śrīmadvālmīkīya rāmāyaṇē kiṣkindhākāṇḍam ।
atha ēkōnaṣaṣṭitamassargaḥ ।
tatastadamṛtāsvādaṃ gṛdhrarājēna bhāṣitam ।
niśamya muditā hṛṣṭāstē vachaḥ plavagarṣabhāḥ ॥ 1 ॥
jāmbavān vānaraśrēṣṭhassaha sarvaiḥ plavaṅgamaiḥ ।
bhūtalātsahasōtthāya gṛdhrarājānamabravīt ॥ 2 ॥
kva sītā kēna vā dṛṣṭā kō vā harati maithilīm ।
tadākhyātu bhavātsarvaṃ gatirbhava vanaukasām ॥ 3 ॥
kō dāśarathi bāṇānāṃ vajravēganipātinām ।
svayaṃ lakṣmaṇamuktānāṃ na chintayati vikramam ॥ 4 ॥
sa harīnprītisaṃyuktānsītāśrutisamāhitān ।
punarāśvasayanprītaḥ idaṃ vachanamabravīt ॥ 5 ॥
śrūyatāmiha vaidēhyā yathā mē haraṇaṃ śrutam ।
yēna chāpi mamā'khyātaṃ yatra vāyatalōchanā ॥ 6 ॥
ahamasmingirau durgē bahuyōjanamāyatē ।
chirānnipatitō vṛddhaḥ kṣīṇaprāṇaparākramaḥ ॥ 7 ॥
taṃ māmēvaṃ gataṃ putrassupārśvōnāma nāmataḥ ।
āhārēṇa yathākālaṃ bibharti patatāṃ varaḥ ॥ 8 ॥
tīkṣṇakāmāstu gandharvāstīkṣṇakōpā bhujaṅgamāḥ ।
mṛgāṇāṃ tu bhayaṃ tīkṣṇaṃ tatastīkṣṇakṣudhā vayam ॥ 9 ॥
sa kadāchitkṣudhārtasya mamāhārābhikāṅkṣiṇaḥ ।
gatasūryē'hani prāptō mama putrō hyanāmiṣaḥ ॥ 10 ॥
sa māmāhārasaṃrōdhātpīḍitaṃ prītivardhanaḥ ।
anumānya yathātattvamidaṃ vachanamabravīt ॥ 11 ॥
ahaṃ tāta yathākālamāmiṣārthī khamāplutaḥ ।
mahēndrasya girērdvāramāvṛtya susamāsthitaḥ ॥ 12 ॥
tatra sattvasahasrāṇāṃ sāgarāntarachāriṇām ।
panthānamēkō'dhyavasaṃ sannirōddhumavāṅmukhaḥ ॥ 13 ॥
tatra kaśchinmayā dṛṣṭa ssūryōdayasamaprabhām ।
striyamādāya gachChanvai bhinnāñjanachayaprabhaḥ ॥ 14 ॥
sō'hamabhyavahārārthī tau dṛṣṭvā kṛtaniśchayaḥ ।
tēna sāmnā vinītēna panthānamabhiyāchitaḥ ॥ 15 ॥
na hi sāmōpapannānāṃ prahartā vidyatē kvachit ।
nīchēṣvapi janaḥ kaśchitkimaṅga bata madvidhaḥ ॥ 16 ॥
sa yātastējasā vyōma saṅkṣipanniva vēgataḥ ।
athā'haṃ khēcharairbhūtairabhigamya sabhājitaḥ ॥ 17 ॥
diṣṭyā jīvati sīta iti hi abruvan māṃ maharṣayaḥ ।
kathañchit sa kalatraḥ asau gataḥ tē svasti asaṃśayam ॥ 18 ॥
ēva muktastatō'haṃ taissiddhaiḥ paramaśōbhanaiḥ ।
sa cha mē rāvaṇō rājā rakṣasāṃ prativēditaḥ ॥ 19 ॥
harandāśarathērbhāryāṃ rāmasya janakātmajām ।
bhraṣṭābharaṇakauśēyāṃ śōkavēgaparājitām ॥ 20 ॥
rāmalakṣmaṇayōrnāma krōśantīṃ muktamūrdhajām ।
ēṣa kālātyayastāvaditi kālavidāṃ varaḥ ॥ 21 ॥
ētamarthaṃ samagraṃ mē supārśvaḥ pratyavēdayat ।
tachChṛtvā'pi hi mē buddhirnāsītkāchitparākramē ॥ 22 ॥
apakṣō hi kathaṃ pakṣī karma kiñchidupakramē ।
yattu śakyaṃ mayā kartuṃ vāgbuddhiguṇavartinā ॥ 23 ॥
śrūyatāṃ tatpravakṣyāmi bhavatāṃ pauruṣāśrayam ।
vāṅmatibhyāṃ tu sarvēṣāṃ kariṣyāmi priyaṃ hi vaḥ ॥ 24 ॥
yaddhi dāśarathēḥ kāryaṃ mama tannātra saṃśayaḥ ।
tē bhavantō matiśrēṣṭhā balavantō manasvinaḥ ॥ 25 ॥
prēṣitāḥ kapirājēna dēvairapi durāsadāḥ ।
rāmalakṣmaṇabāṇāścha niśitāḥ kaṅkapatriṇaḥ ॥ 26 ॥
trayāṇāmapi lōkānāṃ paryāptāstrāṇanigrahē ।
kāmaṃ khalu daśagrīva stējōbalasamanvitaḥ ॥ 27 ॥
bhavatāṃ tu samarthānāṃ na kiñchidapi duṣkaram ।
tadalaṃ kālasaṅgēna kriyatāṃ buddhiniśchayaḥ ॥ 28 ॥
ityārṣē śrīmadrāmāyaṇē vālmīkīya ādikāvyē kiṣkindhākāṇḍē ēkōnaṣaṣṭitamassargaḥ ॥
