శ్రీమద్వాల్మీకీయ రామాయణే బాలకాండమ్ ।
అథ నవమస్సర్గః ।
ఏతచ్ఛ్రుత్వా రహస్సూతో రాజానమిదమబ్రవీత్ ।
ఋత్విగ్భిరుపదిష్టోఽయం పురావృత్తో మయా శ్రుతః ॥ 1 ॥
సనత్కుమారో భగవాన్పూర్వం కథితవాన్కథామ్ ।
ఋషీణాం సన్నిధౌ రాజన్ తవ పుత్రాగమం ప్రతి ॥ 2 ॥
కాశ్యపస్యతు పుత్రోఽస్తి విభండక ఇతి శ్రుతః ।
ఋష్యశృంగ ఇతి ఖ్యాతస్తస్య పుత్రో భవిష్యతి ॥ 3 ॥
స వనే నిత్యసంవృద్ధో మునిర్వనచరస్సదా ।
నాన్యం జానాతి విప్రేంద్రో నిత్యం పిత్రనువర్తనాత్ ॥ 4 ॥
ద్వైవిధ్యం బ్రహ్మచర్యస్య భవిష్యతి మహాత్మనః ।
లోకేషు ప్రథితం రాజన్విప్రైశ్చ కథితం సదా ॥ 5 ॥
తస్యైవం వర్తమానస్య కాలస్సమభివర్తత ।
అగ్నిం శుశ్రూషమాణస్య పితరం చ యశస్వినమ్ ॥ 6 ॥
ఏతస్మిన్నేవ కాలే తు రోమపాదః ప్రతాపవాన్ ।
అంగేషు ప్రథితో రాజా భవిష్యతి మహాబలః ॥ 7 ॥
తస్య వ్యతిక్రమాద్రాజ్ఞో భవిష్యతి సుదారుణా ।
అనావృష్టిస్సుఘోరా వై సర్వభూతభయావహా ॥ 8 ॥
అనావృష్ట్యాం తు వృత్తాయాం రాజా దుఃఖసమన్వితః ।
బ్రాహ్మణాన్శ్రుతవృద్ధాంశ్చ సమానీయ ప్రవక్ష్యతి ॥ 9 ॥
భవంతశ్శ్రుతధర్మాణో లోకచారిత్రవేదినః ।
సమాదిశంతు నియమం ప్రాయశ్చిత్తం యథా భవేత్ ॥ 10 ॥
వక్ష్యంతి తే మహీపాలం బ్రాహ్మణా వేదపారగాః ।
విభండకసుతం రాజన్సర్వోపాయైరిహానయ ॥ 11 ॥
ఆనాయ్య చ మహీపాల ఋశ్యశృంగం సుసత్కృతమ్ ।
ప్రయచ్ఛ కన్యాం శాంతాం వై విధినా సుసమాహితః ॥ 12 ॥
తేషాం తు వచనం శ్రుత్వా రాజా చింతాం ప్రపత్స్యతే ।
కేనోపాయేన వై శక్య ఇహానేతుం స వీర్యవాన్ ॥ 13 ॥
తతో రాజా వినిశ్చిత్య సహ మంత్రిభిరాత్మవాన్ ।
పురోహితమమాత్యాంశ్చ తతః ప్రేష్యతి సత్కృతాన్ ॥ 14 ॥
తే తు రాజ్ఞో వచశ్శ్రుశృత్వా వ్యథితా వినతాననాః ।
న గచ్ఛేమ ఋషేర్భీతా అనునేష్యంతి తం నృపమ్ ॥ 15 ॥
వక్ష్యంతి చింతయిత్వా తే తస్యోపాయాంశ్చ తత్క్షమాన్ ।
ఆనేష్యామో వయం విప్రం న చ దోషో భవిష్యతి ॥ 16 ॥
ఏవమంగాధిపేనైవ గణికాభిః ఋషేస్సుతః ।
ఆనీతోఽవర్షయద్దేవశ్శాంతా చాస్మై ప్రదీయతే ॥ 17 ॥
ఋశ్యశృంగస్తు జామాతా పుత్రాంస్తవ విధాస్యతి ।
సనత్కుమారకథితమేతావద్వ్యాహృతం మయా ॥ 18 ॥
అథ హృష్టో దశరథస్సుమంత్రం ప్రత్యభాషత ।
యథర్శ్యశృంగస్త్వానీతో విస్తరేణ త్వయోచ్యతామ్ ॥ 19 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాండే నవమస్సర్గః ॥
