શ્રીમદ્વાલ્મીકીય રામાયણે બાલકાંડમ્ ।
અથ નવમસ્સર્ગઃ ।
એતચ્છ્રુત્વા રહસ્સૂતો રાજાનમિદમબ્રવીત્ ।
ઋત્વિગ્ભિરુપદિષ્ટોઽયં પુરાવૃત્તો મયા શ્રુતઃ ॥ 1 ॥
સનત્કુમારો ભગવાન્પૂર્વં કથિતવાન્કથામ્ ।
ઋષીણાં સન્નિધૌ રાજન્ તવ પુત્રાગમં પ્રતિ ॥ 2 ॥
કાશ્યપસ્યતુ પુત્રોઽસ્તિ વિભંડક ઇતિ શ્રુતઃ ।
ઋષ્યશૃંગ ઇતિ ખ્યાતસ્તસ્ય પુત્રો ભવિષ્યતિ ॥ 3 ॥
સ વને નિત્યસંવૃદ્ધો મુનિર્વનચરસ્સદા ।
નાન્યં જાનાતિ વિપ્રેંદ્રો નિત્યં પિત્રનુવર્તનાત્ ॥ 4 ॥
દ્વૈવિધ્યં બ્રહ્મચર્યસ્ય ભવિષ્યતિ મહાત્મનઃ ।
લોકેષુ પ્રથિતં રાજન્વિપ્રૈશ્ચ કથિતં સદા ॥ 5 ॥
તસ્યૈવં વર્તમાનસ્ય કાલસ્સમભિવર્તત ।
અગ્નિં શુશ્રૂષમાણસ્ય પિતરં ચ યશસ્વિનમ્ ॥ 6 ॥
એતસ્મિન્નેવ કાલે તુ રોમપાદઃ પ્રતાપવાન્ ।
અંગેષુ પ્રથિતો રાજા ભવિષ્યતિ મહાબલઃ ॥ 7 ॥
તસ્ય વ્યતિક્રમાદ્રાજ્ઞો ભવિષ્યતિ સુદારુણા ।
અનાવૃષ્ટિસ્સુઘોરા વૈ સર્વભૂતભયાવહા ॥ 8 ॥
અનાવૃષ્ટ્યાં તુ વૃત્તાયાં રાજા દુઃખસમન્વિતઃ ।
બ્રાહ્મણાન્શ્રુતવૃદ્ધાંશ્ચ સમાનીય પ્રવક્ષ્યતિ ॥ 9 ॥
ભવંતશ્શ્રુતધર્માણો લોકચારિત્રવેદિનઃ ।
સમાદિશંતુ નિયમં પ્રાયશ્ચિત્તં યથા ભવેત્ ॥ 10 ॥
વક્ષ્યંતિ તે મહીપાલં બ્રાહ્મણા વેદપારગાઃ ।
વિભંડકસુતં રાજન્સર્વોપાયૈરિહાનય ॥ 11 ॥
આનાય્ય ચ મહીપાલ ઋશ્યશૃંગં સુસત્કૃતમ્ ।
પ્રયચ્છ કન્યાં શાંતાં વૈ વિધિના સુસમાહિતઃ ॥ 12 ॥
તેષાં તુ વચનં શ્રુત્વા રાજા ચિંતાં પ્રપત્સ્યતે ।
કેનોપાયેન વૈ શક્ય ઇહાનેતું સ વીર્યવાન્ ॥ 13 ॥
તતો રાજા વિનિશ્ચિત્ય સહ મંત્રિભિરાત્મવાન્ ।
પુરોહિતમમાત્યાંશ્ચ તતઃ પ્રેષ્યતિ સત્કૃતાન્ ॥ 14 ॥
તે તુ રાજ્ઞો વચશ્શ્રુશૃત્વા વ્યથિતા વિનતાનનાઃ ।
ન ગચ્છેમ ઋષેર્ભીતા અનુનેષ્યંતિ તં નૃપમ્ ॥ 15 ॥
વક્ષ્યંતિ ચિંતયિત્વા તે તસ્યોપાયાંશ્ચ તત્ક્ષમાન્ ।
આનેષ્યામો વયં વિપ્રં ન ચ દોષો ભવિષ્યતિ ॥ 16 ॥
એવમંગાધિપેનૈવ ગણિકાભિઃ ઋષેસ્સુતઃ ।
આનીતોઽવર્ષયદ્દેવશ્શાંતા ચાસ્મૈ પ્રદીયતે ॥ 17 ॥
ઋશ્યશૃંગસ્તુ જામાતા પુત્રાંસ્તવ વિધાસ્યતિ ।
સનત્કુમારકથિતમેતાવદ્વ્યાહૃતં મયા ॥ 18 ॥
અથ હૃષ્ટો દશરથસ્સુમંત્રં પ્રત્યભાષત ।
યથર્શ્યશૃંગસ્ત્વાનીતો વિસ્તરેણ ત્વયોચ્યતામ્ ॥ 19 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે બાલકાંડે નવમસ્સર્ગઃ ॥
