𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌏𑌕𑍋𑌨𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ।
𑌤𑌤𑌸𑍍𑌤𑌦𑌮𑍃𑌤𑌾𑌸𑍍𑌵𑌾𑌦𑌂 𑌗𑍃𑌧𑍍𑌰𑌰𑌾𑌜𑍇𑌨 𑌭𑌾𑌷𑌿𑌤𑌮𑍍 ।
𑌨𑌿𑌶𑌮𑍍𑌯 𑌮𑍁𑌦𑌿𑌤𑌾 𑌹𑍃𑌷𑍍𑌟𑌾𑌸𑍍𑌤𑍇 𑌵𑌚𑌃 𑌪𑍍𑌲𑌵𑌗𑌰𑍍𑌷𑌭𑌾𑌃 ॥ 1 ॥
𑌜𑌾𑌂𑌬𑌵𑌾𑌨𑍍 𑌵𑌾𑌨𑌰𑌶𑍍𑌰𑍇𑌷𑍍𑌠𑌸𑍍𑌸𑌹 𑌸𑌰𑍍𑌵𑍈𑌃 𑌪𑍍𑌲𑌵𑌂𑌗𑌮𑍈𑌃 ।
𑌭𑍂𑌤𑌲𑌾𑌤𑍍𑌸𑌹𑌸𑍋𑌤𑍍𑌥𑌾𑌯 𑌗𑍃𑌧𑍍𑌰𑌰𑌾𑌜𑌾𑌨𑌮𑌬𑍍𑌰𑌵𑍀𑌤𑍍 ॥ 2 ॥
𑌕𑍍𑌵 𑌸𑍀𑌤𑌾 𑌕𑍇𑌨 𑌵𑌾 𑌦𑍃𑌷𑍍𑌟𑌾 𑌕𑍋 𑌵𑌾 𑌹𑌰𑌤𑌿 𑌮𑍈𑌥𑌿𑌲𑍀𑌮𑍍 ।
𑌤𑌦𑌾𑌖𑍍𑌯𑌾𑌤𑍁 𑌭𑌵𑌾𑌤𑍍𑌸𑌰𑍍𑌵𑌂 𑌗𑌤𑌿𑌰𑍍𑌭𑌵 𑌵𑌨𑍌𑌕𑌸𑌾𑌮𑍍 ॥ 3 ॥
𑌕𑍋 𑌦𑌾𑌶𑌰𑌥𑌿 𑌬𑌾𑌣𑌾𑌨𑌾𑌂 𑌵𑌜𑍍𑌰𑌵𑍇𑌗𑌨𑌿𑌪𑌾𑌤𑌿𑌨𑌾𑌮𑍍 ।
𑌸𑍍𑌵𑌯𑌂 𑌲𑌕𑍍𑌷𑍍𑌮𑌣𑌮𑍁𑌕𑍍𑌤𑌾𑌨𑌾𑌂 𑌨 𑌚𑌿𑌂𑌤𑌯𑌤𑌿 𑌵𑌿𑌕𑍍𑌰𑌮𑌮𑍍 ॥ 4 ॥
𑌸 𑌹𑌰𑍀𑌨𑍍𑌪𑍍𑌰𑍀𑌤𑌿𑌸𑌂𑌯𑍁𑌕𑍍𑌤𑌾𑌨𑍍𑌸𑍀𑌤𑌾𑌶𑍍𑌰𑍁𑌤𑌿𑌸𑌮𑌾𑌹𑌿𑌤𑌾𑌨𑍍 ।
𑌪𑍁𑌨𑌰𑌾𑌶𑍍𑌵𑌸𑌯𑌨𑍍𑌪𑍍𑌰𑍀𑌤𑌃 𑌇𑌦𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 5 ॥
𑌶𑍍𑌰𑍂𑌯𑌤𑌾𑌮𑌿𑌹 𑌵𑍈𑌦𑍇𑌹𑍍𑌯𑌾 𑌯𑌥𑌾 𑌮𑍇 𑌹𑌰𑌣𑌂 𑌶𑍍𑌰𑍁𑌤𑌮𑍍 ।
𑌯𑍇𑌨 𑌚𑌾𑌪𑌿 𑌮𑌮𑌾𑌽𑌖𑍍𑌯𑌾𑌤𑌂 𑌯𑌤𑍍𑌰 𑌵𑌾𑌯𑌤𑌲𑍋𑌚𑌨𑌾 ॥ 6 ॥
𑌅𑌹𑌮𑌸𑍍𑌮𑌿𑌨𑍍𑌗𑌿𑌰𑍌 𑌦𑍁𑌰𑍍𑌗𑍇 𑌬𑌹𑍁𑌯𑍋𑌜𑌨𑌮𑌾𑌯𑌤𑍇 ।
𑌚𑌿𑌰𑌾𑌨𑍍𑌨𑌿𑌪𑌤𑌿𑌤𑍋 𑌵𑍃𑌦𑍍𑌧𑌃 𑌕𑍍𑌷𑍀𑌣𑌪𑍍𑌰𑌾𑌣𑌪𑌰𑌾𑌕𑍍𑌰𑌮𑌃 ॥ ॥
𑌤𑌂 𑌮𑌾𑌮𑍇𑌵𑌂 𑌗𑌤𑌂 𑌪𑍁𑌤𑍍𑌰𑌸𑍍𑌸𑍁𑌪𑌾𑌰𑍍𑌶𑍍𑌵𑍋𑌨𑌾𑌮 𑌨𑌾𑌮𑌤𑌃 ।
𑌆𑌹𑌾𑌰𑍇𑌣 𑌯𑌥𑌾𑌕𑌾𑌲𑌂 𑌬𑌿𑌭𑌰𑍍𑌤𑌿 𑌪𑌤𑌤𑌾𑌂 𑌵𑌰𑌃 ॥ ॥
𑌤𑍀𑌕𑍍𑌷𑍍𑌣𑌕𑌾𑌮𑌾𑌸𑍍𑌤𑍁 𑌗𑌂𑌧𑌰𑍍𑌵𑌾𑌸𑍍𑌤𑍀𑌕𑍍𑌷𑍍𑌣𑌕𑍋𑌪𑌾 𑌭𑍁𑌜𑌂𑌗𑌮𑌾𑌃 ।
𑌮𑍃𑌗𑌾𑌣𑌾𑌂 𑌤𑍁 𑌭𑌯𑌂 𑌤𑍀𑌕𑍍𑌷𑍍𑌣𑌂 𑌤𑌤𑌸𑍍𑌤𑍀𑌕𑍍𑌷𑍍𑌣𑌕𑍍𑌷𑍁𑌧𑌾 𑌵𑌯𑌮𑍍 ॥ ॥
𑌸 𑌕𑌦𑌾𑌚𑌿𑌤𑍍𑌕𑍍𑌷𑍁𑌧𑌾𑌰𑍍𑌤𑌸𑍍𑌯 𑌮𑌮𑌾𑌹𑌾𑌰𑌾𑌭𑌿𑌕𑌾𑌂𑌕𑍍𑌷𑌿𑌣𑌃 ।
𑌗𑌤𑌸𑍂𑌰𑍍𑌯𑍇𑌽𑌹𑌨𑌿 𑌪𑍍𑌰𑌾𑌪𑍍𑌤𑍋 𑌮𑌮 𑌪𑍁𑌤𑍍𑌰𑍋 𑌹𑍍𑌯𑌨𑌾𑌮𑌿𑌷𑌃 ॥ 10 ॥
𑌸 𑌮𑌾𑌮𑌾𑌹𑌾𑌰𑌸𑌂𑌰𑍋𑌧𑌾𑌤𑍍𑌪𑍀𑌡𑌿𑌤𑌂 𑌪𑍍𑌰𑍀𑌤𑌿𑌵𑌰𑍍𑌧𑌨𑌃 ।
𑌅𑌨𑍁𑌮𑌾𑌨𑍍𑌯 𑌯𑌥𑌾𑌤𑌤𑍍𑌤𑍍𑌵𑌮𑌿𑌦𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 11 ॥
𑌅𑌹𑌂 𑌤𑌾𑌤 𑌯𑌥𑌾𑌕𑌾𑌲𑌮𑌾𑌮𑌿𑌷𑌾𑌰𑍍𑌥𑍀 𑌖𑌮𑌾𑌪𑍍𑌲𑍁𑌤𑌃 ।
𑌮𑌹𑍇𑌂𑌦𑍍𑌰𑌸𑍍𑌯 𑌗𑌿𑌰𑍇𑌰𑍍𑌦𑍍𑌵𑌾𑌰𑌮𑌾𑌵𑍃𑌤𑍍𑌯 𑌸𑍁𑌸𑌮𑌾𑌸𑍍𑌥𑌿𑌤𑌃 ॥ 12 ॥
𑌤𑌤𑍍𑌰 𑌸𑌤𑍍𑌤𑍍𑌵𑌸𑌹𑌸𑍍𑌰𑌾𑌣𑌾𑌂 𑌸𑌾𑌗𑌰𑌾𑌂𑌤𑌰𑌚𑌾𑌰𑌿𑌣𑌾𑌮𑍍 ।
𑌪𑌂𑌥𑌾𑌨𑌮𑍇𑌕𑍋𑌽𑌧𑍍𑌯𑌵𑌸𑌂 𑌸𑌨𑍍𑌨𑌿𑌰𑍋𑌦𑍍𑌧𑍁𑌮𑌵𑌾𑌙𑍍𑌮𑍁𑌖𑌃 ॥ 13 ॥
𑌤𑌤𑍍𑌰 𑌕𑌶𑍍𑌚𑌿𑌨𑍍𑌮𑌯𑌾 𑌦𑍃𑌷𑍍𑌟 𑌸𑍍𑌸𑍂𑌰𑍍𑌯𑍋𑌦𑌯𑌸𑌮𑌪𑍍𑌰𑌭𑌾𑌮𑍍 ।
𑌸𑍍𑌤𑍍𑌰𑌿𑌯𑌮𑌾𑌦𑌾𑌯 𑌗𑌚𑍍𑌛𑌨𑍍𑌵𑍈 𑌭𑌿𑌨𑍍𑌨𑌾𑌂𑌜𑌨𑌚𑌯𑌪𑍍𑌰𑌭𑌃 ॥ 14 ॥
𑌸𑍋𑌽𑌹𑌮𑌭𑍍𑌯𑌵𑌹𑌾𑌰𑌾𑌰𑍍𑌥𑍀 𑌤𑍌 𑌦𑍃𑌷𑍍𑌟𑍍𑌵𑌾 𑌕𑍃𑌤𑌨𑌿𑌶𑍍𑌚𑌯𑌃 ।
𑌤𑍇𑌨 𑌸𑌾𑌮𑍍𑌨𑌾 𑌵𑌿𑌨𑍀𑌤𑍇𑌨 𑌪𑌂𑌥𑌾𑌨𑌮𑌭𑌿𑌯𑌾𑌚𑌿𑌤𑌃 ॥ 15 ॥
𑌨 𑌹𑌿 𑌸𑌾𑌮𑍋𑌪𑌪𑌨𑍍𑌨𑌾𑌨𑌾𑌂 𑌪𑍍𑌰𑌹𑌰𑍍𑌤𑌾 𑌵𑌿𑌦𑍍𑌯𑌤𑍇 𑌕𑍍𑌵𑌚𑌿𑌤𑍍 ।
𑌨𑍀𑌚𑍇𑌷𑍍𑌵𑌪𑌿 𑌜𑌨𑌃 𑌕𑌶𑍍𑌚𑌿𑌤𑍍𑌕𑌿𑌮𑌂𑌗 𑌬𑌤 𑌮𑌦𑍍𑌵𑌿𑌧𑌃 ॥ 16 ॥
𑌸 𑌯𑌾𑌤𑌸𑍍𑌤𑍇𑌜𑌸𑌾 𑌵𑍍𑌯𑍋𑌮 𑌸𑌂𑌕𑍍𑌷𑌿𑌪𑌨𑍍𑌨𑌿𑌵 𑌵𑍇𑌗𑌤𑌃 ।
𑌅𑌥𑌾𑌽𑌹𑌂 𑌖𑍇𑌚𑌰𑍈𑌰𑍍𑌭𑍂𑌤𑍈𑌰𑌭𑌿𑌗𑌮𑍍𑌯 𑌸𑌭𑌾𑌜𑌿𑌤𑌃 ॥ 1 ॥
𑌦𑌿𑌷𑍍𑌟𑍍𑌯𑌾 𑌜𑍀𑌵𑌤𑌿 𑌸𑍀𑌤 𑌇𑌤𑌿 𑌹𑌿 𑌅𑌬𑍍𑌰𑍁𑌵𑌨𑍍 𑌮𑌾𑌂 𑌮𑌹𑌰𑍍𑌷𑌯𑌃 ।
𑌕𑌥𑌂𑌚𑌿𑌤𑍍 𑌸 𑌕𑌲𑌤𑍍𑌰𑌃 𑌅𑌸𑍌 𑌗𑌤𑌃 𑌤𑍇 𑌸𑍍𑌵𑌸𑍍𑌤𑌿 𑌅𑌸𑌂𑌶𑌯𑌮𑍍 ॥ 1 ॥
𑌏𑌵 𑌮𑍁𑌕𑍍𑌤𑌸𑍍𑌤𑌤𑍋𑌽𑌹𑌂 𑌤𑍈𑌸𑍍𑌸𑌿𑌦𑍍𑌧𑍈𑌃 𑌪𑌰𑌮𑌶𑍋𑌭𑌨𑍈𑌃 ।
𑌸 𑌚 𑌮𑍇 𑌰𑌾𑌵𑌣𑍋 𑌰𑌾𑌜𑌾 𑌰𑌕𑍍𑌷𑌸𑌾𑌂 𑌪𑍍𑌰𑌤𑌿𑌵𑍇𑌦𑌿𑌤𑌃 ॥ 1 ॥
𑌹𑌰𑌂𑌦𑌾𑌶𑌰𑌥𑍇𑌰𑍍𑌭𑌾𑌰𑍍𑌯𑌾𑌂 𑌰𑌾𑌮𑌸𑍍𑌯 𑌜𑌨𑌕𑌾𑌤𑍍𑌮𑌜𑌾𑌮𑍍 ।
𑌭𑍍𑌰𑌷𑍍𑌟𑌾𑌭𑌰𑌣𑌕𑍌𑌶𑍇𑌯𑌾𑌂 𑌶𑍋𑌕𑌵𑍇𑌗𑌪𑌰𑌾𑌜𑌿𑌤𑌾𑌮𑍍 ॥ 20 ॥
𑌰𑌾𑌮𑌲𑌕𑍍𑌷𑍍𑌮𑌣𑌯𑍋𑌰𑍍𑌨𑌾𑌮 𑌕𑍍𑌰𑍋𑌶𑌂𑌤𑍀𑌂 𑌮𑍁𑌕𑍍𑌤𑌮𑍂𑌰𑍍𑌧𑌜𑌾𑌮𑍍 ।
𑌏𑌷 𑌕𑌾𑌲𑌾𑌤𑍍𑌯𑌯𑌸𑍍𑌤𑌾𑌵𑌦𑌿𑌤𑌿 𑌕𑌾𑌲𑌵𑌿𑌦𑌾𑌂 𑌵𑌰𑌃 ॥ 21 ॥
𑌏𑌤𑌮𑌰𑍍𑌥𑌂 𑌸𑌮𑌗𑍍𑌰𑌂 𑌮𑍇 𑌸𑍁𑌪𑌾𑌰𑍍𑌶𑍍𑌵𑌃 𑌪𑍍𑌰𑌤𑍍𑌯𑌵𑍇𑌦𑌯𑌤𑍍 ।
𑌤𑌚𑍍𑌛𑍃𑌤𑍍𑌵𑌾𑌽𑌪𑌿 𑌹𑌿 𑌮𑍇 𑌬𑍁𑌦𑍍𑌧𑌿𑌰𑍍𑌨𑌾𑌸𑍀𑌤𑍍𑌕𑌾𑌚𑌿𑌤𑍍𑌪𑌰𑌾𑌕𑍍𑌰𑌮𑍇 ॥ 22 ॥
𑌅𑌪𑌕𑍍𑌷𑍋 𑌹𑌿 𑌕𑌥𑌂 𑌪𑌕𑍍𑌷𑍀 𑌕𑌰𑍍𑌮 𑌕𑌿𑌂𑌚𑌿𑌦𑍁𑌪𑌕𑍍𑌰𑌮𑍇 ।
𑌯𑌤𑍍𑌤𑍁 𑌶𑌕𑍍𑌯𑌂 𑌮𑌯𑌾 𑌕𑌰𑍍𑌤𑍁𑌂 𑌵𑌾𑌗𑍍𑌬𑍁𑌦𑍍𑌧𑌿𑌗𑍁𑌣𑌵𑌰𑍍𑌤𑌿𑌨𑌾 ॥ 23 ॥
𑌶𑍍𑌰𑍂𑌯𑌤𑌾𑌂 𑌤𑌤𑍍𑌪𑍍𑌰𑌵𑌕𑍍𑌷𑍍𑌯𑌾𑌮𑌿 𑌭𑌵𑌤𑌾𑌂 𑌪𑍌𑌰𑍁𑌷𑌾𑌶𑍍𑌰𑌯𑌮𑍍 ।
𑌵𑌾𑌙𑍍𑌮𑌤𑌿𑌭𑍍𑌯𑌾𑌂 𑌤𑍁 𑌸𑌰𑍍𑌵𑍇𑌷𑌾𑌂 𑌕𑌰𑌿𑌷𑍍𑌯𑌾𑌮𑌿 𑌪𑍍𑌰𑌿𑌯𑌂 𑌹𑌿 𑌵𑌃 ॥ 24 ॥
𑌯𑌦𑍍𑌧𑌿 𑌦𑌾𑌶𑌰𑌥𑍇𑌃 𑌕𑌾𑌰𑍍𑌯𑌂 𑌮𑌮 𑌤𑌨𑍍𑌨𑌾𑌤𑍍𑌰 𑌸𑌂𑌶𑌯𑌃 ।
𑌤𑍇 𑌭𑌵𑌂𑌤𑍋 𑌮𑌤𑌿𑌶𑍍𑌰𑍇𑌷𑍍𑌠𑌾 𑌬𑌲𑌵𑌂𑌤𑍋 𑌮𑌨𑌸𑍍𑌵𑌿𑌨𑌃 ॥ 25 ॥
𑌪𑍍𑌰𑍇𑌷𑌿𑌤𑌾𑌃 𑌕𑌪𑌿𑌰𑌾𑌜𑍇𑌨 𑌦𑍇𑌵𑍈𑌰𑌪𑌿 𑌦𑍁𑌰𑌾𑌸𑌦𑌾𑌃 ।
𑌰𑌾𑌮𑌲𑌕𑍍𑌷𑍍𑌮𑌣𑌬𑌾𑌣𑌾𑌶𑍍𑌚 𑌨𑌿𑌶𑌿𑌤𑌾𑌃 𑌕𑌂𑌕𑌪𑌤𑍍𑌰𑌿𑌣𑌃 ॥ 26 ॥
𑌤𑍍𑌰𑌯𑌾𑌣𑌾𑌮𑌪𑌿 𑌲𑍋𑌕𑌾𑌨𑌾𑌂 𑌪𑌰𑍍𑌯𑌾𑌪𑍍𑌤𑌾𑌸𑍍𑌤𑍍𑌰𑌾𑌣𑌨𑌿𑌗𑍍𑌰𑌹𑍇 ।
𑌕𑌾𑌮𑌂 𑌖𑌲𑍁 𑌦𑌶𑌗𑍍𑌰𑍀𑌵 𑌸𑍍𑌤𑍇𑌜𑍋𑌬𑌲𑌸𑌮𑌨𑍍𑌵𑌿𑌤𑌃 ॥ 2 ॥
𑌭𑌵𑌤𑌾𑌂 𑌤𑍁 𑌸𑌮𑌰𑍍𑌥𑌾𑌨𑌾𑌂 𑌨 𑌕𑌿𑌂𑌚𑌿𑌦𑌪𑌿 𑌦𑍁𑌷𑍍𑌕𑌰𑌮𑍍 ।
𑌤𑌦𑌲𑌂 𑌕𑌾𑌲𑌸𑌂𑌗𑍇𑌨 𑌕𑍍𑌰𑌿𑌯𑌤𑌾𑌂 𑌬𑍁𑌦𑍍𑌧𑌿𑌨𑌿𑌶𑍍𑌚𑌯𑌃 ॥ 2 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌏𑌕𑍋𑌨𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ॥
