શ્રીમદ્વાલ્મીકીય રામાયણે કિષ્કિંધાકાંડમ્ ।
અથ એકોનષષ્ટિતમસ્સર્ગઃ ।
તતસ્તદમૃતાસ્વાદં ગૃધ્રરાજેન ભાષિતમ્ ।
નિશમ્ય મુદિતા હૃષ્ટાસ્તે વચઃ પ્લવગર્ષભાઃ ॥ 1 ॥
જાંબવાન્ વાનરશ્રેષ્ઠસ્સહ સર્વૈઃ પ્લવંગમૈઃ ।
ભૂતલાત્સહસોત્થાય ગૃધ્રરાજાનમબ્રવીત્ ॥ 2 ॥
ક્વ સીતા કેન વા દૃષ્ટા કો વા હરતિ મૈથિલીમ્ ।
તદાખ્યાતુ ભવાત્સર્વં ગતિર્ભવ વનૌકસામ્ ॥ 3 ॥
કો દાશરથિ બાણાનાં વજ્રવેગનિપાતિનામ્ ।
સ્વયં લક્ષ્મણમુક્તાનાં ન ચિંતયતિ વિક્રમમ્ ॥ 4 ॥
સ હરીન્પ્રીતિસંયુક્તાન્સીતાશ્રુતિસમાહિતાન્ ।
પુનરાશ્વસયન્પ્રીતઃ ઇદં વચનમબ્રવીત્ ॥ 5 ॥
શ્રૂયતામિહ વૈદેહ્યા યથા મે હરણં શ્રુતમ્ ।
યેન ચાપિ મમાઽખ્યાતં યત્ર વાયતલોચના ॥ 6 ॥
અહમસ્મિન્ગિરૌ દુર્ગે બહુયોજનમાયતે ।
ચિરાન્નિપતિતો વૃદ્ધઃ ક્ષીણપ્રાણપરાક્રમઃ ॥ 7 ॥
તં મામેવં ગતં પુત્રસ્સુપાર્શ્વોનામ નામતઃ ।
આહારેણ યથાકાલં બિભર્તિ પતતાં વરઃ ॥ 8 ॥
તીક્ષ્ણકામાસ્તુ ગંધર્વાસ્તીક્ષ્ણકોપા ભુજંગમાઃ ।
મૃગાણાં તુ ભયં તીક્ષ્ણં તતસ્તીક્ષ્ણક્ષુધા વયમ્ ॥ 9 ॥
સ કદાચિત્ક્ષુધાર્તસ્ય મમાહારાભિકાંક્ષિણઃ ।
ગતસૂર્યેઽહનિ પ્રાપ્તો મમ પુત્રો હ્યનામિષઃ ॥ 10 ॥
સ મામાહારસંરોધાત્પીડિતં પ્રીતિવર્ધનઃ ।
અનુમાન્ય યથાતત્ત્વમિદં વચનમબ્રવીત્ ॥ 11 ॥
અહં તાત યથાકાલમામિષાર્થી ખમાપ્લુતઃ ।
મહેંદ્રસ્ય ગિરેર્દ્વારમાવૃત્ય સુસમાસ્થિતઃ ॥ 12 ॥
તત્ર સત્ત્વસહસ્રાણાં સાગરાંતરચારિણામ્ ।
પંથાનમેકોઽધ્યવસં સન્નિરોદ્ધુમવાઙ્મુખઃ ॥ 13 ॥
તત્ર કશ્ચિન્મયા દૃષ્ટ સ્સૂર્યોદયસમપ્રભામ્ ।
સ્ત્રિયમાદાય ગચ્છન્વૈ ભિન્નાંજનચયપ્રભઃ ॥ 14 ॥
સોઽહમભ્યવહારાર્થી તૌ દૃષ્ટ્વા કૃતનિશ્ચયઃ ।
તેન સામ્ના વિનીતેન પંથાનમભિયાચિતઃ ॥ 15 ॥
ન હિ સામોપપન્નાનાં પ્રહર્તા વિદ્યતે ક્વચિત્ ।
નીચેષ્વપિ જનઃ કશ્ચિત્કિમંગ બત મદ્વિધઃ ॥ 16 ॥
સ યાતસ્તેજસા વ્યોમ સંક્ષિપન્નિવ વેગતઃ ।
અથાઽહં ખેચરૈર્ભૂતૈરભિગમ્ય સભાજિતઃ ॥ 17 ॥
દિષ્ટ્યા જીવતિ સીત ઇતિ હિ અબ્રુવન્ માં મહર્ષયઃ ।
કથંચિત્ સ કલત્રઃ અસૌ ગતઃ તે સ્વસ્તિ અસંશયમ્ ॥ 18 ॥
એવ મુક્તસ્તતોઽહં તૈસ્સિદ્ધૈઃ પરમશોભનૈઃ ।
સ ચ મે રાવણો રાજા રક્ષસાં પ્રતિવેદિતઃ ॥ 19 ॥
હરંદાશરથેર્ભાર્યાં રામસ્ય જનકાત્મજામ્ ।
ભ્રષ્ટાભરણકૌશેયાં શોકવેગપરાજિતામ્ ॥ 20 ॥
રામલક્ષ્મણયોર્નામ ક્રોશંતીં મુક્તમૂર્ધજામ્ ।
એષ કાલાત્યયસ્તાવદિતિ કાલવિદાં વરઃ ॥ 21 ॥
એતમર્થં સમગ્રં મે સુપાર્શ્વઃ પ્રત્યવેદયત્ ।
તચ્છૃત્વાઽપિ હિ મે બુદ્ધિર્નાસીત્કાચિત્પરાક્રમે ॥ 22 ॥
અપક્ષો હિ કથં પક્ષી કર્મ કિંચિદુપક્રમે ।
યત્તુ શક્યં મયા કર્તું વાગ્બુદ્ધિગુણવર્તિના ॥ 23 ॥
શ્રૂયતાં તત્પ્રવક્ષ્યામિ ભવતાં પૌરુષાશ્રયમ્ ।
વાઙ્મતિભ્યાં તુ સર્વેષાં કરિષ્યામિ પ્રિયં હિ વઃ ॥ 24 ॥
યદ્ધિ દાશરથેઃ કાર્યં મમ તન્નાત્ર સંશયઃ ।
તે ભવંતો મતિશ્રેષ્ઠા બલવંતો મનસ્વિનઃ ॥ 25 ॥
પ્રેષિતાઃ કપિરાજેન દેવૈરપિ દુરાસદાઃ ।
રામલક્ષ્મણબાણાશ્ચ નિશિતાઃ કંકપત્રિણઃ ॥ 26 ॥
ત્રયાણામપિ લોકાનાં પર્યાપ્તાસ્ત્રાણનિગ્રહે ।
કામં ખલુ દશગ્રીવ સ્તેજોબલસમન્વિતઃ ॥ 27 ॥
ભવતાં તુ સમર્થાનાં ન કિંચિદપિ દુષ્કરમ્ ।
તદલં કાલસંગેન ક્રિયતાં બુદ્ધિનિશ્ચયઃ ॥ 28 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે કિષ્કિંધાકાંડે એકોનષષ્ટિતમસ્સર્ગઃ ॥
