ශ්රීමද්වාල්මීකීය රාමායණේ බාලකාංඩම් ।
අථ නවමස්සර්ගඃ ।
ඒතච්ඡ්රුත්වා රහස්සූතෝ රාජානමිදමබ්රවීත් ।
ඍත්විග්භිරුපදිෂ්ටෝऽයං පුරාවෘත්තෝ මයා ශ්රුතඃ ॥ 1 ॥
සනත්කුමාරෝ භගවාන්පූර්වං කථිතවාන්කථාම් ।
ඍෂීණාං සන්නිධෞ රාජන් තව පුත්රාගමං ප්රති ॥ 2 ॥
කාශ්යපස්යතු පුත්රෝऽස්ති විභංඩක ඉති ශ්රුතඃ ।
ඍෂ්යශෘංග ඉති ඛ්යාතස්තස්ය පුත්රෝ භවිෂ්යති ॥ 3 ॥
ස වනේ නිත්යසංවෘද්ධෝ මුනිර්වනචරස්සදා ।
නාන්යං ජානාති විප්රේංද්රෝ නිත්යං පිත්රනුවර්තනාත් ॥ 4 ॥
ද්වෛවිධ්යං බ්රහ්මචර්යස්ය භවිෂ්යති මහාත්මනඃ ।
ලෝකේෂු ප්රථිතං රාජන්විප්රෛශ්ච කථිතං සදා ॥ 5 ॥
තස්යෛවං වර්තමානස්ය කාලස්සමභිවර්තත ।
අග්නිං ශුශ්රූෂමාණස්ය පිතරං ච යශස්විනම් ॥ 6 ॥
ඒතස්මින්නේව කාලේ තු රෝමපාදඃ ප්රතාපවාන් ।
අංගේෂු ප්රථිතෝ රාජා භවිෂ්යති මහාබලඃ ॥ 7 ॥
තස්ය ව්යතික්රමාද්රාජ්ඤෝ භවිෂ්යති සුදාරුණා ।
අනාවෘෂ්ටිස්සුඝෝරා වෛ සර්වභූතභයාවහා ॥ 8 ॥
අනාවෘෂ්ට්යාං තු වෘත්තායාං රාජා දුඃඛසමන්විතඃ ।
බ්රාහ්මණාන්ශ්රුතවෘද්ධාංශ්ච සමානීය ප්රවක්ෂ්යති ॥ 9 ॥
භවංතශ්ශ්රුතධර්මාණෝ ලෝකචාරිත්රවේදිනඃ ।
සමාදිශංතු නියමං ප්රායශ්චිත්තං යථා භවේත් ॥ 10 ॥
වක්ෂ්යංති තේ මහීපාලං බ්රාහ්මණා වේදපාරගාඃ ।
විභංඩකසුතං රාජන්සර්වෝපායෛරිහානය ॥ 11 ॥
ආනාය්ය ච මහීපාල ඍශ්යශෘංගං සුසත්කෘතම් ।
ප්රයච්ඡ කන්යාං ශාංතාං වෛ විධිනා සුසමාහිතඃ ॥ 12 ॥
තේෂාං තු වචනං ශ්රුත්වා රාජා චිංතාං ප්රපත්ස්යතේ ।
කේනෝපායේන වෛ ශක්ය ඉහානේතුං ස වීර්යවාන් ॥ 13 ॥
තතෝ රාජා විනිශ්චිත්ය සහ මංත්රිභිරාත්මවාන් ।
පුරෝහිතමමාත්යාංශ්ච තතඃ ප්රේෂ්යති සත්කෘතාන් ॥ 14 ॥
තේ තු රාජ්ඤෝ වචශ්ශ්රුශෘත්වා ව්යථිතා විනතානනාඃ ।
න ගච්ඡේම ඍෂේර්භීතා අනුනේෂ්යංති තං නෘපම් ॥ 15 ॥
වක්ෂ්යංති චිංතයිත්වා තේ තස්යෝපායාංශ්ච තත්ක්ෂමාන් ।
ආනේෂ්යාමෝ වයං විප්රං න ච දෝෂෝ භවිෂ්යති ॥ 16 ॥
ඒවමංගාධිපේනෛව ගණිකාභිඃ ඍෂේස්සුතඃ ।
ආනීතෝऽවර්ෂයද්දේවශ්ශාංතා චාස්මෛ ප්රදීයතේ ॥ 17 ॥
ඍශ්යශෘංගස්තු ජාමාතා පුත්රාංස්තව විධාස්යති ।
සනත්කුමාරකථිතමේතාවද්ව්යාහෘතං මයා ॥ 18 ॥
අථ හෘෂ්ටෝ දශරථස්සුමංත්රං ප්රත්යභාෂත ।
යථර්ශ්යශෘංගස්ත්වානීතෝ විස්තරේණ ත්වයෝච්යතාම් ॥ 19 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ බාලකාංඩේ නවමස්සර්ගඃ ॥
