𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌂𑌡𑌮𑍍 ।
𑌅𑌥 𑌨𑌵𑌮𑌸𑍍𑌸𑌰𑍍𑌗𑌃 ।
𑌏𑌤𑌚𑍍𑌛𑍍𑌰𑍁𑌤𑍍𑌵𑌾 𑌰𑌹𑌸𑍍𑌸𑍂𑌤𑍋 𑌰𑌾𑌜𑌾𑌨𑌮𑌿𑌦𑌮𑌬𑍍𑌰𑌵𑍀𑌤𑍍 ।
𑌋𑌤𑍍𑌵𑌿𑌗𑍍𑌭𑌿𑌰𑍁𑌪𑌦𑌿𑌷𑍍𑌟𑍋𑌽𑌯𑌂 𑌪𑍁𑌰𑌾𑌵𑍃𑌤𑍍𑌤𑍋 𑌮𑌯𑌾 𑌶𑍍𑌰𑍁𑌤𑌃 ॥ 1 ॥
𑌸𑌨𑌤𑍍𑌕𑍁𑌮𑌾𑌰𑍋 𑌭𑌗𑌵𑌾𑌨𑍍𑌪𑍂𑌰𑍍𑌵𑌂 𑌕𑌥𑌿𑌤𑌵𑌾𑌨𑍍𑌕𑌥𑌾𑌮𑍍 ।
𑌋𑌷𑍀𑌣𑌾𑌂 𑌸𑌨𑍍𑌨𑌿𑌧𑍌 𑌰𑌾𑌜𑌨𑍍 𑌤𑌵 𑌪𑍁𑌤𑍍𑌰𑌾𑌗𑌮𑌂 𑌪𑍍𑌰𑌤𑌿 ॥ 2 ॥
𑌕𑌾𑌶𑍍𑌯𑌪𑌸𑍍𑌯𑌤𑍁 𑌪𑍁𑌤𑍍𑌰𑍋𑌽𑌸𑍍𑌤𑌿 𑌵𑌿𑌭𑌂𑌡𑌕 𑌇𑌤𑌿 𑌶𑍍𑌰𑍁𑌤𑌃 ।
𑌋𑌷𑍍𑌯𑌶𑍃𑌂𑌗 𑌇𑌤𑌿 𑌖𑍍𑌯𑌾𑌤𑌸𑍍𑌤𑌸𑍍𑌯 𑌪𑍁𑌤𑍍𑌰𑍋 𑌭𑌵𑌿𑌷𑍍𑌯𑌤𑌿 ॥ 3 ॥
𑌸 𑌵𑌨𑍇 𑌨𑌿𑌤𑍍𑌯𑌸𑌂𑌵𑍃𑌦𑍍𑌧𑍋 𑌮𑍁𑌨𑌿𑌰𑍍𑌵𑌨𑌚𑌰𑌸𑍍𑌸𑌦𑌾 ।
𑌨𑌾𑌨𑍍𑌯𑌂 𑌜𑌾𑌨𑌾𑌤𑌿 𑌵𑌿𑌪𑍍𑌰𑍇𑌂𑌦𑍍𑌰𑍋 𑌨𑌿𑌤𑍍𑌯𑌂 𑌪𑌿𑌤𑍍𑌰𑌨𑍁𑌵𑌰𑍍𑌤𑌨𑌾𑌤𑍍 ॥ 4 ॥
𑌦𑍍𑌵𑍈𑌵𑌿𑌧𑍍𑌯𑌂 𑌬𑍍𑌰𑌹𑍍𑌮𑌚𑌰𑍍𑌯𑌸𑍍𑌯 𑌭𑌵𑌿𑌷𑍍𑌯𑌤𑌿 𑌮𑌹𑌾𑌤𑍍𑌮𑌨𑌃 ।
𑌲𑍋𑌕𑍇𑌷𑍁 𑌪𑍍𑌰𑌥𑌿𑌤𑌂 𑌰𑌾𑌜𑌨𑍍𑌵𑌿𑌪𑍍𑌰𑍈𑌶𑍍𑌚 𑌕𑌥𑌿𑌤𑌂 𑌸𑌦𑌾 ॥ 5 ॥
𑌤𑌸𑍍𑌯𑍈𑌵𑌂 𑌵𑌰𑍍𑌤𑌮𑌾𑌨𑌸𑍍𑌯 𑌕𑌾𑌲𑌸𑍍𑌸𑌮𑌭𑌿𑌵𑌰𑍍𑌤𑌤 ।
𑌅𑌗𑍍𑌨𑌿𑌂 𑌶𑍁𑌶𑍍𑌰𑍂𑌷𑌮𑌾𑌣𑌸𑍍𑌯 𑌪𑌿𑌤𑌰𑌂 𑌚 𑌯𑌶𑌸𑍍𑌵𑌿𑌨𑌮𑍍 ॥ 6 ॥
𑌏𑌤𑌸𑍍𑌮𑌿𑌨𑍍𑌨𑍇𑌵 𑌕𑌾𑌲𑍇 𑌤𑍁 𑌰𑍋𑌮𑌪𑌾𑌦𑌃 𑌪𑍍𑌰𑌤𑌾𑌪𑌵𑌾𑌨𑍍 ।
𑌅𑌂𑌗𑍇𑌷𑍁 𑌪𑍍𑌰𑌥𑌿𑌤𑍋 𑌰𑌾𑌜𑌾 𑌭𑌵𑌿𑌷𑍍𑌯𑌤𑌿 𑌮𑌹𑌾𑌬𑌲𑌃 ॥ ॥
𑌤𑌸𑍍𑌯 𑌵𑍍𑌯𑌤𑌿𑌕𑍍𑌰𑌮𑌾𑌦𑍍𑌰𑌾𑌜𑍍𑌞𑍋 𑌭𑌵𑌿𑌷𑍍𑌯𑌤𑌿 𑌸𑍁𑌦𑌾𑌰𑍁𑌣𑌾 ।
𑌅𑌨𑌾𑌵𑍃𑌷𑍍𑌟𑌿𑌸𑍍𑌸𑍁𑌘𑍋𑌰𑌾 𑌵𑍈 𑌸𑌰𑍍𑌵𑌭𑍂𑌤𑌭𑌯𑌾𑌵𑌹𑌾 ॥ ॥
𑌅𑌨𑌾𑌵𑍃𑌷𑍍𑌟𑍍𑌯𑌾𑌂 𑌤𑍁 𑌵𑍃𑌤𑍍𑌤𑌾𑌯𑌾𑌂 𑌰𑌾𑌜𑌾 𑌦𑍁𑌃𑌖𑌸𑌮𑌨𑍍𑌵𑌿𑌤𑌃 ।
𑌬𑍍𑌰𑌾𑌹𑍍𑌮𑌣𑌾𑌨𑍍𑌶𑍍𑌰𑍁𑌤𑌵𑍃𑌦𑍍𑌧𑌾𑌂𑌶𑍍𑌚 𑌸𑌮𑌾𑌨𑍀𑌯 𑌪𑍍𑌰𑌵𑌕𑍍𑌷𑍍𑌯𑌤𑌿 ॥ ॥
𑌭𑌵𑌂𑌤𑌶𑍍𑌶𑍍𑌰𑍁𑌤𑌧𑌰𑍍𑌮𑌾𑌣𑍋 𑌲𑍋𑌕𑌚𑌾𑌰𑌿𑌤𑍍𑌰𑌵𑍇𑌦𑌿𑌨𑌃 ।
𑌸𑌮𑌾𑌦𑌿𑌶𑌂𑌤𑍁 𑌨𑌿𑌯𑌮𑌂 𑌪𑍍𑌰𑌾𑌯𑌶𑍍𑌚𑌿𑌤𑍍𑌤𑌂 𑌯𑌥𑌾 𑌭𑌵𑍇𑌤𑍍 ॥ 10 ॥
𑌵𑌕𑍍𑌷𑍍𑌯𑌂𑌤𑌿 𑌤𑍇 𑌮𑌹𑍀𑌪𑌾𑌲𑌂 𑌬𑍍𑌰𑌾𑌹𑍍𑌮𑌣𑌾 𑌵𑍇𑌦𑌪𑌾𑌰𑌗𑌾𑌃 ।
𑌵𑌿𑌭𑌂𑌡𑌕𑌸𑍁𑌤𑌂 𑌰𑌾𑌜𑌨𑍍𑌸𑌰𑍍𑌵𑍋𑌪𑌾𑌯𑍈𑌰𑌿𑌹𑌾𑌨𑌯 ॥ 11 ॥
𑌆𑌨𑌾𑌯𑍍𑌯 𑌚 𑌮𑌹𑍀𑌪𑌾𑌲 𑌋𑌶𑍍𑌯𑌶𑍃𑌂𑌗𑌂 𑌸𑍁𑌸𑌤𑍍𑌕𑍃𑌤𑌮𑍍 ।
𑌪𑍍𑌰𑌯𑌚𑍍𑌛 𑌕𑌨𑍍𑌯𑌾𑌂 𑌶𑌾𑌂𑌤𑌾𑌂 𑌵𑍈 𑌵𑌿𑌧𑌿𑌨𑌾 𑌸𑍁𑌸𑌮𑌾𑌹𑌿𑌤𑌃 ॥ 12 ॥
𑌤𑍇𑌷𑌾𑌂 𑌤𑍁 𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌰𑌾𑌜𑌾 𑌚𑌿𑌂𑌤𑌾𑌂 𑌪𑍍𑌰𑌪𑌤𑍍𑌸𑍍𑌯𑌤𑍇 ।
𑌕𑍇𑌨𑍋𑌪𑌾𑌯𑍇𑌨 𑌵𑍈 𑌶𑌕𑍍𑌯 𑌇𑌹𑌾𑌨𑍇𑌤𑍁𑌂 𑌸 𑌵𑍀𑌰𑍍𑌯𑌵𑌾𑌨𑍍 ॥ 13 ॥
𑌤𑌤𑍋 𑌰𑌾𑌜𑌾 𑌵𑌿𑌨𑌿𑌶𑍍𑌚𑌿𑌤𑍍𑌯 𑌸𑌹 𑌮𑌂𑌤𑍍𑌰𑌿𑌭𑌿𑌰𑌾𑌤𑍍𑌮𑌵𑌾𑌨𑍍 ।
𑌪𑍁𑌰𑍋𑌹𑌿𑌤𑌮𑌮𑌾𑌤𑍍𑌯𑌾𑌂𑌶𑍍𑌚 𑌤𑌤𑌃 𑌪𑍍𑌰𑍇𑌷𑍍𑌯𑌤𑌿 𑌸𑌤𑍍𑌕𑍃𑌤𑌾𑌨𑍍 ॥ 14 ॥
𑌤𑍇 𑌤𑍁 𑌰𑌾𑌜𑍍𑌞𑍋 𑌵𑌚𑌶𑍍𑌶𑍍𑌰𑍁𑌶𑍃𑌤𑍍𑌵𑌾 𑌵𑍍𑌯𑌥𑌿𑌤𑌾 𑌵𑌿𑌨𑌤𑌾𑌨𑌨𑌾𑌃 ।
𑌨 𑌗𑌚𑍍𑌛𑍇𑌮 𑌋𑌷𑍇𑌰𑍍𑌭𑍀𑌤𑌾 𑌅𑌨𑍁𑌨𑍇𑌷𑍍𑌯𑌂𑌤𑌿 𑌤𑌂 𑌨𑍃𑌪𑌮𑍍 ॥ 15 ॥
𑌵𑌕𑍍𑌷𑍍𑌯𑌂𑌤𑌿 𑌚𑌿𑌂𑌤𑌯𑌿𑌤𑍍𑌵𑌾 𑌤𑍇 𑌤𑌸𑍍𑌯𑍋𑌪𑌾𑌯𑌾𑌂𑌶𑍍𑌚 𑌤𑌤𑍍𑌕𑍍𑌷𑌮𑌾𑌨𑍍 ।
𑌆𑌨𑍇𑌷𑍍𑌯𑌾𑌮𑍋 𑌵𑌯𑌂 𑌵𑌿𑌪𑍍𑌰𑌂 𑌨 𑌚 𑌦𑍋𑌷𑍋 𑌭𑌵𑌿𑌷𑍍𑌯𑌤𑌿 ॥ 16 ॥
𑌏𑌵𑌮𑌂𑌗𑌾𑌧𑌿𑌪𑍇𑌨𑍈𑌵 𑌗𑌣𑌿𑌕𑌾𑌭𑌿𑌃 𑌋𑌷𑍇𑌸𑍍𑌸𑍁𑌤𑌃 ।
𑌆𑌨𑍀𑌤𑍋𑌽𑌵𑌰𑍍𑌷𑌯𑌦𑍍𑌦𑍇𑌵𑌶𑍍𑌶𑌾𑌂𑌤𑌾 𑌚𑌾𑌸𑍍𑌮𑍈 𑌪𑍍𑌰𑌦𑍀𑌯𑌤𑍇 ॥ 1 ॥
𑌋𑌶𑍍𑌯𑌶𑍃𑌂𑌗𑌸𑍍𑌤𑍁 𑌜𑌾𑌮𑌾𑌤𑌾 𑌪𑍁𑌤𑍍𑌰𑌾𑌂𑌸𑍍𑌤𑌵 𑌵𑌿𑌧𑌾𑌸𑍍𑌯𑌤𑌿 ।
𑌸𑌨𑌤𑍍𑌕𑍁𑌮𑌾𑌰𑌕𑌥𑌿𑌤𑌮𑍇𑌤𑌾𑌵𑌦𑍍𑌵𑍍𑌯𑌾𑌹𑍃𑌤𑌂 𑌮𑌯𑌾 ॥ 1 ॥
𑌅𑌥 𑌹𑍃𑌷𑍍𑌟𑍋 𑌦𑌶𑌰𑌥𑌸𑍍𑌸𑍁𑌮𑌂𑌤𑍍𑌰𑌂 𑌪𑍍𑌰𑌤𑍍𑌯𑌭𑌾𑌷𑌤 ।
𑌯𑌥𑌰𑍍𑌶𑍍𑌯𑌶𑍃𑌂𑌗𑌸𑍍𑌤𑍍𑌵𑌾𑌨𑍀𑌤𑍋 𑌵𑌿𑌸𑍍𑌤𑌰𑍇𑌣 𑌤𑍍𑌵𑌯𑍋𑌚𑍍𑌯𑌤𑌾𑌮𑍍 ॥ 1 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌂𑌡𑍇 𑌨𑌵𑌮𑌸𑍍𑌸𑌰𑍍𑌗𑌃 ॥
