ശ്രീമദ്വാല്മീകീയ രാമായണേ കിഷ്കിംധാകാംഡമ് ।
അഥ ഷട്ചത്വാരിംശസ്സര്ഗഃ ।
ഗതേഷു വാനരേംദ്രേഷു രാമസ്സുഗ്രീവമബ്രവീത് ।
കഥം ഭവാന്വിജാനീതേ സർവം വൈ മംഡലം ഭുവഃ ॥ 1 ॥
സുഗ്രീവസ്തു തതോ രാമമുവാച പ്രണതാത്മവാന് ।
ശ്രൂയതാം സർവമാഖ്യാസ്യേ വിസ്തരേണ നരര്ഷഭ ॥ 2 ॥
യദാ തു ദുംദുഭിം നാമ ദാനവം മഹിഷാകൃതിമ് ।
പരികാലയതേ വാലീ മലയം പ്രതി പർവതമ് ॥ 3 ॥
തദാ വിവേശ മഹിഷോ മലയസ്യ ഗുഹാം പ്രതി ।
വിവേശ വാലീ തത്രാപി മലയം തജ്ജിഘാംസയാ ॥ 4 ॥
തതോഽഹം തത്ര നിക്ഷിപ്തോ ഗുഹാദ്വാരി വിനീതവത് ।
ന ച നിഷ്ക്രാമതേ വാലീ തദാ സംവത്സരേ ഗതേ ॥ 5 ॥
തതഃ ക്ഷതജവേഗേന ആപുപൂരേ തദാ ബിലമ് ।
തദഹം വിസ്മിതോ ദൃഷ്ട്വാ ഭ്രാതൃശോകവിഷാര്ദിതഃ ॥ 6 ॥
അഥാഽഹം കൃതബുദ്ധിസ്തു സുവ്യക്തം നിഹതോ ഗുരുഃ ।
ശിലാ പർവതസംകാശാ ബിലദ്വാരി മയാ കൃതാ ॥ 7 ॥
അശക്നുവ ന്നിഷ്ക്രമിതും മഹിഷോ വിനശേദിതി ।
തതോഽഹമാഗാം കിഷ്കിംധാം നിരാശസ്തസ്യ ജീവിതേ ॥ 8 ॥
രാജ്യം ച സുമഹത്പ്രാപ്യ താരയാ രുമയാ സഹ ।
മിത്രൈശ്ച സഹിതസ്തത്ര വസാമി വിഗതജ്വരഃ ॥ 9 ॥
ആജഗാമ തതോ വാലീ ഹത്വാ തം ദാനവര്ഷഭമ് ।
തതോഽഹമദദാം രാജ്യം ഗൌരവാദ്ഭയയംത്രിതഃ ॥ 10 ॥
സ മാം ജിഘാംസുര്ദുഷ്ടാത്മാ വാലീ പ്രവ്യഥിതേംദ്രിയഃ ।
പരികാലയതേ ക്രോധാദ്ധാവംതം സചിവൈസ്സഹ ॥ 11 ॥
തതോഽഹം വാലിനാ തേന സാഽനുബദ്ധഃ പ്രധാവിതഃ ।
നദീശ്ച വിവിധാഃ പശ്യന്വനാനി നഗരാണി ച ॥ 12 ॥
ആദര്ശതലസംകാശാ തതോ വൈ പൃഥിവീ മയാ ।
അലാതചക്രപ്രതിമാ ദൃഷ്ടാ ഗോഷ്പദവത്തദാ ॥ 13 ॥
പൂർവാം ദിശം തതോ ഗത്വാ പശ്യാമി വിവിധാന് ദ്രുമാന് ।
പർവതന്ശ്ച നദീ രമ്യാസ്സരാംസി വിവിധാനി ച ॥ 14 ॥
ഉദയം തത്ര പശ്യാമി പർവതം ധാതുമംഡിതമ് ।
ക്ഷീരോദം സാഗരം ചൈവ നിത്യമപ്സരസാലയമ് ॥ 15 ॥
പരികാലയമാനസ്തു വാലിനാഽഭിദ്രുത സ്തദാ ।
പുനരാവൃത്യ സഹസാ പ്രസ്ഥിതോഽഹം തദാ വിഭോ ॥ 16 ॥
പുനരാവര്തമാനസ്തു വാലിനാഽഭിദ്രുതോദ്രുതമ് ।
ദിശസ്തസ്യാസ്തതോ ഭൂയഃ പ്രസ്ഥിതോ ദക്ഷിണാം ദിശമ് ।
വിംധ്യപാദപസംകീര്ണാം ചംദനദ്രുമശോഭിതാമ് ॥ 17 ॥
ദ്രുമശൈലാംസ്തതഃ പശ്യന്ഭൂയോ ദക്ഷിണതോഽപരാമ് ।
പശ്ചിമാം ച ദിശം പ്രാപ്താ വാലിനാ സമഭിദ്രുതഃ ॥ 18 ॥
സംപശ്യന്വിവിധാംദേശാനസ്തം ച ഗിരിസത്തമമ് ।
പ്രാപ്യ ചാസ്തം ഗിരിശ്രേഷ്ഠമുത്തരാം സംപ്രധാവിതഃ ॥ 19 ॥
ഹിമവംതം ച മേരും ച സമുദ്രം ച തഥോത്തരമ് ।
യദാ ന വിംദം ശരണം വാലിനാ സമഭിദ്രുതഃ ॥ 20 ॥
തദാ മാം ബുദ്ധിസംപന്നോ ഹനൂമാന്വാക്യമബ്രവീത് ।
ഇദാനീം മേ സ്മൃതം രാജന്യഥാ വാലീ ഹരീശ്വരഃ ॥ 21 ॥
മതംഗേന തദാ ശപ്തോ ഹ്യസ്മിന്നാശ്രമമംഡലേ ।
പ്രവിശേദ്യദി വൈ വാലീ മൂര്ധാഽസ്യ ശതധാ ഭവേത് ॥ 22 ॥
തത്ര വാസസ്സുഖോഽസ്മാകം നിരുദ്വിഗ്നോ ഭവിഷ്യതി ।
തതഃ പർവതമാസാദ്യ ഋഷ്യമൂകം നൃപാത്മജ ॥ 23 ॥
ന വിവേശ തദാ വാലീ മതംഗസ്യ ഭയാത്തദാ ।
ഏവം മയാ തദാ രാജന്പ്രത്യക്ഷമുപലക്ഷിതമ് ॥ 24 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ കിഷ്കിംധാകാംഡേ ഷട്ചത്വാരിംശസ്സര്ഗഃ ॥
