଂଭଵମ୍ ।
ଦିଵ୍ୟଂ ସମ୍ମୂର୍ଛିତଂ ଜିଘ୍ରଦ୍ରୂପଵଂତମିଵାନିଲମ୍ ॥ 20 ॥
ସ ଗଂଧସ୍ତଂ ମହାସତ୍ତ୍ଵଂ ବଂଧୁର୍ବଂଧୁମିଵୋତ୍ତମମ୍ ।
ଇତ ଏହୀତ୍ୟୁଵାଚେନ ତତ୍ର ୟତ୍ର ସ ରାଵଣଃ ॥ 21 ॥
ତତସ୍ତାଂ ପ୍ରସ୍ଥିତଶ୍ଶାଲାଂ ଦଦର୍ଶ ମହତୀଂ ଶୁଭାମ୍ ।
ରାଵଣସ୍ୟ ମନଃ କାଂତାଂ କାଂତାମିଵ ଵରସ୍ତ୍ରିୟମ୍ ॥ 22 ॥
ମଣିସୋପାନଵିକୃତାଂ ହେମଜାଲଵିଭୂଷିତାମ୍ ।
ସ୍ଫାଟିକୈରାଵୃତତଲାଂ ଦଂତାଂତରିତରୂପିକାମ୍ ॥ 23 ॥
ମୁକ୍ତାଭିଶ୍ଚ ପ୍ରଵାଲୈଶ୍ଚ ରୂପ୍ୟଚାମୀକରୈରପି ।
ଵିଭୂଷିତାଂ ମଣିସ୍ତଂଭୈସ୍ସୁବହୁସ୍ତଂଭଭୂଷିତାମ୍ ॥ 24 ॥
ନମ୍ରୈରୃଜୁଭିରତ୍ୟୁଚ୍ଚୈସ୍ସମଂତାତ୍ସୁଵିଭୂଷିତୈଃ ।
ସ୍ତଂଭୈଃ ପକ୍ଷୈରିଵାତ୍ୟୁଚ୍ଚୈର୍ଦିଵଂ ସଂପ୍ରସ୍ଥିତାମିଵ ॥ 25 ॥
ମହତ୍ୟା କୁଥୟାସ୍ତୀର୍ଣାଂ ପୃଥିଵୀଲକ୍ଷଣାଂକୟା ।
ପୃଥିଵୀମିଵ ଵିସ୍ତୀର୍ଣାଂ ସରାଷ୍ଟ୍ରଗୃହମାଲିନୀମ୍ ॥ 26 ॥
ନାଦିତାଂ ମତ୍ତଵିହଗୈର୍ଦିଵ୍ୟଗଂଧାଧିଵାସିତାମ୍ ।
ପରାର୍ଧ୍ୟାସ୍ତରଣୋପେତାଂ ରକ୍ଷୋଧିପନିଷେଵିତାମ୍ ॥ 27 ॥
ଧୂମ୍ରାମଗରୁଧୂପେନ ଵିମଲାଂ ହଂସପାଂଡୁରାମ୍ ।
ଚିତ୍ରାଂ ପୁଷ୍ପୋପହାରେଣ କଲ୍ମାଷୀମିଵ ସୁପ୍ରଭାମ୍ ॥ 28 ॥
ମନସ୍ସଂହ୍ଲାଦଜନନୀଂ ଵର୍ଣସ୍ୟାପି ପ୍ରସାଦିନୀମ୍ ।
ତାଂ ଶୋକନାଶିନୀଂ ଦିଵ୍ୟାଂ ଶ୍ରିୟଃ ସଂଜନନୀମିଵ ॥ 29 ॥
ଇଂଦ୍ରିୟାଣୀଂଦ୍ରିୟାର୍ଥୈସ୍ତୁ ପଂଚ ପଂଚଭିରୁତ୍ତମୈଃ ।
ତର୍ପୟାମାସ ମାତେଵ ତଦା ରାଵଣପାଲିତା ॥ 30 ॥
ସ୍ଵର୍ଗୋଽୟଂ ଦେଵଲୋକୋଽୟମିଂଦ୍ରସ୍ୟେୟଂ ପୁରୀ ଭଵେତ୍ ।
ସିଦ୍ଧିର୍ଵେୟଂ ପରା ହି ସ୍ୟାଦିତ୍ୟମନ୍ୟତ ମାରୁତିଃ ॥ 31 ॥
ପ୍ରଧ୍ୟାୟତ ଇଵାପଶ୍ୟତ୍ପ୍ରଦୀପାଂସ୍ତତ୍ର କାଂଚନାନ୍ ।
ଧୂର୍ତାନିଵ ମହାଧୂତୈର୍ଦେଵନେନ ପରାଜିତାନ୍ ॥ 32 ॥
ଦୀପାନାଂ ଚ ପ୍ରକାଶେନ ତେଜସା ରାଵଣସ୍ୟ ଚ ।
ଅର୍ଚିର୍ଭିର୍ଭୂଷଣାନାଂ ଚ ପ୍ରଦୀପ୍ତେତ୍ୟଭ୍ୟମନ୍ୟତ ॥ 33 ॥
ତତୋଽପଶ୍ୟତ୍କୁଥାଽଽସୀନଂ ନାନାଵରାୟଂବରସ୍ରଜମ୍ ।
ସହସ୍ରଂ ଵରନାରୀଣାଂ ନାନାଵେଷଵିଭୂଷିତମ୍ ॥ 34 ॥
ପରିଵୃତ୍ତେଽର୍ଧରାତ୍ରେ ତୁ ପାନନିଦ୍ରାଵଶଂ ଗତମ୍ ।
କ୍ରୀଡିତ୍ଵୋପରତଂ ରାତ୍ରୌ ସୁଷ୍ଵାପ ବଲଵତ୍ତଦା ॥ 35 ॥
ତତ୍ପ୍ରସୁପ୍ତଂ ଵିରୁରୁଚେ ନିଶ୍ଶବ୍ଦାଂତରଭୂଷଣମ୍ ।
ନିଃଶବ୍ଦହଂସଭ୍ରମରଂ ୟଥା ପଦ୍ମଵନଂ ମହତ୍ ॥ 36 ॥
ତାସାଂ ସଂଵୃତଦଂତାନି ମୀଲିତାକ୍ଷୀଣି ମାରୁତିଃ ।
ଅପଶ୍ୟତ୍ପଦ୍ମଗଂଧୀନି ଵଦନାନି ସୁୟୋଷିତାମ୍ ॥ 37 ॥
ପ୍ରବୁଦ୍ଧାନୀଵ ପଦ୍ମାନି ତାସାଂ ଭୂତ୍ଵା କ୍ଷପାକ୍ଷୟେ ।
ପୁନସ୍ସଂଵୃତପତ୍ରାଣି ରାତ୍ରାଵିଵ ବଭୁସ୍ତଦା ॥ 38 ॥
ଇମାନି ମୁଖପଦ୍ମାନି ନିୟତଂ ମତ୍ତଷଟ୍ପଦାଃ ।
ଅଂବୁଜାନୀଵ ଫୁଲ୍ଲାନି ପ୍ରାର୍ଥୟଂତି ପୁନଃ ପୁନଃ ॥ 39 ॥
ଇତି ଚାମନ୍ୟତ ଶ୍ରୀମାନୁପପତ୍ତ୍ୟା ମହାକପିଃ ।
ମେନେ ହି ଗୁଣତସ୍ତାନି ସମାନି ସଲିଲୋଦ୍ଭଵୈଃ ॥ 40 ॥
ସା ତସ୍ୟ ଶୁଶୁଭେ ଶାଲା ତାଭିସ୍ତ୍ରୀଭିର୍ଵିରାଜିତା ।
ଶାରଦୀଵ ପ୍ରସନ୍ନା ଦ୍ୟୌସ୍ତାରାଭିରଭିଶୋଭିତା ॥ 41 ॥
ସ ଚ ତାଭିଃ ପରିଵୃତଶ୍ଶୁଶୁଭେ ରାକ୍ଷସାଧିପଃ ।
ୟଥା ହ୍ୟୁଡୁପତିଶ୍ଶୀମାଂସ୍ତାରାଭିରଭିସଂଵୃତଃ ॥ 42 ॥
ୟାଶ୍ଚ୍ୟଵଂତେଽଂବରାତ୍ତାରାଃ ପୁଣ୍ୟଶେଷସମାଵୃତାଃ ।
ଇମାସ୍ତାସ୍ସଂଗତାଃ କୃତ୍ସ୍ନା ଇତି ମେନେ ହରିସ୍ତଦା ॥ 43 ॥
ତାରାଣାମିଵ ସୁଵ୍ୟକ୍ତଂ ମହତୀନାଂ ଶୁଭାର୍ଚିଷାମ୍ ।
ପ୍ରଭାଵର୍ଣପ୍ରସାଦାଶ୍ଚ ଵିରେଜୁସ୍ତତ୍ର ୟୋଷିତାମ୍ ॥ 44 ॥
ଵ୍ୟାଵୃତ୍ତଗୁରୁପୀନସ୍ରକ୍ପ୍ରକୀର୍ଣଵରଭୂଷଣାଃ ।
ପାନଵ୍ୟାୟାମକାଲେଷୁ ନିଦ୍ରାପହୃତଚେତସଃ ॥ 45 ॥
ଵ୍ୟାଵୃତ୍ତତିଲକାଃ କାଶ୍ଚିତ୍କାଶ୍ଚିଦୁଦ୍ଭ୍ରଂତନୂପୁରାଃ ।
ପାର୍ଶ୍ଵେ ଗଲିତହାରାଶ୍ଚ କାଶ୍ଚିତ୍ପରମୟୋଷିତଃ ॥ 46 ॥
ମୁକ୍ତାହାରାଽଵୃତାଶ୍ଚାନ୍ୟାଃ କାଶ୍ଚିଦ୍ଵିସ୍ରସ୍ତଵାସସଃ ।
ଵ୍ୟାଵିଦ୍ଧରଶନାଦାମାଃ କିଶୋର୍ୟ ଇଵ ଵାହିତାଃ ॥ 47 ॥
ସୁକୁଂଡଲଧରାଶ୍ଚାନ୍ୟା ଵିଚ୍ଛିନ୍ନମୃଦିତସ୍ରଜଃ ।
ଗଜେଂଦ୍ରମୃଦିତାଃ ଫୁଲ୍ଲା ଲତା ଇଵ ମହାଵନେ ॥ 48 ॥
ଚଂଦ୍ରାଂଶୁକିରଣାଭାଶ୍ଚ ହାରାଃ କାସାଂଚିଦୁତ୍କଟାଃ ।
ହଂସା ଇଵ ବଭୁସ୍ସୁପ୍ତାଃ ସ୍ତନମଧ୍ୟେଷୁ ୟୋଷିତାମ୍ ॥ 49 ॥
ଅପରାସାଂ ଚ ଵୈଡୂର୍ୟାଃ କାଦଂବା ଇଵ ପକ୍ଷିଣଃ ।
ହେମସୂତ୍ରାଣି ଚାନ୍ୟାସାଂ ଚକ୍ରଵାକା ଇଵାଭଵନ୍ ॥ 50 ॥
ହଂସକାରଂଡଵାକୀର୍ଣାଶ୍ଚକ୍ରଵାକୋପଶୋଭିତାଃ ।
ଆପଗା ଇଵ ତା ରେଜୁର୍ଜଘନୈଃ ପୁଲିନୈରିଵ ॥ 51 ॥
କିଂକିଣୀଜାଲସଂକୋଶାସ୍ତା ହୈମଵିପୁଲାଂବୁଜାଃ ।
ଭାଵଗ୍ରାହା ୟଶସ୍ତୀରାଃ ସୁପ୍ତା ନଦ୍ୟ ଇଵାଽଽବଭୁଃ ॥ 52 ॥
ମୃଦୁଷ୍ଵଂଗେଷୁ କାସାଂଚିତ୍କୁଚାଗ୍ରେଷୁ ଚ ସଂସ୍ଥିତାଃ ।
ବଭୁର୍ଵର୍ଭୂଷଣାନୀଵ ଶୁଭା ଭୂଷଣରାଜୟଃ ॥ 53 ॥
ଅଂଶୁକାଂତାଶ୍ଚ କାସାଂଚିନ୍ମୁଖମାରୁତକଂପିତାଃ ।
ଉପର୍ୟୁପରି ଵକ୍ତ୍ରାଣାଂ ଵ୍ୟାଧୂୟଂତେ ପୁନଃ ପୁନଃ ॥ 54 ॥
ତାଃ ପତାକା ଇଵୋଦ୍ଧୂତାଃ ପତ୍ନୀନାଂ ରୁଚିରପ୍ରଭାଃ ।
ନାନାଵର୍ଣସୁଵର୍ଣାନାଂ ଵକ୍ତ୍ରମୂଲେଷୁ ରେଜିରେ ॥ 55 ॥
ଵଵଲ୍ଗୁଶ୍ଚାତ୍ର କାସାଂଚିତ୍କୁଂଡଲାନି ଶୁଭାର୍ଚିଷାମ୍ ।
ମୁଖମାରୁତସଂସର୍ଗାନ୍ମଂଦଂ ମଂଦଂ ସୁୟୋଷିତାମ୍ ॥ 56 ॥
ଶର୍କରାଽସଵଗଂଧୈଶ୍ଚ ପ୍ରକୃତ୍ୟା ସୁରଭିଃ ସୁଖଃ ।
ତାସାଂ ଵଦନନିଶ୍ଵାସସ୍ସିଷେଵେ ରାଵଣଂ ତଦା ॥ 57 ॥
ରାଵଣାନନଶଂକାଶ୍ଚ କାଶ୍ଚିଦ୍ରାଵଣୟୋଷିତଃ ।
ମୁଖାନି ସ୍ମ ସପତ୍ନୀନାମୁପାଜିଘ୍ରନ୍ପୁନଃ ପୁନଃ ॥ 58 ॥
ଅତ୍ୟର୍ଥଂ ସକ୍ତମନସୋ ରାଵଣେ ତା ଵରସ୍ତ୍ରିୟଃ ।
ଅସ୍ଵତଂତ୍ରାଃ ସପତ୍ନୀନାଂ ପ୍ରିୟମେଵାଽଚରଂସ୍ତଦା ॥ 59 ॥
ବାହୂନୁପନିଧାୟାନ୍ୟାଃ ପାରିହାର୍ୟଵିଭୂଷିତାନ୍ ।
ଅଂଶୁକାନି ଚ ରମ୍ୟାଣି ପ୍ରମଦାସ୍ତତ୍ର ଶିଶ୍ୟିରେ ॥ 60 ॥
ଅନ୍ୟା ଵକ୍ଷସି ଚାନ୍ୟସ୍ୟାସ୍ତସ୍ୟାଃ କାଚିତ୍ପୁନର୍ଭୁଜମ୍ ।
ଅପରା ତ୍ଵଂକମନ୍ୟସ୍ୟାସ୍ତସ୍ୟାଶ୍ଚାପ୍ୟପରା ଭୁଜୌ ॥ 61 ॥
ଊରୁପାର୍ଶ୍ଵକଟୀପୃଷ୍ଠମନ୍ୟୋନ୍ୟସ୍ୟ ସମାଶ୍ରିତାଃ ।
ପରସ୍ପରନିଵିଷ୍ଟାଂଗ୍ୟୋ ମଦସ୍ନେହଵଶାନୁଗାଃ ॥ 62 ॥
ଅନ୍ୟୋନ୍ୟଭୁଜସୂତ୍ରେଣ ସ୍ତ୍ରୀମାଲା ଗ୍ରଥିତା ହି ସା ।
ମାଲେଵ ଗ୍ରଥିତା ସୂତ୍ରେ ଶୁଶୁଭେ ମତ୍ତଷଟ୍ପଦା ॥ 63 ॥
ଲତାନାଂ ମାଧଵେ ମାସି ଫୁଲ୍ଲାନାଂ ଵାୟୁସେଵନାତ୍ ।
ଅନ୍ୟୋନ୍ୟ ମାଲାଗ୍ରଥିତଂ ସଂସକ୍ତକୁସୁମୋଚ୍ଚୟମ୍ ॥ 64 ॥
ଵ୍ୟତିଵେଷ୍ଟିତସୁସ୍କଂଧମନ୍ୟୋନ୍ୟଭ୍ରମରାକୁଲମ୍ ।
ଆସୀଦ୍ଵନମିଵୋଦ୍ଧୂତଂ ସ୍ତ୍ରୀଵନଂ ରାଵଣସ୍ୟ ତତ୍ ॥ 65 ॥
ଉଚିତେଷ୍ଵପି ସୁଵ୍ୟକ୍ତଂ ନ ତାସାଂ ୟୋଷିତାଂ ତଦା ।
ଵିଵେକଃ ଶକ୍ୟ ଆଧାତୁଂ ଭୂଷଣାଂଗାଂବରସ୍ରଜାମ୍ ॥ 66 ॥
ରାଵଣେ ସୁଖସଂଵିଷ୍ଟେ ତାସ୍ତ୍ରିୟୋ ଵିଵିଧପ୍ରଭାଃ ।
ଜ୍ଵଲଂତଃ କାଂଚନା ଦୀପାଃ ପ୍ରୈକ୍ଷଂତାନିମିଷା ଇଵ ॥ 67 ॥
ରାଜର୍ଷିପିତୃଦୈତ୍ୟାନାଂ ଗଂଧର୍ଵାଣାଂ ଚ ୟୋଷିତଃ ।
ରାକ୍ଷସାନାଂ ଚ ୟାଃ କନ୍ୟାସ୍ତସ୍ୟ କାମଵଶଂ ଗତାଃ ॥ 68 ॥
ୟୁଦ୍ଧକାମେନ ତାଃ ସର୍ଵା ରାଵଣେନ ହୃତାଃ ସ୍ତ୍ରିୟଃ ।
ସମଦା ମଦନେନୈଵ ମୋହିତାଃ କାଶ୍ଚିଦାଗତାଃ ॥ 69 ॥
ନ ତତ୍ର କାଚିତ୍ପ୍ରମଦା ପ୍ରସହ୍ୟ ଵୀର୍ୟୋପପନ୍ନେନ ଗୁଣେନ ଲବ୍ଧା ।
ନ ଚାନ୍ୟକାମାପି ନ ଚାନ୍ୟପୂର୍ଵା ଵିନା ଵରାର୍ହାଂ ଜନକାତ୍ମଜାଂ ତାମ୍ ॥ 70 ॥
ନ ଚାକୁଲୀନା ନ ଚ ହୀନରୂପା ନାଦକ୍ଷିଣା ନାନୁପଚାରୟୁକ୍ତା ।
ଭାର୍ୟାଭଵତ୍ତସ୍ୟ ନ ହୀନସତ୍ତ୍ଵା ନ ଚାପି କାଂତସ୍ୟ ନ କାମନୀୟା ॥ 71 ॥
ବଭୂଵ ବୁଦ୍ଧିସ୍ତୁ ହରୀଶ୍ଵରସ୍ୟ ୟଦୀଦୃଶୀ ରାଘଵଧର୍ମପତ୍ନୀ ।
ଇମା ୟଥା ରାକ୍ଷସରାଜଭାର୍ୟାଃ ସୁଜାତମସ୍ୟେତି ହି ସାଧୁବୁଦ୍ଧେଃ ॥ 72 ॥
ପୁନଶ୍ଚ ସୋଽଚିଂତୟାଦାତ୍ତରୂପୋ ଧ୍ରୁଵଂ ଵିଶିଷ୍ଟା ଗୁଣତୋ ହି ସୀତା ।
ଅଥାୟମସ୍ୟାଂ କୃତଵାନ୍ମହାତ୍ମା ଲଂକେଶ୍ଵରଃ କଷ୍ଟମନାର୍ୟକର୍ମ ॥ 73 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ସୁଂଦରକାଂଡେ ନଵମସ୍ସର୍ଗଃ ॥
