ശ്രീമദ്വാല്മീകീയ രാമായണേ ബാലകാംഡമ് ।
അഥ നവമസ്സര്ഗഃ ।
ഏതച്ഛ്രുത്വാ രഹസ്സൂതോ രാജാനമിദമബ്രവീത് ।
ഋത്വിഗ്ഭിരുപദിഷ്ടോഽയം പുരാവൃത്തോ മയാ ശ്രുതഃ ॥ 1 ॥
സനത്കുമാരോ ഭഗവാന്പൂർവം കഥിതവാന്കഥാമ് ।
ഋഷീണാം സന്നിധൌ രാജന് തവ പുത്രാഗമം പ്രതി ॥ 2 ॥
കാശ്യപസ്യതു പുത്രോഽസ്തി വിഭംഡക ഇതി ശ്രുതഃ ।
ഋഷ്യശൃംഗ ഇതി ഖ്യാതസ്തസ്യ പുത്രോ ഭവിഷ്യതി ॥ 3 ॥
സ വനേ നിത്യസംവൃദ്ധോ മുനിർവനചരസ്സദാ ।
നാന്യം ജാനാതി വിപ്രേംദ്രോ നിത്യം പിത്രനുവര്തനാത് ॥ 4 ॥
ദ്വൈവിധ്യം ബ്രഹ്മചര്യസ്യ ഭവിഷ്യതി മഹാത്മനഃ ।
ലോകേഷു പ്രഥിതം രാജന്വിപ്രൈശ്ച കഥിതം സദാ ॥ 5 ॥
തസ്യൈവം വര്തമാനസ്യ കാലസ്സമഭിവര്തത ।
അഗ്നിം ശുശ്രൂഷമാണസ്യ പിതരം ച യശസ്വിനമ് ॥ 6 ॥
ഏതസ്മിന്നേവ കാലേ തു രോമപാദഃ പ്രതാപവാന് ।
അംഗേഷു പ്രഥിതോ രാജാ ഭവിഷ്യതി മഹാബലഃ ॥ 7 ॥
തസ്യ വ്യതിക്രമാദ്രാജ്ഞോ ഭവിഷ്യതി സുദാരുണാ ।
അനാവൃഷ്ടിസ്സുഘോരാ വൈ സർവഭൂതഭയാവഹാ ॥ 8 ॥
അനാവൃഷ്ട്യാം തു വൃത്തായാം രാജാ ദുഃഖസമന്വിതഃ ।
ബ്രാഹ്മണാന്ശ്രുതവൃദ്ധാംശ്ച സമാനീയ പ്രവക്ഷ്യതി ॥ 9 ॥
ഭവംതശ്ശ്രുതധര്മാണോ ലോകചാരിത്രവേദിനഃ ।
സമാദിശംതു നിയമം പ്രായശ്ചിത്തം യഥാ ഭവേത് ॥ 10 ॥
വക്ഷ്യംതി തേ മഹീപാലം ബ്രാഹ്മണാ വേദപാരഗാഃ ।
വിഭംഡകസുതം രാജന്സർവോപായൈരിഹാനയ ॥ 11 ॥
ആനായ്യ ച മഹീപാല ഋശ്യശൃംഗം സുസത്കൃതമ് ।
പ്രയച്ഛ കന്യാം ശാംതാം വൈ വിധിനാ സുസമാഹിതഃ ॥ 12 ॥
തേഷാം തു വചനം ശ്രുത്വാ രാജാ ചിംതാം പ്രപത്സ്യതേ ।
കേനോപായേന വൈ ശക്യ ഇഹാനേതും സ വീര്യവാന് ॥ 13 ॥
തതോ രാജാ വിനിശ്ചിത്യ സഹ മംത്രിഭിരാത്മവാന് ।
പുരോഹിതമമാത്യാംശ്ച തതഃ പ്രേഷ്യതി സത്കൃതാന് ॥ 14 ॥
തേ തു രാജ്ഞോ വചശ്ശ്രുശൃത്വാ വ്യഥിതാ വിനതാനനാഃ ।
ന ഗച്ഛേമ ഋഷേര്ഭീതാ അനുനേഷ്യംതി തം നൃപമ് ॥ 15 ॥
വക്ഷ്യംതി ചിംതയിത്വാ തേ തസ്യോപായാംശ്ച തത്ക്ഷമാന് ।
ആനേഷ്യാമോ വയം വിപ്രം ന ച ദോഷോ ഭവിഷ്യതി ॥ 16 ॥
ഏവമംഗാധിപേനൈവ ഗണികാഭിഃ ഋഷേസ്സുതഃ ।
ആനീതോഽവര്ഷയദ്ദേവശ്ശാംതാ ചാസ്മൈ പ്രദീയതേ ॥ 17 ॥
ഋശ്യശൃംഗസ്തു ജാമാതാ പുത്രാംസ്തവ വിധാസ്യതി ।
സനത്കുമാരകഥിതമേതാവദ്വ്യാഹൃതം മയാ ॥ 18 ॥
അഥ ഹൃഷ്ടോ ദശരഥസ്സുമംത്രം പ്രത്യഭാഷത ।
യഥര്ശ്യശൃംഗസ്ത്വാനീതോ വിസ്തരേണ ത്വയോച്യതാമ് ॥ 19 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ ബാലകാംഡേ നവമസ്സര്ഗഃ ॥
