শ্রীমদ্বাল্মীকীয় রামাযণে কিষ্কিংধাকাংডম্ ।
অথ চত্বারিংশস্সর্গঃ ।
অথ রাজা সমৃদ্ধার্থস্সুগ্রীবঃ প্লবগেশ্বরঃ ।
উবাচ নরশার্দূলং রামং পরবলার্দনম্ ॥ 1 ॥
আগতা বিনিবিষ্টাশ্চ বলিনঃ কামরূপিণঃ ।
বানরা বারণেংদ্রভাঃ যে মদ্বিষযবাসিনঃ ॥ 2 ॥
ত ইমে বহুবিক্রাংতৈর্হরিভির্ভীমবিক্রমৈঃ ।
আগতা বানরা ঘোরা দৈত্যদানবসন্নিভাঃ ॥ 3 ॥
খ্য়াতকর্মাপদানাশ্চ বলবংতো জিতক্লমাঃ ।
পরাক্রমেষু বিখ্য়াতা ব্যবসায়েষু চোত্তমাঃ ॥ 4 ॥
পৃথিব্য়ংবুচরা রাম নানানগনিবাসিনঃ ।
কোট্যগ্রশ ইমে প্রাপ্তা বানরাস্তব কিংকরাঃ ॥ 5 ॥
নিদেশবর্তিনস্সর্বে সর্বে গুরুহিতে রতাঃ ।
অভিপ্রেতমনুষ্ঠাতুং তব শক্ষ্য়ংত্যরিংদম ॥ 6 ॥
ত ইমে বহুসাহস্রৈরনীকৈ ভীমবিক্রমৈঃ ।
আগতা বানরা ঘোরা দৈত্যদানবসন্নিভাঃ ॥ 7 ॥
যন্মন্যসে নরব্য়াঘ্র প্রাপ্তকালং তদুচ্যতাম্ ।
তত্সৈন্য়ং ত্বদ্বশে যুক্তমাজ্ঞাপয়িতুমর্হসি ॥ 8 ॥
কামমেষামিদং কার্য়ং বিদিতং মম তত্ত্বতঃ ।
তথাপি তু যথাতত্ত্বমাজ্ঞাপয়িতুমর্হসি ॥ 9 ॥
ইতি ব্রুবাণং সুগ্রীবং রামো দশরথাত্মজঃ ।
বাহুভ্য়াং সংপরিষ্বজ্য় ইদং বচনমব্রবীত্ ॥ 10 ॥
জ্ঞাযতাং মম বৈদেহী যদি জীবতি বা ন বা ।
স চ দেশো মহাপ্রাজ্ঞ যস্মিন্বসতি রাবণঃ ॥ 11 ॥
অধিগম্য় তু বৈদেহীং নিলয়ং রাবণস্য় চ ।
প্রাপ্তকালং বিধাস্য়ামি তস্মিন্কালে সহ ত্বয়া ॥ 12 ॥
নাহমস্মিন্ প্রভুঃ কার্য়ে বানরেশ ন লক্ষ্মণঃ ।
ত্বমস্য় হেতুঃ কার্যস্য় প্রভুশ্চ প্লবগেশ্বর ॥ 13 ॥
ত্বমেবাঽজ্ঞাপয় বিভো মম কার্যবিনিশ্চযম্ ।
ত্বং হি জানাসি যত্কার্য়ং মম বীর ন সংশয়ঃ ॥ 14 ॥
সুহৃদ্বিতীয়ো বিক্রাংতঃ প্রাজ্ঞঃ কালবিশেষবিত্ ।
ভবানস্মধ্দিতে যুক্ত স্সুকৃতার্থোঽর্থবিত্তমঃ ॥ 15 ॥
এবমুক্তস্তু সুগ্রীবো বিনতং নাম যূথপম্ ।
অব্রবীদ্রামসান্নিধ্য়ে লক্ষ্মণস্য় চ ধীমতঃ ॥ 16 ॥
শৈলাভং মেঘনির্ঘোষমূর্জিতং প্লবগেশ্বরঃ ।
সোমসূর্য়াত্মজৈ স্সার্ধং বানরৈর্বানরোত্তম ॥ 17 ॥
দেশকালনয়ৈর্য়ুক্তঃ কার্য়া কার্যবিনিশ্চয়ে ।
বৃতশ্শতসহশ্রেণ বানরাণাং তরস্বিনাম্ ॥ 18 ॥
অধিগচ্ছ দিশং পূর্বাং সশৈলবনকাননাম্ ।
তত্র সীতাং চ বৈদেহীং নিলয়ং রাবণস্য় চ ॥ 19 ॥
মার্গধ্বং গিরিশৃংগেষু বনেষু চ নদীষু চ ।
নদীং ভাগীরথীং রম্য়াং সরয়ূং কৌশিকীং তথা ॥ 20 ॥
কালিংদীং যমুনাং রম্য়াং যামুনং চ মহাগিরিম্ ।
সরস্বতীং চ সিংধুং চ শোণং মণিনিভোদকম্ ॥ 21 ॥
মহীং কালমহীং চৈব শৈলকাননশোভিতাম্ ।
ব্রহ্মমালান্বিদেহাংশ্চ মালবান্কালিকোসলান্ ॥ 22 ॥
মাগধাংশ্চ মহাগ্রামান্পুংড্রাংন্বংগাং স্তথৈব চ ।
পত্তনং কোশকারাণাং ভূমিং চ রজতাকরাম্ ॥ 23 ॥
সর্বমেতদ্বিচেতব্য়ং মৃগযদ্ভিস্ততস্ততঃ ।
রামস্য় দয়িতাং ভার্য়াং সীতাং দশরথস্নুষাম্ ॥ 24 ॥
সমুদ্রমবগাঢাংশ্চ পর্বতান্পত্তনানি চ ।
মংদরস্য় চ যে কোটিং সংশ্রিতাঃ কেচিদাযতাম্ ॥ 25 ॥
কর্ণপ্রাবরণাশ্চৈব তথা চাপ্য়োষ্ঠকর্ণকাঃ ।
ঘোরলোহমুখাশ্চৈব জবনাশ্চৈকপাদকাঃ ॥ 26 ॥
অক্ষয়া বলবংতশ্চ পুরুষাঃ পুরুষাদকাঃ ।
কিরাতাঃ কর্ণ চূডাশ্চ হেমাংগাঃ প্রিযদর্শনাঃ ॥ 27 ॥
আমমীনাশনাস্তত্র কিরাতা দ্বীপবাসিনঃ ।
অংতর্জলচরা ঘোরা নরব্য়াঘ্রা ইতি শৃতাঃ ॥ 28 ॥
এতেষামাশ্রয়াস্সর্বে বিচেয়াঃ কাবনৌকসঃ ।
গিরিভির্য়ে চ গম্য়ংতে প্লবনেন প্লবেন চ ॥ 29 ॥
রত্নবংতং যবদ্বীপং সপ্তরাজ্য়োপশোভিতম্ ।
সুবর্ণরূপ্যকং চৈব সুবর্ণাকরমংডিতম্ ॥ 30 ॥
যবদ্বীপমতিক্রম্য় শিশিরো নাম পর্বতঃ ।
দিবং স্পৃশতি শৃংগেণ দেবদানবসেবিতঃ ॥ 31 ॥
এতেষাং গিরিদুর্গেষু প্রপাতেষু বনেষু চ ।
মার্গধ্বং সহিতাস্সর্বে রামপত্নীং যশস্বিনীম্ ॥ 32 ॥
ততো রক্তজলং শোণমগাধং শীঘ্রগামিনম্ ।
গত্বা পারং সমুদ্রস্য় সিদ্ধচারণসেবিতম্ ॥ 33 ॥
তস্য় তীর্থেষু রম্য়েষু বিচিত্রেষু বনেষু চ ।
রাবণ স্সহ বৈদেহ্য়া মার্গিতব্যস্ততস্ততঃ ॥ 34 ॥
তত স্সমুদ্রদ্বীপাংশ্চ সুভীমাংদ্রষ্টুমর্হথ ।
ঊর্মিমংতং সমুদ্রং চ ক্রোশংতমনিলোদ্ধতম্ ॥ 35 ॥
তত্রাসুরা মহাকায়াশ্ছায়াং গৃহ্ণংতি নিত্যশঃ ।
ব্রহ্মণা সমনুজ্ঞাতা দীর্ঘকালং বুভুক্ষিতাঃ ॥ 36 ॥
তং কালমেঘপ্রতিমং মহোরগনিষেবিতম্ ।
অভিগম্য় মহানাদং তীর্থেনৈব মহোদধিম্ ॥ 37 ॥
ততো রক্তজলং ভীমং লোহিতং নাম সাগরম্ ।
গত্বা প্রেক্ষ্যথ তাং চৈব বৃহতীং কূটশাল্মলীম্ ॥ 38 ॥
গৃহং চ বৈনতেযস্য় নানারত্নবিভূষিতম্ ।
তত্র কৈলাসসংকাশং বিহিতং বিশ্বকর্মণা ॥ 39 ॥
তত্র শৈলনিভা ভীমা মংদেহা নাম রাক্ষসাঃ ।
শৈলশৃংগেষু লংবংতে নানারূপা ভয়াবহাঃ ॥ 40 ॥
তে পতংতি জলে নিত্য়ং সূর্যস্য়োদযনং প্রতি ।
নিহতা ব্রহ্মতেজোভিরহন্যহনি রাক্ষসাঃ ॥ 41 ॥
অভিতপ্তাশ্চ সূর্য়েণ লংবংতে স্ম পুনঃ পুনঃ ।
ততঃ পাংডুরমেঘাভং ক্ষীরোদং নাম সাগরম্ ॥ 42 ॥
গত্বা দ্রক্ষ্যথ দুর্ধর্ষা মুক্তাহারমিবোর্মিভিঃ ।
তস্য় মধ্য়ে মহান্ শ্বেতো ঋষভো নাম পর্বতঃ ॥ 43 ॥
দিব্যগংধৈঃ কুসুমিতৈ রাজিতৈশ্চ নগৈর্বৃতঃ ।
সরশ্চ রাজতৈঃ পদ্মৈর্জ্বলিতৈর্হেমকেসরৈঃ ॥ 44 ॥
নাম্না সুদর্শনং নাম রাজহংসৈস্সমাকুলম্ ।
বিবুধাশ্চারণা যক্ষাঃ কিন্নরাশ্চাপ্সরোগণাঃ ॥ 45 ॥
হৃষ্টাস্সমভিগচ্ছংতি নলিনীং তাং রিরংসবঃ ।
ক্ষীরোদং সমতিক্রম্য় তদা দ্রক্ষ্যথ বানরাঃ ॥ 46 ॥
জলোদং সাগরং শীঘ্রং সর্বভূতভয়াবহম্ ।
তত্র তত্কোপজং তেজঃ কৃতং হযমুখং মহত্ ॥ 47 ॥
অস্য়াহুস্তন্মহাবেগমোদনং সচরাচরম্ ।
তত্র বিক্রোশতাং নাদো ভূতানাং সাগরৌকসাম্ ॥ 48 ॥
শ্রূযতে চ সমর্থানাং দৃষ্ট্বা তদ্বডবামুখম্ ।
স্বাদূদস্য়োত্তরে দেশে যোজনানি ত্রয়োদশ ॥ 49 ॥
জাতরূপশিলো নাম মহান্কনকপর্বতঃ ।
তত্র চংদ্রপ্রতীকাশং পন্নগং ধরণীধরম্ ॥ 50 ॥
পদ্মপত্রবিশালাক্ষং ততো দ্রক্ষ্যথ বানরাঃ ।
আসীনং পর্বতস্য়াগ্রে সর্বভূতনমস্কৃতম্ ॥ 51 ॥
সহস্রশিরসং দেবমনংতং নীলবাসসম্ ।
ত্রিশিরাঃ কাংচনঃ কেতুস্তালস্তস্য় মহাত্মনঃ ॥ 52 ॥
স্থাপিতঃ পর্বতস্য়াগ্রে বিরাজতি সবেদিকঃ ।
পূর্বস্য়াং দিশি নির্মাণং কৃতং তত্ ত্রিদশেশ্বরৈঃ ॥ 53 ॥
ততঃ পরং হেমময় শ্শ্রীমানুদযপর্বতঃ ।
তস্য় কোটির্দিবং স্পৃষ্ট্বা শতয়োজনমাযতা ॥ 54 ॥
জাতরূপময়ী দিব্য়া বিরাজতি সবেদিকা ।
সালৈস্তালৈস্তমালৈশ্চ কর্ণিকারৈশ্চ পুষ্পিতৈঃ ॥ 55 ॥
জাতরূপময়ৈর্দিব্য়ৈ শ্শোভতে সূর্যসন্নিভৈঃ ।
তত্র যোজনবিস্তারমুচ্ছ্রিতং দশয়োজনম্ ॥ 56 ॥
শৃংগং সৌমনসং নাম জাতরূপময়ং ধ্রুবম্ ।
তত্রপূর্বং পদং কৃত্বা পুরা বিষ্ণুস্ত্রিবিক্রমে ॥ 57 ॥
দ্বিতীয়ং শিখরে মেরোশ্চকার পুরুষোত্তমঃ ।
ত্তরেণ পরিক্রম্য় জংবূদ্বীপং দিবাকরঃ ॥ 58 ॥
দৃশ্য়ো ভবতি ভূয়িষ্ঠং শিখরং তন্মহোচ্ছ্রযম্ ।
তত্র বৈখানসা নাম বালখিল্য়া মহর্ষয়ঃ ॥ 59 ॥
প্রকাশমানা দৃশ্য়ংতে সূর্যবর্ণাস্তপস্বিনঃ ।
অয়ং সুদর্শনো দ্বীপঃ পুরো যস্য় প্রকাশতে ॥ 60 ॥
যস্মিং স্তেজশ্চ চক্ষুশ্চ সর্বপ্রাণভৃতামপি ।
শৈলস্য় তস্য় শৃংগেষু কংদরেষু বনেষু চ ॥ 61 ॥
রাবণস্সহ বৈদেহ্য়া মার্গিতব্যস্ততস্ততঃ ।
কাংচনস্য় চ শৈলস্য় সূর্যস্য় চ মহাত্মনঃ ॥ 62 ॥
আবিষ্টা তেজসা সংধ্য়া পূর্বা রক্তা প্রকাশতে ।
পূর্বমেতত্কৃতং দ্বারং পৃথিব্য়া ভুবনস্য় চ ॥ 63 ॥
সূর্যস্য়োদযনং চৈব পর্বা হ্য়েষা দিগুচ্যতে ।
তস্য় শৈলস্য় পৃষ্ঠেষু নির্ঝরেষু গুহাসু চ ॥ 64 ॥
রাবণ স্সহ বৈদেহ্য়া মার্গিতব্যস্ততস্ততঃ ।
ততঃ পরমগম্য়া স্য়াদ্দিক্পূর্বা ত্রিদশাবৃতা ॥ 65 ॥
রহিতা চংদ্রসূর্য়াভ্য়ামদৃশ্য়া তিমিরাবৃতা ।
শৈলেষু তেষু সর্বেষু কংদরেষু বনেষু চ ॥ 66 ॥
যে চ নোক্তা ময়া দেশা বিচেয়া তেষু জানকী ।
এতাবদ্বানরৈশ্শক্য়ং গংতুং বানরপুংগবাঃ ॥ 67 ॥
অভাস্করমমর্য়াদং ন জানীমস্ততঃ পরম্ ।
অধিগম্য় তু বৈদেহীং নিলয়ং রাবণস্য় চ ॥ 68 ॥
মাসে পূর্ণে নিবর্তধ্বমুদয়ং প্রাপ্য় পর্বতম্ ।
ঊর্ধ্বং মাসান্ন বস্তব্য়ং বসন্বধ্য়ো ভবেন্মম ॥ 69 ॥
সিদ্ধার্থাস্সন্নিবর্তধ্বমধিগম্য় তু মৈথিলীম্ ।
মহেংদ্রকাংতাং বনষংডমংডিতাং দিশং চরিত্বা নিপুণেন বানরাঃ ।
অবাপ্য় সীতাং রঘুবংশজপ্রিয়াং ততো নিবৃত্তাস্সুখিনো ভবিষ্যথ ॥ 70 ॥
ইত্য়ার্ষে শ্রীমদ্রামাযণে বাল্মীকীয় আদিকাব্য়ে কিষ্কিংধাকাংডে চত্বারিংশস্সর্গঃ ॥
