ଶ୍ରୀମଦ୍ଵାଲ୍ମୀକୀୟ ରାମାୟଣେ ୟୁଦ୍ଧକାଂଡମ୍ ।
ଅଥ ଦ୍ଵିଚତ୍ଵାରିଂଶସ୍ସର୍ଗଃ ।
ତତସ୍ତେରାକ୍ଷସାସ୍ତତ୍ରଗତ୍ଵାରାଵଣମଂଦିରମ୍ ।
ନ୍ୟଵେଦୟନ୍ପୁରୀଂରୁଦ୍ଧାଂରାମେଣସହଵାନରୈଃ ॥ 1 ॥
ରୁଦ୍ଧାଂତୁନଗରୀଂଶ୍ରୁତ୍ଵାଜାତକ୍ରୋଧୋନିଶାଚରଃ ।
ଵିଧାନଂଦ୍ଵିଗୁଣଂଶ୍ରୁତ୍ଵାପ୍ରାସାଦଂସୋଽଧ୍ୟରୋହତ ॥ 2 ॥
ସଦଦର୍ଶାଵୃତାଂଲଂକାଂସଶୈଲଵନକାନନାମ୍ ।
ଅସଂଖ୍ୟେୟୈର୍ହରିଗଣୈଃସର୍ଵତୋୟୁଦ୍ଧକାଂକ୍ଷିଭିଃ ॥ 3 ॥
ସଦୃଷ୍ଟ୍ଵାଵାନରୈଃସର୍ଵାଂଵସୁଧାଂକଵଲୀକୃତାମ୍ ।
କଥଂକ୍ଷପୟିତଵ୍ୟାଃସ୍ୟୁରିତିଚିଂତାପରୋଽଭଵତ୍ ॥ 4 ॥
ସଚିଂତୟିତ୍ଵାସୁଚିରଂଧୈର୍ୟମାଲଂବ୍ୟରାଵଣଃ ।
ରାଘଵଂହରିୟୂଥାଂଶ୍ଚଦଦର୍ଶାୟତଲୋଚନଃ ॥ 5 ॥
ରାଘଵଃସହସୈନ୍ୟେନମୁଦିତୋନାମପୁପ୍ଲୁଵେ ।
ଲଂକାଂଦଦର୍ଶଗୁପ୍ତାଂଵୈସର୍ଵତୋରାକ୍ଷସୈର୍ଵୃତାମ୍ ॥ 6 ॥
ଦୃଷ୍ଟ୍ଵାଦାଶରଥିର୍ଲଂକାଂଚିତ୍ରଧ୍ଵଜପତାକିନୀମ୍ ।
ଜଗାମସହସାସୀତାଂଦୂୟମାନେନଚେତସା ॥ 7 ॥
ଅତ୍ରସାମୃଗଶାଵାକ୍ଷୀମତ୍କୃତେଜନକାତ୍ମଜା ।
ପୀଡ୍ୟତେଶୋକସଂତପ୍ତାକୃଶାସ୍ଥଂଡିଲଶାୟିନୀ ॥ 8 ॥
ପୀଡ୍ୟମାନାଂସଧର୍ମାତ୍ମାଵୈଦେହୀମନୁଚିଂତୟନ୍ ।
କ୍ଷିପ୍ରମାଜ୍ଞାପୟାମାସଵାନରାଂଦ୍ଵିଷତାଂଵଧେ ॥ 9 ॥
ଏଵମୁକ୍ତେତୁଵଚନେରାମେଣାକ୍ଲିଷ୍ଟକର୍ମଣା ।
ସଂଘର୍ଷମାଣାଃପ୍ଲଵଗାଃସିମ୍ହନାଦୈରନାଦୟନ୍ ॥ 10 ॥
ଶିଖରୈର୍ଵିକିରାମୈନାଂଲଂକାଂମୁଷ୍ଟିଭିରେଵଵା ।
ଇତିସ୍ମଦଧିରେସର୍ଵେମନାଂସିହରିୟୂଥପାଃ ॥ 11 ॥
ଉଦ୍ୟମ୍ୟଗିରିଶୃଂଗାଣିଶିଖରାଣିମହାଂତିଚ ।
ତରୂଂଶ୍ଚୋତ୍ପାଟ୍ୟଵିଵିଧାଂସ୍ତିଷ୍ଠଂତିହରିୟୂଥପାଃ ॥ 12 ॥
ପ୍ରେକ୍ଷତୋରାକ୍ଷସେଂଦ୍ରସ୍ୟତାନ୍ୟନୀକାନିଭାଗଶଃ ।
ରାଘଵପ୍ରିୟକାମାର୍ଥଂଲଂକାମାରୁରୁହୁସ୍ତଦା ॥ 13 ॥
ତେତାମ୍ରଵକ୍ତ୍ରାହେମାଭାରାମାର୍ଥେତ୍ୟକ୍ତଜୀଵିତାଃ ।
ଲଂକାମେଵାଭ୍ୟଵର୍ତଂତସାଲତାଲଶିଲାୟୁଧାଃ ॥ 14 ॥
ତେଦ୍ରୁମୈଃପର୍ଵତାଗ୍ରୈଶ୍ଚମୁଷ୍ଟିଭିଶ୍ଚପ୍ଲଵଂଗମାଃ ।
ପ୍ରାକାରାଗ୍ରାଣ୍ୟରଣ୍ୟାନିମମଂଥୁସ୍ତୋରଣାନିଚ ॥ 15 ॥
ପାରିଖାଃପୂରୟଂତିସ୍ମପ୍ରସନ୍ନସଲିଲାୟୁତାଃ ।
ପାଂସୁଭିଃପର୍ଵତାଗ୍ରୈଶ୍ଚତୃଣୈଃକାଷ୍ଠୈଶ୍ଚଵାନରାଃ ॥ 16 ॥
ତତଃସହସ୍ରୟୂଥାଶ୍ଚକୋଟୀୟୂଥାଶ୍ଚଵାନରାଃ ।
କୋଟୀଶତୟୁତାଶ୍ଚାନ୍ୟେଲଂକାମାରୁରୁହୁସ୍ତଦା ॥ 17 ॥
କାଂଚନାନିପ୍ରମୃଦ୍ନଂତସ୍ତୋରଣାନିପ୍ଲଵଂଗମାଃ ।
କୈଲାସଶିଖରାଭାନିଗୋପୁରାଣିପ୍ରମଥ୍ୟଚ ॥ 18 ॥
ଆପ୍ଲଵଂତଃପ୍ଲଵଂତଶ୍ଚଗର୍ଜଂତଶ୍ଚପ୍ଲଵଂଗମାଃ ।
ଲଂକାଂତାମଭିଧାଵଂତିମହାଵାରଣସଂନିଭାଃ ॥ 19 ॥
ଜୟତ୍ୟତିବଲୋରାମୋଲକ୍ଷ୍ମଣଶ୍ଚମହାବଲଃ ।
ରାଜାଜୟତିସୁଗ୍ରୀଵୋରାଘଵେଣାଭିପାଲିତଃ ॥ 20 ॥
ଇତ୍ୟେଵଂଘୋଷୟଂତଶ୍ଚଗର୍ଜଂତଶ୍ଚପ୍ଲଵଂଗମାଃ ।
ଅଭ୍ୟଧାଵଂତଲଂକାୟାଃପ୍ରାକାରଂକାମରୂପିଣଃ ॥ 21 ॥
ଵୀରବାହୁଃସୁବାହୁଶ୍ଚନଲଶ୍ଚଵନଗୋଚରଃ ।
ନିପୀଡ୍ୟୋପନିଵିଷ୍ଟାସ୍ତେପ୍ରାକାରଂହରିୟୂଥପାଃ ।
ଏତସ୍ମିନ୍ନଂତରେଚକ୍ରୁଃସ୍କଂଧାଵାରନିଵେଶନମ୍ ॥ 22 ॥
ପୂର୍ଵଦ୍ଵାରଂତୁକୁମୁଦଃକୋଟୀଭିର୍ଦଶଭିର୍ଵୃତଃ ।
ଆଵୃତ୍ୟବଲଵାଂସ୍ତସ୍ଥୌହରିଭିର୍ଜିତକାଶିଭିଃ ॥ 23 ॥
ସାହାୟ୍ୟାର୍ଥଂତୁତସ୍ୟୈଵନିଵିଷ୍ଟଃପ୍ରଘସୋହରିଃ ।
ପନସଶ୍ଚମହାବାହୁର୍ଵାନରୈର୍ବହୁଭିର୍ଵୃତଃ ॥ 24 ॥
ଦକ୍ଷିଣଂଦ୍ଵାରମାଗମ୍ୟଵୀରଃଶତବଲିଃକପିଃ ।
ଆଵୃତ୍ୟବଲଵାଂସ୍ତସ୍ଥୌଵିଂଶତ୍ୟାକୋଟିଭିର୍ଵୃତଃ ॥ 25 ॥
ସୁଷେଣଃପଶ୍ଚିମଦ୍ଵାରଂଗତସ୍ତାରାପିତାହରିଃ ।
ଆଵୃତ୍ୟବଲଵାଂସ୍ତସ୍ଥୌଷଷ୍ଟିକୋଟିଭିରାଵୃତଃ ॥ 26 ॥
ଉତ୍ତରଂଦ୍ଵାରମାସାଦ୍ୟରାମଃସୌମିତ୍ରିଣାସହ ।
ଆଵୃତ୍ୟବଲଵାଂସ୍ତସ୍ଥୌସୁଗ୍ରୀଵଶ୍ଚହରୀଶ୍ଵରଃ ॥ 27 ॥
ଗୋଲାଂଗୂଲୋମହାକାୟୋଗଵାକ୍ଷୋଭୀମଦର୍ଶନଃ ।
ଵୃତଃକୋଟ୍ୟାମହାଵୀର୍ୟସ୍ତସ୍ଥୌରାମସ୍ୟପାର୍ଶ୍ଵତଃ ॥ 28 ॥
ଋକ୍ଷାଣାଂଭୀମଵେଗାନାଂଧୂମ୍ରଃଶତ୍ରୁନିବର୍ହଣଃ ।
ଵୃତଃକୋଟ୍ୟାମହାଵୀର୍ୟସ୍ତସ୍ଥୌରାମସ୍ୟପାର୍ଶ୍ଵତଃ ॥ 29 ॥
ସନ୍ନଦ୍ଧସ୍ତୁମହାଵୀର୍ୟୋଗଦାପାଣିର୍ଵିଭୀଷଣଃ ।
ଵୃତୋୟସ୍ତୈସ୍ତୁସଚିଵୈସ୍ତସ୍ଥୌତତ୍ରମହାବଲଃ ॥ 30 ॥
ଗଜୋଗଵାକ୍ଷୋଗଵୟଃଶରଭୋଗଂଧମାଦନଃ ।
ସମଂତାତ୍ପରିଧାଵଂତୋରରକ୍ଷୁର୍ହରିଵାହିନୀମ୍ ॥ 31 ॥
ତତଃକୋପପରୀତାତ୍ମାରାଵଣୋରାକ୍ଷସେଶ୍ଵରଃ ।
ନିର୍ୟାଣଂସର୍ଵସୈନ୍ୟାନାଂଦ୍ରୁତମାଜ୍ଞାପୟତ୍ତଦା ॥ 32 ॥
ଏତଚ୍ଛ୍ରୁତ୍ଵାତତୋଵାକ୍ୟଂରାଵଣସ୍ୟମୁଖୋଦ୍ଗତମ୍ ।
ସହସାଭୀମନିର୍ଘୋଷମୁଦ୍ଘୁଷ୍ଟଂରଜନୀଚରୈଃ ॥ 33 ॥
ତତଃପ୍ରଚୋଦିତାଭେର୍ୟଶ୍ଚଂଦ୍ରପାଂଡରପୁଷ୍କରାଃ ।
ହେମକୋଣାହତାଭୀମାରାକ୍ଷସାନାଂସମଂତତଃ ॥ 34 ॥
ଵିନେଦୁଶ୍ଚମହାଘୋଷାଃଶଂଖାଃଶତସହସ୍ରଶଃ ।
ରାକ୍ଷସାନାଂସୁଘୋରାଣାଂମୁଖମାରୁତପୂରିତାଃ ॥ 35 ॥
ତେବଭୁଃଶୁଭନୀଲାଂଗାଃସଶଂଖାରଜନୀଚରାଃ ।
ଵିଦ୍ୟୁନ୍ମଂଡଲସନ୍ନଦ୍ଧାଃସବଲାକାଇଵାଂବୁଦାଃ ॥ 36 ॥
ନିଷ୍ପତଂତିତତଃସୈନ୍ୟାହୃଷ୍ଟାରାଵଣଚୋଦିତାଃ ।
ସମୟେପୂର୍ୟମାଣସ୍ୟଵେଗାଇଵମହୋଦଧେଃ ॥ 37 ॥
ତତୋଵାନରସୈନ୍ୟେନମୁକ୍ତୋନାଦଃସମଂତତଃ ।
ମଲୟଃପୂରିତୋୟେନସସାନୁପ୍ରସ୍ଥକଂଦରଃ ॥ 38 ॥
ଶଂଖଦୁଂଦୁଭିସଂଘୁଷ୍ଟଃସିମ୍ହନାଦସ୍ତରସ୍ଵିନାମ୍ ।
ପୃଥିଵୀଂଚାଂତରିକ୍ଷଂଚସାଗରଂଚୈଵନାଦୟନ୍ ॥ 39 ॥
ଗଜାନାଂବୃଂହିତୈଃସାର୍ଧଂହୟାନାଂହେଷିତୈରପି ।
ରଥାନାଂନେମିଘୋଷୈଶ୍ଚରକ୍ଷସାମ୍ଵଦନସ୍ଵନଃ ॥ 40 ॥
ଏତସ୍ମିନ୍ନଂତରେଘୋରଃସଂଗ୍ରାମଃସମଵର୍ତତ ।
ରକ୍ଷସାଂଵାନରାଣାଂଚୟଥାଦେଵାସୁରେପୁରା ॥ 41 ॥
ତେଗଦାଭିଃପ୍ରଦୀପ୍ତାଭିଃଶକ୍ତିଶୂଲପରଶ୍ଵଧୈଃ ।
ନିଜଘ୍ନୁର୍ଵାନରାନ୍ଘୋରାଃକଥୟଂତଃସ୍ଵଵିକ୍ରମାନ୍ ॥ 42 ॥
ରାଜନ୍ ଜୟ ଜୟେତ୍ୟୁକ୍ତ୍ଵା ସ୍ଵସ୍ଵନାମକଥାଂ ତତଃ ।
ରାକ୍ଷସାସ୍ତ୍ଵପରେ ଭୀମାଃ ପ୍ରାକାରସ୍ଥାମହୀଂ ଗତାନ୍ ॥ 43 ॥
ତଥାଵୃକ୍ଷୈର୍ମହାକାୟାଃପର୍ଵତାଗ୍ରୈଶ୍ଚଵାନରାଃ ।
ନିଜଘ୍ନୁସ୍ତାନିରକ୍ଷାଂସିନଖୈର୍ଦଂତୈଶ୍ଚଵେଗିତାଃ ॥ 44 ॥
ରାକ୍ଷସାସ୍ତ୍ଵପରେଭୀମାଃପ୍ରାକାରସ୍ଥାମହୀଗତାନ୍ ।
ଭିଂଦିପାଲୈଶ୍ଚଖଡ୍ଗୈଶ୍ଚଶୂଲୈଶ୍ଚୈଵଵ୍ୟଦାରୟନ୍ ॥ 45 ॥
ଵାନରାଶ୍ଚାପିସଂକ୍ରୁଦ୍ଧାଃପ୍ରାକାରସ୍ଥାନ୍ମହୀଗତାଃ ।
ରାକ୍ଷସାନ୍ପାତୟାମାସୁଃସମାପ୍ଲୁତ୍ୟପ୍ଲଵଂଗମାଃ ॥ 46 ॥
ସସଂପ୍ରହାରସ୍ତୁମୁଲୋମାଂସଶୋଣିତକର୍ଦମଃ ।
ରକ୍ଷସାଂଵାନରାଣାଂଚସଂବଭୂଵାଦ୍ଭୁତୋପମାଃ ॥ 47 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ୟୁଦ୍ଧକାଂଡେ ଦ୍ଵିଚତ୍ଵାରିଂଶସ୍ସର୍ଗଃ ॥
