𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌷𑌟𑍍𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌗𑌤𑍇𑌷𑍁 𑌵𑌾𑌨𑌰𑍇𑌂𑌦𑍍𑌰𑍇𑌷𑍁 𑌰𑌾𑌮𑌸𑍍𑌸𑍁𑌗𑍍𑌰𑍀𑌵𑌮𑌬𑍍𑌰𑌵𑍀𑌤𑍍 ।
𑌕𑌥𑌂 𑌭𑌵𑌾𑌨𑍍𑌵𑌿𑌜𑌾𑌨𑍀𑌤𑍇 𑌸𑌰𑍍𑌵𑌂 𑌵𑍈 𑌮𑌂𑌡𑌲𑌂 𑌭𑍁𑌵𑌃 ॥ 1 ॥
𑌸𑍁𑌗𑍍𑌰𑍀𑌵𑌸𑍍𑌤𑍁 𑌤𑌤𑍋 𑌰𑌾𑌮𑌮𑍁𑌵𑌾𑌚 𑌪𑍍𑌰𑌣𑌤𑌾𑌤𑍍𑌮𑌵𑌾𑌨𑍍 ।
𑌶𑍍𑌰𑍂𑌯𑌤𑌾𑌂 𑌸𑌰𑍍𑌵𑌮𑌾𑌖𑍍𑌯𑌾𑌸𑍍𑌯𑍇 𑌵𑌿𑌸𑍍𑌤𑌰𑍇𑌣 𑌨𑌰𑌰𑍍𑌷𑌭 ॥ 2 ॥
𑌯𑌦𑌾 𑌤𑍁 𑌦𑍁𑌂𑌦𑍁𑌭𑌿𑌂 𑌨𑌾𑌮 𑌦𑌾𑌨𑌵𑌂 𑌮𑌹𑌿𑌷𑌾𑌕𑍃𑌤𑌿𑌮𑍍 ।
𑌪𑌰𑌿𑌕𑌾𑌲𑌯𑌤𑍇 𑌵𑌾𑌲𑍀 𑌮𑌲𑌯𑌂 𑌪𑍍𑌰𑌤𑌿 𑌪𑌰𑍍𑌵𑌤𑌮𑍍 ॥ 3 ॥
𑌤𑌦𑌾 𑌵𑌿𑌵𑍇𑌶 𑌮𑌹𑌿𑌷𑍋 𑌮𑌲𑌯𑌸𑍍𑌯 𑌗𑍁𑌹𑌾𑌂 𑌪𑍍𑌰𑌤𑌿 ।
𑌵𑌿𑌵𑍇𑌶 𑌵𑌾𑌲𑍀 𑌤𑌤𑍍𑌰𑌾𑌪𑌿 𑌮𑌲𑌯𑌂 𑌤𑌜𑍍𑌜𑌿𑌘𑌾𑌂𑌸𑌯𑌾 ॥ 4 ॥
𑌤𑌤𑍋𑌽𑌹𑌂 𑌤𑌤𑍍𑌰 𑌨𑌿𑌕𑍍𑌷𑌿𑌪𑍍𑌤𑍋 𑌗𑍁𑌹𑌾𑌦𑍍𑌵𑌾𑌰𑌿 𑌵𑌿𑌨𑍀𑌤𑌵𑌤𑍍 ।
𑌨 𑌚 𑌨𑌿𑌷𑍍𑌕𑍍𑌰𑌾𑌮𑌤𑍇 𑌵𑌾𑌲𑍀 𑌤𑌦𑌾 𑌸𑌂𑌵𑌤𑍍𑌸𑌰𑍇 𑌗𑌤𑍇 ॥ 5 ॥
𑌤𑌤𑌃 𑌕𑍍𑌷𑌤𑌜𑌵𑍇𑌗𑍇𑌨 𑌆𑌪𑍁𑌪𑍂𑌰𑍇 𑌤𑌦𑌾 𑌬𑌿𑌲𑌮𑍍 ।
𑌤𑌦𑌹𑌂 𑌵𑌿𑌸𑍍𑌮𑌿𑌤𑍋 𑌦𑍃𑌷𑍍𑌟𑍍𑌵𑌾 𑌭𑍍𑌰𑌾𑌤𑍃𑌶𑍋𑌕𑌵𑌿𑌷𑌾𑌰𑍍𑌦𑌿𑌤𑌃 ॥ 6 ॥
𑌅𑌥𑌾𑌽𑌹𑌂 𑌕𑍃𑌤𑌬𑍁𑌦𑍍𑌧𑌿𑌸𑍍𑌤𑍁 𑌸𑍁𑌵𑍍𑌯𑌕𑍍𑌤𑌂 𑌨𑌿𑌹𑌤𑍋 𑌗𑍁𑌰𑍁𑌃 ।
𑌶𑌿𑌲𑌾 𑌪𑌰𑍍𑌵𑌤𑌸𑌂𑌕𑌾𑌶𑌾 𑌬𑌿𑌲𑌦𑍍𑌵𑌾𑌰𑌿 𑌮𑌯𑌾 𑌕𑍃𑌤𑌾 ॥ ॥
𑌅𑌶𑌕𑍍𑌨𑍁𑌵 𑌨𑍍𑌨𑌿𑌷𑍍𑌕𑍍𑌰𑌮𑌿𑌤𑍁𑌂 𑌮𑌹𑌿𑌷𑍋 𑌵𑌿𑌨𑌶𑍇𑌦𑌿𑌤𑌿 ।
𑌤𑌤𑍋𑌽𑌹𑌮𑌾𑌗𑌾𑌂 𑌕𑌿𑌷𑍍𑌕𑌿𑌂𑌧𑌾𑌂 𑌨𑌿𑌰𑌾𑌶𑌸𑍍𑌤𑌸𑍍𑌯 𑌜𑍀𑌵𑌿𑌤𑍇 ॥ ॥
𑌰𑌾𑌜𑍍𑌯𑌂 𑌚 𑌸𑍁𑌮𑌹𑌤𑍍𑌪𑍍𑌰𑌾𑌪𑍍𑌯 𑌤𑌾𑌰𑌯𑌾 𑌰𑍁𑌮𑌯𑌾 𑌸𑌹 ।
𑌮𑌿𑌤𑍍𑌰𑍈𑌶𑍍𑌚 𑌸𑌹𑌿𑌤𑌸𑍍𑌤𑌤𑍍𑌰 𑌵𑌸𑌾𑌮𑌿 𑌵𑌿𑌗𑌤𑌜𑍍𑌵𑌰𑌃 ॥ ॥
𑌆𑌜𑌗𑌾𑌮 𑌤𑌤𑍋 𑌵𑌾𑌲𑍀 𑌹𑌤𑍍𑌵𑌾 𑌤𑌂 𑌦𑌾𑌨𑌵𑌰𑍍𑌷𑌭𑌮𑍍 ।
𑌤𑌤𑍋𑌽𑌹𑌮𑌦𑌦𑌾𑌂 𑌰𑌾𑌜𑍍𑌯𑌂 𑌗𑍌𑌰𑌵𑌾𑌦𑍍𑌭𑌯𑌯𑌂𑌤𑍍𑌰𑌿𑌤𑌃 ॥ 10 ॥
𑌸 𑌮𑌾𑌂 𑌜𑌿𑌘𑌾𑌂𑌸𑍁𑌰𑍍𑌦𑍁𑌷𑍍𑌟𑌾𑌤𑍍𑌮𑌾 𑌵𑌾𑌲𑍀 𑌪𑍍𑌰𑌵𑍍𑌯𑌥𑌿𑌤𑍇𑌂𑌦𑍍𑌰𑌿𑌯𑌃 ।
𑌪𑌰𑌿𑌕𑌾𑌲𑌯𑌤𑍇 𑌕𑍍𑌰𑍋𑌧𑌾𑌦𑍍𑌧𑌾𑌵𑌂𑌤𑌂 𑌸𑌚𑌿𑌵𑍈𑌸𑍍𑌸𑌹 ॥ 11 ॥
𑌤𑌤𑍋𑌽𑌹𑌂 𑌵𑌾𑌲𑌿𑌨𑌾 𑌤𑍇𑌨 𑌸𑌾𑌽𑌨𑍁𑌬𑌦𑍍𑌧𑌃 𑌪𑍍𑌰𑌧𑌾𑌵𑌿𑌤𑌃 ।
𑌨𑌦𑍀𑌶𑍍𑌚 𑌵𑌿𑌵𑌿𑌧𑌾𑌃 𑌪𑌶𑍍𑌯𑌨𑍍𑌵𑌨𑌾𑌨𑌿 𑌨𑌗𑌰𑌾𑌣𑌿 𑌚 ॥ 12 ॥
𑌆𑌦𑌰𑍍𑌶𑌤𑌲𑌸𑌂𑌕𑌾𑌶𑌾 𑌤𑌤𑍋 𑌵𑍈 𑌪𑍃𑌥𑌿𑌵𑍀 𑌮𑌯𑌾 ।
𑌅𑌲𑌾𑌤𑌚𑌕𑍍𑌰𑌪𑍍𑌰𑌤𑌿𑌮𑌾 𑌦𑍃𑌷𑍍𑌟𑌾 𑌗𑍋𑌷𑍍𑌪𑌦𑌵𑌤𑍍𑌤𑌦𑌾 ॥ 13 ॥
𑌪𑍂𑌰𑍍𑌵𑌾𑌂 𑌦𑌿𑌶𑌂 𑌤𑌤𑍋 𑌗𑌤𑍍𑌵𑌾 𑌪𑌶𑍍𑌯𑌾𑌮𑌿 𑌵𑌿𑌵𑌿𑌧𑌾𑌨𑍍 𑌦𑍍𑌰𑍁𑌮𑌾𑌨𑍍 ।
𑌪𑌰𑍍𑌵𑌤𑌨𑍍𑌶𑍍𑌚 𑌨𑌦𑍀 𑌰𑌮𑍍𑌯𑌾𑌸𑍍𑌸𑌰𑌾𑌂𑌸𑌿 𑌵𑌿𑌵𑌿𑌧𑌾𑌨𑌿 𑌚 ॥ 14 ॥
𑌉𑌦𑌯𑌂 𑌤𑌤𑍍𑌰 𑌪𑌶𑍍𑌯𑌾𑌮𑌿 𑌪𑌰𑍍𑌵𑌤𑌂 𑌧𑌾𑌤𑍁𑌮𑌂𑌡𑌿𑌤𑌮𑍍 ।
𑌕𑍍𑌷𑍀𑌰𑍋𑌦𑌂 𑌸𑌾𑌗𑌰𑌂 𑌚𑍈𑌵 𑌨𑌿𑌤𑍍𑌯𑌮𑌪𑍍𑌸𑌰𑌸𑌾𑌲𑌯𑌮𑍍 ॥ 15 ॥
𑌪𑌰𑌿𑌕𑌾𑌲𑌯𑌮𑌾𑌨𑌸𑍍𑌤𑍁 𑌵𑌾𑌲𑌿𑌨𑌾𑌽𑌭𑌿𑌦𑍍𑌰𑍁𑌤 𑌸𑍍𑌤𑌦𑌾 ।
𑌪𑍁𑌨𑌰𑌾𑌵𑍃𑌤𑍍𑌯 𑌸𑌹𑌸𑌾 𑌪𑍍𑌰𑌸𑍍𑌥𑌿𑌤𑍋𑌽𑌹𑌂 𑌤𑌦𑌾 𑌵𑌿𑌭𑍋 ॥ 16 ॥
𑌪𑍁𑌨𑌰𑌾𑌵𑌰𑍍𑌤𑌮𑌾𑌨𑌸𑍍𑌤𑍁 𑌵𑌾𑌲𑌿𑌨𑌾𑌽𑌭𑌿𑌦𑍍𑌰𑍁𑌤𑍋𑌦𑍍𑌰𑍁𑌤𑌮𑍍 ।
𑌦𑌿𑌶𑌸𑍍𑌤𑌸𑍍𑌯𑌾𑌸𑍍𑌤𑌤𑍋 𑌭𑍂𑌯𑌃 𑌪𑍍𑌰𑌸𑍍𑌥𑌿𑌤𑍋 𑌦𑌕𑍍𑌷𑌿𑌣𑌾𑌂 𑌦𑌿𑌶𑌮𑍍 ।
𑌵𑌿𑌂𑌧𑍍𑌯𑌪𑌾𑌦𑌪𑌸𑌂𑌕𑍀𑌰𑍍𑌣𑌾𑌂 𑌚𑌂𑌦𑌨𑌦𑍍𑌰𑍁𑌮𑌶𑍋𑌭𑌿𑌤𑌾𑌮𑍍 ॥ 1 ॥
𑌦𑍍𑌰𑍁𑌮𑌶𑍈𑌲𑌾𑌂𑌸𑍍𑌤𑌤𑌃 𑌪𑌶𑍍𑌯𑌨𑍍𑌭𑍂𑌯𑍋 𑌦𑌕𑍍𑌷𑌿𑌣𑌤𑍋𑌽𑌪𑌰𑌾𑌮𑍍 ।
𑌪𑌶𑍍𑌚𑌿𑌮𑌾𑌂 𑌚 𑌦𑌿𑌶𑌂 𑌪𑍍𑌰𑌾𑌪𑍍𑌤𑌾 𑌵𑌾𑌲𑌿𑌨𑌾 𑌸𑌮𑌭𑌿𑌦𑍍𑌰𑍁𑌤𑌃 ॥ 1 ॥
𑌸𑌂𑌪𑌶𑍍𑌯𑌨𑍍𑌵𑌿𑌵𑌿𑌧𑌾𑌂𑌦𑍇𑌶𑌾𑌨𑌸𑍍𑌤𑌂 𑌚 𑌗𑌿𑌰𑌿𑌸𑌤𑍍𑌤𑌮𑌮𑍍 ।
𑌪𑍍𑌰𑌾𑌪𑍍𑌯 𑌚𑌾𑌸𑍍𑌤𑌂 𑌗𑌿𑌰𑌿𑌶𑍍𑌰𑍇𑌷𑍍𑌠𑌮𑍁𑌤𑍍𑌤𑌰𑌾𑌂 𑌸𑌂𑌪𑍍𑌰𑌧𑌾𑌵𑌿𑌤𑌃 ॥ 1 ॥
𑌹𑌿𑌮𑌵𑌂𑌤𑌂 𑌚 𑌮𑍇𑌰𑍁𑌂 𑌚 𑌸𑌮𑍁𑌦𑍍𑌰𑌂 𑌚 𑌤𑌥𑍋𑌤𑍍𑌤𑌰𑌮𑍍 ।
𑌯𑌦𑌾 𑌨 𑌵𑌿𑌂𑌦𑌂 𑌶𑌰𑌣𑌂 𑌵𑌾𑌲𑌿𑌨𑌾 𑌸𑌮𑌭𑌿𑌦𑍍𑌰𑍁𑌤𑌃 ॥ 20 ॥
𑌤𑌦𑌾 𑌮𑌾𑌂 𑌬𑍁𑌦𑍍𑌧𑌿𑌸𑌂𑌪𑌨𑍍𑌨𑍋 𑌹𑌨𑍂𑌮𑌾𑌨𑍍𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ।
𑌇𑌦𑌾𑌨𑍀𑌂 𑌮𑍇 𑌸𑍍𑌮𑍃𑌤𑌂 𑌰𑌾𑌜𑌨𑍍𑌯𑌥𑌾 𑌵𑌾𑌲𑍀 𑌹𑌰𑍀𑌶𑍍𑌵𑌰𑌃 ॥ 21 ॥
𑌮𑌤𑌂𑌗𑍇𑌨 𑌤𑌦𑌾 𑌶𑌪𑍍𑌤𑍋 𑌹𑍍𑌯𑌸𑍍𑌮𑌿𑌨𑍍𑌨𑌾𑌶𑍍𑌰𑌮𑌮𑌂𑌡𑌲𑍇 ।
𑌪𑍍𑌰𑌵𑌿𑌶𑍇𑌦𑍍𑌯𑌦𑌿 𑌵𑍈 𑌵𑌾𑌲𑍀 𑌮𑍂𑌰𑍍𑌧𑌾𑌽𑌸𑍍𑌯 𑌶𑌤𑌧𑌾 𑌭𑌵𑍇𑌤𑍍 ॥ 22 ॥
𑌤𑌤𑍍𑌰 𑌵𑌾𑌸𑌸𑍍𑌸𑍁𑌖𑍋𑌽𑌸𑍍𑌮𑌾𑌕𑌂 𑌨𑌿𑌰𑍁𑌦𑍍𑌵𑌿𑌗𑍍𑌨𑍋 𑌭𑌵𑌿𑌷𑍍𑌯𑌤𑌿 ।
𑌤𑌤𑌃 𑌪𑌰𑍍𑌵𑌤𑌮𑌾𑌸𑌾𑌦𑍍𑌯 𑌋𑌷𑍍𑌯𑌮𑍂𑌕𑌂 𑌨𑍃𑌪𑌾𑌤𑍍𑌮𑌜 ॥ 23 ॥
𑌨 𑌵𑌿𑌵𑍇𑌶 𑌤𑌦𑌾 𑌵𑌾𑌲𑍀 𑌮𑌤𑌂𑌗𑌸𑍍𑌯 𑌭𑌯𑌾𑌤𑍍𑌤𑌦𑌾 ।
𑌏𑌵𑌂 𑌮𑌯𑌾 𑌤𑌦𑌾 𑌰𑌾𑌜𑌨𑍍𑌪𑍍𑌰𑌤𑍍𑌯𑌕𑍍𑌷𑌮𑍁𑌪𑌲𑌕𑍍𑌷𑌿𑌤𑌮𑍍 ॥ 24 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌷𑌟𑍍𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ॥
