ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ନଵମସ୍ସର୍ଗଃ ।
ଏତଚ୍ଛ୍ରୁତ୍ଵା ରହସ୍ସୂତୋ ରାଜାନମିଦମବ୍ରଵୀତ୍ ।
ଋତ୍ଵିଗ୍ଭିରୁପଦିଷ୍ଟୋଽୟଂ ପୁରାଵୃତ୍ତୋ ମୟା ଶ୍ରୁତଃ ॥ 1 ॥
ସନତ୍କୁମାରୋ ଭଗଵାନ୍ପୂର୍ଵଂ କଥିତଵାନ୍କଥାମ୍ ।
ଋଷୀଣାଂ ସନ୍ନିଧୌ ରାଜନ୍ ତଵ ପୁତ୍ରାଗମଂ ପ୍ରତି ॥ 2 ॥
କାଶ୍ୟପସ୍ୟତୁ ପୁତ୍ରୋଽସ୍ତି ଵିଭଂଡକ ଇତି ଶ୍ରୁତଃ ।
ଋଷ୍ୟଶୃଂଗ ଇତି ଖ୍ୟାତସ୍ତସ୍ୟ ପୁତ୍ରୋ ଭଵିଷ୍ୟତି ॥ 3 ॥
ସ ଵନେ ନିତ୍ୟସଂଵୃଦ୍ଧୋ ମୁନିର୍ଵନଚରସ୍ସଦା ।
ନାନ୍ୟଂ ଜାନାତି ଵିପ୍ରେଂଦ୍ରୋ ନିତ୍ୟଂ ପିତ୍ରନୁଵର୍ତନାତ୍ ॥ 4 ॥
ଦ୍ଵୈଵିଧ୍ୟଂ ବ୍ରହ୍ମଚର୍ୟସ୍ୟ ଭଵିଷ୍ୟତି ମହାତ୍ମନଃ ।
ଲୋକେଷୁ ପ୍ରଥିତଂ ରାଜନ୍ଵିପ୍ରୈଶ୍ଚ କଥିତଂ ସଦା ॥ 5 ॥
ତସ୍ୟୈଵଂ ଵର୍ତମାନସ୍ୟ କାଲସ୍ସମଭିଵର୍ତତ ।
ଅଗ୍ନିଂ ଶୁଶ୍ରୂଷମାଣସ୍ୟ ପିତରଂ ଚ ୟଶସ୍ଵିନମ୍ ॥ 6 ॥
ଏତସ୍ମିନ୍ନେଵ କାଲେ ତୁ ରୋମପାଦଃ ପ୍ରତାପଵାନ୍ ।
ଅଂଗେଷୁ ପ୍ରଥିତୋ ରାଜା ଭଵିଷ୍ୟତି ମହାବଲଃ ॥ 7 ॥
ତସ୍ୟ ଵ୍ୟତିକ୍ରମାଦ୍ରାଜ୍ଞୋ ଭଵିଷ୍ୟତି ସୁଦାରୁଣା ।
ଅନାଵୃଷ୍ଟିସ୍ସୁଘୋରା ଵୈ ସର୍ଵଭୂତଭୟାଵହା ॥ 8 ॥
ଅନାଵୃଷ୍ଟ୍ୟାଂ ତୁ ଵୃତ୍ତାୟାଂ ରାଜା ଦୁଃଖସମନ୍ଵିତଃ ।
ବ୍ରାହ୍ମଣାନ୍ଶ୍ରୁତଵୃଦ୍ଧାଂଶ୍ଚ ସମାନୀୟ ପ୍ରଵକ୍ଷ୍ୟତି ॥ 9 ॥
ଭଵଂତଶ୍ଶ୍ରୁତଧର୍ମାଣୋ ଲୋକଚାରିତ୍ରଵେଦିନଃ ।
ସମାଦିଶଂତୁ ନିୟମଂ ପ୍ରାୟଶ୍ଚିତ୍ତଂ ୟଥା ଭଵେତ୍ ॥ 10 ॥
ଵକ୍ଷ୍ୟଂତି ତେ ମହୀପାଲଂ ବ୍ରାହ୍ମଣା ଵେଦପାରଗାଃ ।
ଵିଭଂଡକସୁତଂ ରାଜନ୍ସର୍ଵୋପାୟୈରିହାନୟ ॥ 11 ॥
ଆନାୟ୍ୟ ଚ ମହୀପାଲ ଋଶ୍ୟଶୃଂଗଂ ସୁସତ୍କୃତମ୍ ।
ପ୍ରୟଚ୍ଛ କନ୍ୟାଂ ଶାଂତାଂ ଵୈ ଵିଧିନା ସୁସମାହିତଃ ॥ 12 ॥
ତେଷାଂ ତୁ ଵଚନଂ ଶ୍ରୁତ୍ଵା ରାଜା ଚିଂତାଂ ପ୍ରପତ୍ସ୍ୟତେ ।
କେନୋପାୟେନ ଵୈ ଶକ୍ୟ ଇହାନେତୁଂ ସ ଵୀର୍ୟଵାନ୍ ॥ 13 ॥
ତତୋ ରାଜା ଵିନିଶ୍ଚିତ୍ୟ ସହ ମଂତ୍ରିଭିରାତ୍ମଵାନ୍ ।
ପୁରୋହିତମମାତ୍ୟାଂଶ୍ଚ ତତଃ ପ୍ରେଷ୍ୟତି ସତ୍କୃତାନ୍ ॥ 14 ॥
ତେ ତୁ ରାଜ୍ଞୋ ଵଚଶ୍ଶ୍ରୁଶୃତ୍ଵା ଵ୍ୟଥିତା ଵିନତାନନାଃ ।
ନ ଗଚ୍ଛେମ ଋଷେର୍ଭୀତା ଅନୁନେଷ୍ୟଂତି ତଂ ନୃପମ୍ ॥ 15 ॥
ଵକ୍ଷ୍ୟଂତି ଚିଂତୟିତ୍ଵା ତେ ତସ୍ୟୋପାୟାଂଶ୍ଚ ତତ୍କ୍ଷମାନ୍ ।
ଆନେଷ୍ୟାମୋ ଵୟଂ ଵିପ୍ରଂ ନ ଚ ଦୋଷୋ ଭଵିଷ୍ୟତି ॥ 16 ॥
ଏଵମଂଗାଧିପେନୈଵ ଗଣିକାଭିଃ ଋଷେସ୍ସୁତଃ ।
ଆନୀତୋଽଵର୍ଷୟଦ୍ଦେଵଶ୍ଶାଂତା ଚାସ୍ମୈ ପ୍ରଦୀୟତେ ॥ 17 ॥
ଋଶ୍ୟଶୃଂଗସ୍ତୁ ଜାମାତା ପୁତ୍ରାଂସ୍ତଵ ଵିଧାସ୍ୟତି ।
ସନତ୍କୁମାରକଥିତମେତାଵଦ୍ଵ୍ୟାହୃତଂ ମୟା ॥ 18 ॥
ଅଥ ହୃଷ୍ଟୋ ଦଶରଥସ୍ସୁମଂତ୍ରଂ ପ୍ରତ୍ୟଭାଷତ ।
ୟଥର୍ଶ୍ୟଶୃଂଗସ୍ତ୍ଵାନୀତୋ ଵିସ୍ତରେଣ ତ୍ଵୟୋଚ୍ୟତାମ୍ ॥ 19 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ନଵମସ୍ସର୍ଗଃ ॥
