শ্রীমদ্বাল্মীকীয় রামাযণে কিষ্কিংধাকাংডম্ ।
অথ ষট্চত্বারিংশস্সর্গঃ ।
গতেষু বানরেংদ্রেষু রামস্সুগ্রীবমব্রবীত্ ।
কথং ভবান্বিজানীতে সর্বং বৈ মংডলং ভুবঃ ॥ 1 ॥
সুগ্রীবস্তু ততো রামমুবাচ প্রণতাত্মবান্ ।
শ্রূযতাং সর্বমাখ্য়াস্য়ে বিস্তরেণ নরর্ষভ ॥ 2 ॥
যদা তু দুংদুভিং নাম দানবং মহিষাকৃতিম্ ।
পরিকালযতে বালী মলয়ং প্রতি পর্বতম্ ॥ 3 ॥
তদা বিবেশ মহিষো মলযস্য় গুহাং প্রতি ।
বিবেশ বালী তত্রাপি মলয়ং তজ্জিঘাংসয়া ॥ 4 ॥
ততোঽহং তত্র নিক্ষিপ্তো গুহাদ্বারি বিনীতবত্ ।
ন চ নিষ্ক্রামতে বালী তদা সংবত্সরে গতে ॥ 5 ॥
ততঃ ক্ষতজবেগেন আপুপূরে তদা বিলম্ ।
তদহং বিস্মিতো দৃষ্ট্বা ভ্রাতৃশোকবিষার্দিতঃ ॥ 6 ॥
অথাঽহং কৃতবুদ্ধিস্তু সুব্যক্তং নিহতো গুরুঃ ।
শিলা পর্বতসংকাশা বিলদ্বারি ময়া কৃতা ॥ 7 ॥
অশক্নুব ন্নিষ্ক্রমিতুং মহিষো বিনশেদিতি ।
ততোঽহমাগাং কিষ্কিংধাং নিরাশস্তস্য় জীবিতে ॥ 8 ॥
রাজ্য়ং চ সুমহত্প্রাপ্য় তারয়া রুময়া সহ ।
মিত্রৈশ্চ সহিতস্তত্র বসামি বিগতজ্বরঃ ॥ 9 ॥
আজগাম ততো বালী হত্বা তং দানবর্ষভম্ ।
ততোঽহমদদাং রাজ্য়ং গৌরবাদ্ভযয়ংত্রিতঃ ॥ 10 ॥
স মাং জিঘাংসুর্দুষ্টাত্মা বালী প্রব্যথিতেংদ্রিয়ঃ ।
পরিকালযতে ক্রোধাদ্ধাবংতং সচিবৈস্সহ ॥ 11 ॥
ততোঽহং বালিনা তেন সাঽনুবদ্ধঃ প্রধাবিতঃ ।
নদীশ্চ বিবিধাঃ পশ্যন্বনানি নগরাণি চ ॥ 12 ॥
আদর্শতলসংকাশা ততো বৈ পৃথিবী ময়া ।
অলাতচক্রপ্রতিমা দৃষ্টা গোষ্পদবত্তদা ॥ 13 ॥
পূর্বাং দিশং ততো গত্বা পশ্য়ামি বিবিধান্ দ্রুমান্ ।
পর্বতন্শ্চ নদী রম্য়াস্সরাংসি বিবিধানি চ ॥ 14 ॥
উদয়ং তত্র পশ্য়ামি পর্বতং ধাতুমংডিতম্ ।
ক্ষীরোদং সাগরং চৈব নিত্যমপ্সরসালযম্ ॥ 15 ॥
পরিকালযমানস্তু বালিনাঽভিদ্রুত স্তদা ।
পুনরাবৃত্য় সহসা প্রস্থিতোঽহং তদা বিভো ॥ 16 ॥
পুনরাবর্তমানস্তু বালিনাঽভিদ্রুতোদ্রুতম্ ।
দিশস্তস্য়াস্ততো ভূয়ঃ প্রস্থিতো দক্ষিণাং দিশম্ ।
বিংধ্যপাদপসংকীর্ণাং চংদনদ্রুমশোভিতাম্ ॥ 17 ॥
দ্রুমশৈলাংস্ততঃ পশ্যন্ভূয়ো দক্ষিণতোঽপরাম্ ।
পশ্চিমাং চ দিশং প্রাপ্তা বালিনা সমভিদ্রুতঃ ॥ 18 ॥
সংপশ্যন্বিবিধাংদেশানস্তং চ গিরিসত্তমম্ ।
প্রাপ্য় চাস্তং গিরিশ্রেষ্ঠমুত্তরাং সংপ্রধাবিতঃ ॥ 19 ॥
হিমবংতং চ মেরুং চ সমুদ্রং চ তথোত্তরম্ ।
যদা ন বিংদং শরণং বালিনা সমভিদ্রুতঃ ॥ 20 ॥
তদা মাং বুদ্ধিসংপন্নো হনূমান্বাক্যমব্রবীত্ ।
ইদানীং মে স্মৃতং রাজন্যথা বালী হরীশ্বরঃ ॥ 21 ॥
মতংগেন তদা শপ্তো হ্যস্মিন্নাশ্রমমংডলে ।
প্রবিশেদ্যদি বৈ বালী মূর্ধাঽস্য় শতধা ভবেত্ ॥ 22 ॥
তত্র বাসস্সুখোঽস্মাকং নিরুদ্বিগ্নো ভবিষ্যতি ।
ততঃ পর্বতমাসাদ্য় ঋষ্যমূকং নৃপাত্মজ ॥ 23 ॥
ন বিবেশ তদা বালী মতংগস্য় ভয়াত্তদা ।
এবং ময়া তদা রাজন্প্রত্যক্ষমুপলক্ষিতম্ ॥ 24 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে কিষ্কিংধাকাংডে ষট্চত্বারিংশস্সর্গঃ ॥
