śrīmadvālmīkīya rāmāyaṇē kiṣkindhākāṇḍam ।
atha ṣaṭchatvāriṃśassargaḥ ।
gatēṣu vānarēndrēṣu rāmassugrīvamabravīt ।
kathaṃ bhavānvijānītē sarvaṃ vai maṇḍalaṃ bhuvaḥ ॥ 1 ॥
sugrīvastu tatō rāmamuvācha praṇatātmavān ।
śrūyatāṃ sarvamākhyāsyē vistarēṇa nararṣabha ॥ 2 ॥
yadā tu dundubhiṃ nāma dānavaṃ mahiṣākṛtim ।
parikālayatē vālī malayaṃ prati parvatam ॥ 3 ॥
tadā vivēśa mahiṣō malayasya guhāṃ prati ।
vivēśa vālī tatrāpi malayaṃ tajjighāṃsayā ॥ 4 ॥
tatō'haṃ tatra nikṣiptō guhādvāri vinītavat ।
na cha niṣkrāmatē vālī tadā saṃvatsarē gatē ॥ 5 ॥
tataḥ kṣatajavēgēna āpupūrē tadā bilam ।
tadahaṃ vismitō dṛṣṭvā bhrātṛśōkaviṣārditaḥ ॥ 6 ॥
athā'haṃ kṛtabuddhistu suvyaktaṃ nihatō guruḥ ।
śilā parvatasaṅkāśā biladvāri mayā kṛtā ॥ 7 ॥
aśaknuva nniṣkramituṃ mahiṣō vinaśēditi ।
tatō'hamāgāṃ kiṣkindhāṃ nirāśastasya jīvitē ॥ 8 ॥
rājyaṃ cha sumahatprāpya tārayā rumayā saha ।
mitraiścha sahitastatra vasāmi vigatajvaraḥ ॥ 9 ॥
ājagāma tatō vālī hatvā taṃ dānavarṣabham ।
tatō'hamadadāṃ rājyaṃ gauravādbhayayantritaḥ ॥ 10 ॥
sa māṃ jighāṃsurduṣṭātmā vālī pravyathitēndriyaḥ ।
parikālayatē krōdhāddhāvantaṃ sachivaissaha ॥ 11 ॥
tatō'haṃ vālinā tēna sā'nubaddhaḥ pradhāvitaḥ ।
nadīścha vividhāḥ paśyanvanāni nagarāṇi cha ॥ 12 ॥
ādarśatalasaṅkāśā tatō vai pṛthivī mayā ।
alātachakrapratimā dṛṣṭā gōṣpadavattadā ॥ 13 ॥
pūrvāṃ diśaṃ tatō gatvā paśyāmi vividhān drumān ।
parvatanścha nadī ramyāssarāṃsi vividhāni cha ॥ 14 ॥
udayaṃ tatra paśyāmi parvataṃ dhātumaṇḍitam ।
kṣīrōdaṃ sāgaraṃ chaiva nityamapsarasālayam ॥ 15 ॥
parikālayamānastu vālinā'bhidruta stadā ।
punarāvṛtya sahasā prasthitō'haṃ tadā vibhō ॥ 16 ॥
punarāvartamānastu vālinā'bhidrutōdrutam ।
diśastasyāstatō bhūyaḥ prasthitō dakṣiṇāṃ diśam ।
vindhyapādapasaṅkīrṇāṃ chandanadrumaśōbhitām ॥ 17 ॥
drumaśailāṃstataḥ paśyanbhūyō dakṣiṇatō'parām ।
paśchimāṃ cha diśaṃ prāptā vālinā samabhidrutaḥ ॥ 18 ॥
sampaśyanvividhāndēśānastaṃ cha girisattamam ।
prāpya chāstaṃ giriśrēṣṭhamuttarāṃ sampradhāvitaḥ ॥ 19 ॥
himavantaṃ cha mēruṃ cha samudraṃ cha tathōttaram ।
yadā na vindaṃ śaraṇaṃ vālinā samabhidrutaḥ ॥ 20 ॥
tadā māṃ buddhisampannō hanūmānvākyamabravīt ।
idānīṃ mē smṛtaṃ rājanyathā vālī harīśvaraḥ ॥ 21 ॥
mataṅgēna tadā śaptō hyasminnāśramamaṇḍalē ।
praviśēdyadi vai vālī mūrdhā'sya śatadhā bhavēt ॥ 22 ॥
tatra vāsassukhō'smākaṃ nirudvignō bhaviṣyati ।
tataḥ parvatamāsādya ṛṣyamūkaṃ nṛpātmaja ॥ 23 ॥
na vivēśa tadā vālī mataṅgasya bhayāttadā ।
ēvaṃ mayā tadā rājanpratyakṣamupalakṣitam ॥ 24 ॥
ityārṣē śrīmadrāmāyaṇē vālmīkīya ādikāvyē kiṣkindhākāṇḍē ṣaṭchatvāriṃśassargaḥ ॥
