ശ്രീമദ്വാല്മീകീയ രാമായണേ കിഷ്കിംധാകാംഡമ് ।
അഥ ഏകോനഷഷ്ടിതമസ്സര്ഗഃ ।
തതസ്തദമൃതാസ്വാദം ഗൃധ്രരാജേന ഭാഷിതമ് ।
നിശമ്യ മുദിതാ ഹൃഷ്ടാസ്തേ വചഃ പ്ലവഗര്ഷഭാഃ ॥ 1 ॥
ജാംബവാന് വാനരശ്രേഷ്ഠസ്സഹ സർവൈഃ പ്ലവംഗമൈഃ ।
ഭൂതലാത്സഹസോത്ഥായ ഗൃധ്രരാജാനമബ്രവീത് ॥ 2 ॥
ക്വ സീതാ കേന വാ ദൃഷ്ടാ കോ വാ ഹരതി മൈഥിലീമ് ।
തദാഖ്യാതു ഭവാത്സർവം ഗതിര്ഭവ വനൌകസാമ് ॥ 3 ॥
കോ ദാശരഥി ബാണാനാം വജ്രവേഗനിപാതിനാമ് ।
സ്വയം ലക്ഷ്മണമുക്താനാം ന ചിംതയതി വിക്രമമ് ॥ 4 ॥
സ ഹരീന്പ്രീതിസംയുക്താന്സീതാശ്രുതിസമാഹിതാന് ।
പുനരാശ്വസയന്പ്രീതഃ ഇദം വചനമബ്രവീത് ॥ 5 ॥
ശ്രൂയതാമിഹ വൈദേഹ്യാ യഥാ മേ ഹരണം ശ്രുതമ് ।
യേന ചാപി മമാഽഖ്യാതം യത്ര വായതലോചനാ ॥ 6 ॥
അഹമസ്മിന്ഗിരൌ ദുര്ഗേ ബഹുയോജനമായതേ ।
ചിരാന്നിപതിതോ വൃദ്ധഃ ക്ഷീണപ്രാണപരാക്രമഃ ॥ 7 ॥
തം മാമേവം ഗതം പുത്രസ്സുപാര്ശ്വോനാമ നാമതഃ ।
ആഹാരേണ യഥാകാലം ബിഭര്തി പതതാം വരഃ ॥ 8 ॥
തീക്ഷ്ണകാമാസ്തു ഗംധർവാസ്തീക്ഷ്ണകോപാ ഭുജംഗമാഃ ।
മൃഗാണാം തു ഭയം തീക്ഷ്ണം തതസ്തീക്ഷ്ണക്ഷുധാ വയമ് ॥ 9 ॥
സ കദാചിത്ക്ഷുധാര്തസ്യ മമാഹാരാഭികാംക്ഷിണഃ ।
ഗതസൂര്യേഽഹനി പ്രാപ്തോ മമ പുത്രോ ഹ്യനാമിഷഃ ॥ 10 ॥
സ മാമാഹാരസംരോധാത്പീഡിതം പ്രീതിവര്ധനഃ ।
അനുമാന്യ യഥാതത്ത്വമിദം വചനമബ്രവീത് ॥ 11 ॥
അഹം താത യഥാകാലമാമിഷാര്ഥീ ഖമാപ്ലുതഃ ।
മഹേംദ്രസ്യ ഗിരേര്ദ്വാരമാവൃത്യ സുസമാസ്ഥിതഃ ॥ 12 ॥
തത്ര സത്ത്വസഹസ്രാണാം സാഗരാംതരചാരിണാമ് ।
പംഥാനമേകോഽധ്യവസം സന്നിരോദ്ധുമവാങ്മുഖഃ ॥ 13 ॥
തത്ര കശ്ചിന്മയാ ദൃഷ്ട സ്സൂര്യോദയസമപ്രഭാമ് ।
സ്ത്രിയമാദായ ഗച്ഛന്വൈ ഭിന്നാംജനചയപ്രഭഃ ॥ 14 ॥
സോഽഹമഭ്യവഹാരാര്ഥീ തൌ ദൃഷ്ട്വാ കൃതനിശ്ചയഃ ।
തേന സാമ്നാ വിനീതേന പംഥാനമഭിയാചിതഃ ॥ 15 ॥
ന ഹി സാമോപപന്നാനാം പ്രഹര്താ വിദ്യതേ ക്വചിത് ।
നീചേഷ്വപി ജനഃ കശ്ചിത്കിമംഗ ബത മദ്വിധഃ ॥ 16 ॥
സ യാതസ്തേജസാ വ്യോമ സംക്ഷിപന്നിവ വേഗതഃ ।
അഥാഽഹം ഖേചരൈര്ഭൂതൈരഭിഗമ്യ സഭാജിതഃ ॥ 17 ॥
ദിഷ്ട്യാ ജീവതി സീത ഇതി ഹി അബ്രുവന് മാം മഹര്ഷയഃ ।
കഥംചിത് സ കലത്രഃ അസൌ ഗതഃ തേ സ്വസ്തി അസംശയമ് ॥ 18 ॥
ഏവ മുക്തസ്തതോഽഹം തൈസ്സിദ്ധൈഃ പരമശോഭനൈഃ ।
സ ച മേ രാവണോ രാജാ രക്ഷസാം പ്രതിവേദിതഃ ॥ 19 ॥
ഹരംദാശരഥേര്ഭാര്യാം രാമസ്യ ജനകാത്മജാമ് ।
ഭ്രഷ്ടാഭരണകൌശേയാം ശോകവേഗപരാജിതാമ് ॥ 20 ॥
രാമലക്ഷ്മണയോര്നാമ ക്രോശംതീം മുക്തമൂര്ധജാമ് ।
ഏഷ കാലാത്യയസ്താവദിതി കാലവിദാം വരഃ ॥ 21 ॥
ഏതമര്ഥം സമഗ്രം മേ സുപാര്ശ്വഃ പ്രത്യവേദയത് ।
തച്ഛൃത്വാഽപി ഹി മേ ബുദ്ധിര്നാസീത്കാചിത്പരാക്രമേ ॥ 22 ॥
അപക്ഷോ ഹി കഥം പക്ഷീ കര്മ കിംചിദുപക്രമേ ।
യത്തു ശക്യം മയാ കര്തും വാഗ്ബുദ്ധിഗുണവര്തിനാ ॥ 23 ॥
ശ്രൂയതാം തത്പ്രവക്ഷ്യാമി ഭവതാം പൌരുഷാശ്രയമ് ।
വാങ്മതിഭ്യാം തു സർവേഷാം കരിഷ്യാമി പ്രിയം ഹി വഃ ॥ 24 ॥
യദ്ധി ദാശരഥേഃ കാര്യം മമ തന്നാത്ര സംശയഃ ।
തേ ഭവംതോ മതിശ്രേഷ്ഠാ ബലവംതോ മനസ്വിനഃ ॥ 25 ॥
പ്രേഷിതാഃ കപിരാജേന ദേവൈരപി ദുരാസദാഃ ।
രാമലക്ഷ്മണബാണാശ്ച നിശിതാഃ കംകപത്രിണഃ ॥ 26 ॥
ത്രയാണാമപി ലോകാനാം പര്യാപ്താസ്ത്രാണനിഗ്രഹേ ।
കാമം ഖലു ദശഗ്രീവ സ്തേജോബലസമന്വിതഃ ॥ 27 ॥
ഭവതാം തു സമര്ഥാനാം ന കിംചിദപി ദുഷ്കരമ് ।
തദലം കാലസംഗേന ക്രിയതാം ബുദ്ധിനിശ്ചയഃ ॥ 28 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ കിഷ്കിംധാകാംഡേ ഏകോനഷഷ്ടിതമസ്സര്ഗഃ ॥
