ଶ୍ରୀମଦ୍ଵାଲ୍ମୀକୀୟ ରାମାୟଣେ କିଷ୍କିଂଧାକାଂଡମ୍ ।
ଅଥ ଷଟ୍ଚତ୍ଵାରିଂଶସ୍ସର୍ଗଃ ।
ଗତେଷୁ ଵାନରେଂଦ୍ରେଷୁ ରାମସ୍ସୁଗ୍ରୀଵମବ୍ରଵୀତ୍ ।
କଥଂ ଭଵାନ୍ଵିଜାନୀତେ ସର୍ଵଂ ଵୈ ମଂଡଲଂ ଭୁଵଃ ॥ 1 ॥
ସୁଗ୍ରୀଵସ୍ତୁ ତତୋ ରାମମୁଵାଚ ପ୍ରଣତାତ୍ମଵାନ୍ ।
ଶ୍ରୂୟତାଂ ସର୍ଵମାଖ୍ୟାସ୍ୟେ ଵିସ୍ତରେଣ ନରର୍ଷଭ ॥ 2 ॥
ୟଦା ତୁ ଦୁଂଦୁଭିଂ ନାମ ଦାନଵଂ ମହିଷାକୃତିମ୍ ।
ପରିକାଲୟତେ ଵାଲୀ ମଲୟଂ ପ୍ରତି ପର୍ଵତମ୍ ॥ 3 ॥
ତଦା ଵିଵେଶ ମହିଷୋ ମଲୟସ୍ୟ ଗୁହାଂ ପ୍ରତି ।
ଵିଵେଶ ଵାଲୀ ତତ୍ରାପି ମଲୟଂ ତଜ୍ଜିଘାଂସୟା ॥ 4 ॥
ତତୋଽହଂ ତତ୍ର ନିକ୍ଷିପ୍ତୋ ଗୁହାଦ୍ଵାରି ଵିନୀତଵତ୍ ।
ନ ଚ ନିଷ୍କ୍ରାମତେ ଵାଲୀ ତଦା ସଂଵତ୍ସରେ ଗତେ ॥ 5 ॥
ତତଃ କ୍ଷତଜଵେଗେନ ଆପୁପୂରେ ତଦା ବିଲମ୍ ।
ତଦହଂ ଵିସ୍ମିତୋ ଦୃଷ୍ଟ୍ଵା ଭ୍ରାତୃଶୋକଵିଷାର୍ଦିତଃ ॥ 6 ॥
ଅଥାଽହଂ କୃତବୁଦ୍ଧିସ୍ତୁ ସୁଵ୍ୟକ୍ତଂ ନିହତୋ ଗୁରୁଃ ।
ଶିଲା ପର୍ଵତସଂକାଶା ବିଲଦ୍ଵାରି ମୟା କୃତା ॥ 7 ॥
ଅଶକ୍ନୁଵ ନ୍ନିଷ୍କ୍ରମିତୁଂ ମହିଷୋ ଵିନଶେଦିତି ।
ତତୋଽହମାଗାଂ କିଷ୍କିଂଧାଂ ନିରାଶସ୍ତସ୍ୟ ଜୀଵିତେ ॥ 8 ॥
ରାଜ୍ୟଂ ଚ ସୁମହତ୍ପ୍ରାପ୍ୟ ତାରୟା ରୁମୟା ସହ ।
ମିତ୍ରୈଶ୍ଚ ସହିତସ୍ତତ୍ର ଵସାମି ଵିଗତଜ୍ଵରଃ ॥ 9 ॥
ଆଜଗାମ ତତୋ ଵାଲୀ ହତ୍ଵା ତଂ ଦାନଵର୍ଷଭମ୍ ।
ତତୋଽହମଦଦାଂ ରାଜ୍ୟଂ ଗୌରଵାଦ୍ଭୟୟଂତ୍ରିତଃ ॥ 10 ॥
ସ ମାଂ ଜିଘାଂସୁର୍ଦୁଷ୍ଟାତ୍ମା ଵାଲୀ ପ୍ରଵ୍ୟଥିତେଂଦ୍ରିୟଃ ।
ପରିକାଲୟତେ କ୍ରୋଧାଦ୍ଧାଵଂତଂ ସଚିଵୈସ୍ସହ ॥ 11 ॥
ତତୋଽହଂ ଵାଲିନା ତେନ ସାଽନୁବଦ୍ଧଃ ପ୍ରଧାଵିତଃ ।
ନଦୀଶ୍ଚ ଵିଵିଧାଃ ପଶ୍ୟନ୍ଵନାନି ନଗରାଣି ଚ ॥ 12 ॥
ଆଦର୍ଶତଲସଂକାଶା ତତୋ ଵୈ ପୃଥିଵୀ ମୟା ।
ଅଲାତଚକ୍ରପ୍ରତିମା ଦୃଷ୍ଟା ଗୋଷ୍ପଦଵତ୍ତଦା ॥ 13 ॥
ପୂର୍ଵାଂ ଦିଶଂ ତତୋ ଗତ୍ଵା ପଶ୍ୟାମି ଵିଵିଧାନ୍ ଦ୍ରୁମାନ୍ ।
ପର୍ଵତନ୍ଶ୍ଚ ନଦୀ ରମ୍ୟାସ୍ସରାଂସି ଵିଵିଧାନି ଚ ॥ 14 ॥
ଉଦୟଂ ତତ୍ର ପଶ୍ୟାମି ପର୍ଵତଂ ଧାତୁମଂଡିତମ୍ ।
କ୍ଷୀରୋଦଂ ସାଗରଂ ଚୈଵ ନିତ୍ୟମପ୍ସରସାଲୟମ୍ ॥ 15 ॥
ପରିକାଲୟମାନସ୍ତୁ ଵାଲିନାଽଭିଦ୍ରୁତ ସ୍ତଦା ।
ପୁନରାଵୃତ୍ୟ ସହସା ପ୍ରସ୍ଥିତୋଽହଂ ତଦା ଵିଭୋ ॥ 16 ॥
ପୁନରାଵର୍ତମାନସ୍ତୁ ଵାଲିନାଽଭିଦ୍ରୁତୋଦ୍ରୁତମ୍ ।
ଦିଶସ୍ତସ୍ୟାସ୍ତତୋ ଭୂୟଃ ପ୍ରସ୍ଥିତୋ ଦକ୍ଷିଣାଂ ଦିଶମ୍ ।
ଵିଂଧ୍ୟପାଦପସଂକୀର୍ଣାଂ ଚଂଦନଦ୍ରୁମଶୋଭିତାମ୍ ॥ 17 ॥
ଦ୍ରୁମଶୈଲାଂସ୍ତତଃ ପଶ୍ୟନ୍ଭୂୟୋ ଦକ୍ଷିଣତୋଽପରାମ୍ ।
ପଶ୍ଚିମାଂ ଚ ଦିଶଂ ପ୍ରାପ୍ତା ଵାଲିନା ସମଭିଦ୍ରୁତଃ ॥ 18 ॥
ସଂପଶ୍ୟନ୍ଵିଵିଧାଂଦେଶାନସ୍ତଂ ଚ ଗିରିସତ୍ତମମ୍ ।
ପ୍ରାପ୍ୟ ଚାସ୍ତଂ ଗିରିଶ୍ରେଷ୍ଠମୁତ୍ତରାଂ ସଂପ୍ରଧାଵିତଃ ॥ 19 ॥
ହିମଵଂତଂ ଚ ମେରୁଂ ଚ ସମୁଦ୍ରଂ ଚ ତଥୋତ୍ତରମ୍ ।
ୟଦା ନ ଵିଂଦଂ ଶରଣଂ ଵାଲିନା ସମଭିଦ୍ରୁତଃ ॥ 20 ॥
ତଦା ମାଂ ବୁଦ୍ଧିସଂପନ୍ନୋ ହନୂମାନ୍ଵାକ୍ୟମବ୍ରଵୀତ୍ ।
ଇଦାନୀଂ ମେ ସ୍ମୃତଂ ରାଜନ୍ୟଥା ଵାଲୀ ହରୀଶ୍ଵରଃ ॥ 21 ॥
ମତଂଗେନ ତଦା ଶପ୍ତୋ ହ୍ୟସ୍ମିନ୍ନାଶ୍ରମମଂଡଲେ ।
ପ୍ରଵିଶେଦ୍ୟଦି ଵୈ ଵାଲୀ ମୂର୍ଧାଽସ୍ୟ ଶତଧା ଭଵେତ୍ ॥ 22 ॥
ତତ୍ର ଵାସସ୍ସୁଖୋଽସ୍ମାକଂ ନିରୁଦ୍ଵିଗ୍ନୋ ଭଵିଷ୍ୟତି ।
ତତଃ ପର୍ଵତମାସାଦ୍ୟ ଋଷ୍ୟମୂକଂ ନୃପାତ୍ମଜ ॥ 23 ॥
ନ ଵିଵେଶ ତଦା ଵାଲୀ ମତଂଗସ୍ୟ ଭୟାତ୍ତଦା ।
ଏଵଂ ମୟା ତଦା ରାଜନ୍ପ୍ରତ୍ୟକ୍ଷମୁପଲକ୍ଷିତମ୍ ॥ 24 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ କିଷ୍କିଂଧାକାଂଡେ ଷଟ୍ଚତ୍ଵାରିଂଶସ୍ସର୍ଗଃ ॥
