śrīmadvālmīkīya rāmāyaṇē bālakāṇḍam ।
atha navamassargaḥ ।
ētachChrutvā rahassūtō rājānamidamabravīt ।
ṛtvigbhirupadiṣṭō'yaṃ purāvṛttō mayā śrutaḥ ॥ 1 ॥
sanatkumārō bhagavānpūrvaṃ kathitavānkathām ।
ṛṣīṇāṃ sannidhau rājan tava putrāgamaṃ prati ॥ 2 ॥
kāśyapasyatu putrō'sti vibhaṇḍaka iti śrutaḥ ।
ṛṣyaśṛṅga iti khyātastasya putrō bhaviṣyati ॥ 3 ॥
sa vanē nityasaṃvṛddhō munirvanacharassadā ।
nānyaṃ jānāti viprēndrō nityaṃ pitranuvartanāt ॥ 4 ॥
dvaividhyaṃ brahmacharyasya bhaviṣyati mahātmanaḥ ।
lōkēṣu prathitaṃ rājanvipraiścha kathitaṃ sadā ॥ 5 ॥
tasyaivaṃ vartamānasya kālassamabhivartata ।
agniṃ śuśrūṣamāṇasya pitaraṃ cha yaśasvinam ॥ 6 ॥
ētasminnēva kālē tu rōmapādaḥ pratāpavān ।
aṅgēṣu prathitō rājā bhaviṣyati mahābalaḥ ॥ 7 ॥
tasya vyatikramādrājñō bhaviṣyati sudāruṇā ।
anāvṛṣṭissughōrā vai sarvabhūtabhayāvahā ॥ 8 ॥
anāvṛṣṭyāṃ tu vṛttāyāṃ rājā duḥkhasamanvitaḥ ।
brāhmaṇānśrutavṛddhāṃścha samānīya pravakṣyati ॥ 9 ॥
bhavantaśśrutadharmāṇō lōkachāritravēdinaḥ ।
samādiśantu niyamaṃ prāyaśchittaṃ yathā bhavēt ॥ 10 ॥
vakṣyanti tē mahīpālaṃ brāhmaṇā vēdapāragāḥ ।
vibhaṇḍakasutaṃ rājansarvōpāyairihānaya ॥ 11 ॥
ānāyya cha mahīpāla ṛśyaśṛṅgaṃ susatkṛtam ।
prayachCha kanyāṃ śāntāṃ vai vidhinā susamāhitaḥ ॥ 12 ॥
tēṣāṃ tu vachanaṃ śrutvā rājā chintāṃ prapatsyatē ।
kēnōpāyēna vai śakya ihānētuṃ sa vīryavān ॥ 13 ॥
tatō rājā viniśchitya saha mantribhirātmavān ।
purōhitamamātyāṃścha tataḥ prēṣyati satkṛtān ॥ 14 ॥
tē tu rājñō vachaśśruśṛtvā vyathitā vinatānanāḥ ।
na gachChēma ṛṣērbhītā anunēṣyanti taṃ nṛpam ॥ 15 ॥
vakṣyanti chintayitvā tē tasyōpāyāṃścha tatkṣamān ।
ānēṣyāmō vayaṃ vipraṃ na cha dōṣō bhaviṣyati ॥ 16 ॥
ēvamaṅgādhipēnaiva gaṇikābhiḥ ṛṣēssutaḥ ।
ānītō'varṣayaddēvaśśāntā chāsmai pradīyatē ॥ 17 ॥
ṛśyaśṛṅgastu jāmātā putrāṃstava vidhāsyati ।
sanatkumārakathitamētāvadvyāhṛtaṃ mayā ॥ 18 ॥
atha hṛṣṭō daśarathassumantraṃ pratyabhāṣata ।
yatharśyaśṛṅgastvānītō vistarēṇa tvayōchyatām ॥ 19 ॥
ityārṣē śrīmadrāmāyaṇē vālmīkīya ādikāvyē bālakāṇḍē navamassargaḥ ॥
