શ્રીમદ્વાલ્મીકીય રામાયણે કિષ્કિંધાકાંડમ્ ।
અથ ષટ્ચત્વારિંશસ્સર્ગઃ ।
ગતેષુ વાનરેંદ્રેષુ રામસ્સુગ્રીવમબ્રવીત્ ।
કથં ભવાન્વિજાનીતે સર્વં વૈ મંડલં ભુવઃ ॥ 1 ॥
સુગ્રીવસ્તુ તતો રામમુવાચ પ્રણતાત્મવાન્ ।
શ્રૂયતાં સર્વમાખ્યાસ્યે વિસ્તરેણ નરર્ષભ ॥ 2 ॥
યદા તુ દુંદુભિં નામ દાનવં મહિષાકૃતિમ્ ।
પરિકાલયતે વાલી મલયં પ્રતિ પર્વતમ્ ॥ 3 ॥
તદા વિવેશ મહિષો મલયસ્ય ગુહાં પ્રતિ ।
વિવેશ વાલી તત્રાપિ મલયં તજ્જિઘાંસયા ॥ 4 ॥
તતોઽહં તત્ર નિક્ષિપ્તો ગુહાદ્વારિ વિનીતવત્ ।
ન ચ નિષ્ક્રામતે વાલી તદા સંવત્સરે ગતે ॥ 5 ॥
તતઃ ક્ષતજવેગેન આપુપૂરે તદા બિલમ્ ।
તદહં વિસ્મિતો દૃષ્ટ્વા ભ્રાતૃશોકવિષાર્દિતઃ ॥ 6 ॥
અથાઽહં કૃતબુદ્ધિસ્તુ સુવ્યક્તં નિહતો ગુરુઃ ।
શિલા પર્વતસંકાશા બિલદ્વારિ મયા કૃતા ॥ 7 ॥
અશક્નુવ ન્નિષ્ક્રમિતું મહિષો વિનશેદિતિ ।
તતોઽહમાગાં કિષ્કિંધાં નિરાશસ્તસ્ય જીવિતે ॥ 8 ॥
રાજ્યં ચ સુમહત્પ્રાપ્ય તારયા રુમયા સહ ।
મિત્રૈશ્ચ સહિતસ્તત્ર વસામિ વિગતજ્વરઃ ॥ 9 ॥
આજગામ તતો વાલી હત્વા તં દાનવર્ષભમ્ ।
તતોઽહમદદાં રાજ્યં ગૌરવાદ્ભયયંત્રિતઃ ॥ 10 ॥
સ માં જિઘાંસુર્દુષ્ટાત્મા વાલી પ્રવ્યથિતેંદ્રિયઃ ।
પરિકાલયતે ક્રોધાદ્ધાવંતં સચિવૈસ્સહ ॥ 11 ॥
તતોઽહં વાલિના તેન સાઽનુબદ્ધઃ પ્રધાવિતઃ ।
નદીશ્ચ વિવિધાઃ પશ્યન્વનાનિ નગરાણિ ચ ॥ 12 ॥
આદર્શતલસંકાશા તતો વૈ પૃથિવી મયા ।
અલાતચક્રપ્રતિમા દૃષ્ટા ગોષ્પદવત્તદા ॥ 13 ॥
પૂર્વાં દિશં તતો ગત્વા પશ્યામિ વિવિધાન્ દ્રુમાન્ ।
પર્વતન્શ્ચ નદી રમ્યાસ્સરાંસિ વિવિધાનિ ચ ॥ 14 ॥
ઉદયં તત્ર પશ્યામિ પર્વતં ધાતુમંડિતમ્ ।
ક્ષીરોદં સાગરં ચૈવ નિત્યમપ્સરસાલયમ્ ॥ 15 ॥
પરિકાલયમાનસ્તુ વાલિનાઽભિદ્રુત સ્તદા ।
પુનરાવૃત્ય સહસા પ્રસ્થિતોઽહં તદા વિભો ॥ 16 ॥
પુનરાવર્તમાનસ્તુ વાલિનાઽભિદ્રુતોદ્રુતમ્ ।
દિશસ્તસ્યાસ્તતો ભૂયઃ પ્રસ્થિતો દક્ષિણાં દિશમ્ ।
વિંધ્યપાદપસંકીર્ણાં ચંદનદ્રુમશોભિતામ્ ॥ 17 ॥
દ્રુમશૈલાંસ્તતઃ પશ્યન્ભૂયો દક્ષિણતોઽપરામ્ ।
પશ્ચિમાં ચ દિશં પ્રાપ્તા વાલિના સમભિદ્રુતઃ ॥ 18 ॥
સંપશ્યન્વિવિધાંદેશાનસ્તં ચ ગિરિસત્તમમ્ ।
પ્રાપ્ય ચાસ્તં ગિરિશ્રેષ્ઠમુત્તરાં સંપ્રધાવિતઃ ॥ 19 ॥
હિમવંતં ચ મેરું ચ સમુદ્રં ચ તથોત્તરમ્ ।
યદા ન વિંદં શરણં વાલિના સમભિદ્રુતઃ ॥ 20 ॥
તદા માં બુદ્ધિસંપન્નો હનૂમાન્વાક્યમબ્રવીત્ ।
ઇદાનીં મે સ્મૃતં રાજન્યથા વાલી હરીશ્વરઃ ॥ 21 ॥
મતંગેન તદા શપ્તો હ્યસ્મિન્નાશ્રમમંડલે ।
પ્રવિશેદ્યદિ વૈ વાલી મૂર્ધાઽસ્ય શતધા ભવેત્ ॥ 22 ॥
તત્ર વાસસ્સુખોઽસ્માકં નિરુદ્વિગ્નો ભવિષ્યતિ ।
તતઃ પર્વતમાસાદ્ય ઋષ્યમૂકં નૃપાત્મજ ॥ 23 ॥
ન વિવેશ તદા વાલી મતંગસ્ય ભયાત્તદા ।
એવં મયા તદા રાજન્પ્રત્યક્ષમુપલક્ષિતમ્ ॥ 24 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે કિષ્કિંધાકાંડે ષટ્ચત્વારિંશસ્સર્ગઃ ॥
