ଶ୍ରୀମଦ୍ଵାଲ୍ମୀକୀୟ ରାମାୟଣେ କିଷ୍କିଂଧାକାଂଡମ୍ ।
ଅଥ ସପ୍ତଷଷ୍ଟିତମସ୍ସର୍ଗଃ ।
ତଂ ଦୃଷ୍ଟ୍ଵା ଜୃଂଭମାଣଂ ତେ କ୍ରମିତୁଂ ଶତୟୋଜନମ୍ ।
ଵୀର୍ୟେଣାପୂର୍ୟମାଣଂ ଚ ସହସା ଵାନରୋତ୍ତମମ୍ ॥ 1 ॥
ସହସା ଶୋକମୁତ୍ସୃଜ୍ୟ ପ୍ରହର୍ଷେଣ ସମନ୍ଵିତାଃ ।
ଵିନେଦୁସ୍ତୁଷ୍ଟୁଵୁଶ୍ଚାପି ହନୂମଂତଂ ମହାବଲମ୍ ॥ 2 ॥
ପ୍ରହୃଷ୍ଟା ଵିସ୍ମିତାଶ୍ଚୈଵ ଵୀକ୍ଷଂତେ ସ୍ମ ସମଂତତଃ ।
ତ୍ରିଵିକ୍ରମକୃତୋତ୍ସାହଂ ନାରାୟଣମିଵ ପ୍ରଜାଃ ॥ 3 ॥
ସଂସ୍ତୂୟମାନୋ ହନୁମାନ୍ଵ୍ୟଵର୍ଧତ ମହାବଲଃ ।
ସମାଵିଧ୍ୟ ଚ ଲାଂଗୂଲଂ ହର୍ଷାଦ୍ବଲମୁପେୟିଵାନ୍ ॥ 4 ॥
ତସ୍ୟ ସଂସ୍ତୂୟମାନସ୍ୟ ସର୍ଵୈର୍ଵାନରପୁଂଗଵୈଃ ।
ତେଜସାପୂର୍ୟମାଣସ୍ୟ ରୂପମାସୀଦନୁତ୍ତମମ୍ ॥ 5 ॥
ୟଥା ଵିଜୃଂଭତେ ସିଂହୋ ଵିଵୃଦ୍ଧୋ ଗିରିଗହ୍ଵରେ ।
ମାରୁତସ୍ୟୌରସଃ ପୁତ୍ରସ୍ତଥା ସଂପ୍ରତି ଜୃଂଭତେ ॥ 6 ॥
ଅଶୋଭତ ମୁଖଂ ତସ୍ୟ ଜୃଂଭମାଣସ୍ୟ ଧୀମତଃ ।
ଅଂବରୀଷମିଵାଽଦୀପ୍ତଂ ଵିଧୂମ ଇଵ ପାଵକଃ ॥ 7 ॥
ହରୀଣାମୁତ୍ଥିତୋ ମଧ୍ୟାତ୍ସଂପ୍ରହୃଷ୍ଟତନୂରୁହଃ ।
ଅଭିଵାଦ୍ୟ ହରୀନ୍ଵୃଦ୍ଧାନ୍ହନୁମାନିଦମବ୍ରଵୀତ୍ ॥ 8 ॥
ଅରୁଜତ୍ସର୍ଵତାଗ୍ରାଣି ହୁତାଶନସଖୋଽନିଲଃ ।
ବଲଵାନପ୍ରମେୟଶ୍ଚ ଵାୟୁରାକାଶଗୋଚରଃ ॥ 9 ॥
ତସ୍ୟାହଂ ଶୀଘ୍ରଵେଗସ୍ୟ ଶୀଘ୍ରଗସ୍ୟ ମହାତ୍ମନଃ ।
ମାରୁତସ୍ୟୌରସଃ ପୁତ୍ରଃ ପ୍ଲଵନେନାସ୍ମି ତତ୍ସମଃ ॥ 10 ॥
ଉତ୍ସହେୟଂ ହି ଵିସ୍ତୀର୍ଣମାଲିଖଂତମିଵାଂବରମ୍ ।
ମେରୁଂ ଗିରିମସଂଗେନ ପରିଗଂତୁଂ ସହସ୍ରଶଃ ॥ 11 ॥
ବାହୁଵେଗପ୍ରଣୁନ୍ନେନ ସାଗରେଣାହମୁତ୍ସହେ ।
ସମାପ୍ଲାଵୟିତୁଂ ଲୋକଂ ସପର୍ଵତନଦୀହ୍ରଦମ୍ ॥ 12 ॥
ମମୋରୁଜଂଘାଵେଗେନ ଭଵିଷ୍ୟତି ସମୁତ୍ଥିତଃ ।
ସମ୍ମୂର୍ଚ୍ଛିତମହାଗ୍ରାହସ୍ସମୁଦ୍ରୋ ଵରୁଣାଲୟଃ ॥ 13 ॥
ପନ୍ନଗାଶନମାକାଶେ ପତଂତଂ ପକ୍ଷିସେଵିତେ ।
ଵୈନତେୟମହଂ ଶକ୍ତଃ ପରିଗଂତୁଂ ସହସ୍ରଶଃ ॥ 14 ॥
ଉଦୟାତ୍ପ୍ରସ୍ଥିତଂ ଵାପି ଜ୍ଵଲଂତଂ ରଶ୍ମିମାଲିନମ୍ ।
ଅନସ୍ତମିତମାଦିତ୍ୟମଭିଗଂତୁଂ ସମୁତ୍ସହେ ॥ 15 ॥
ତତୋ ଭୂମିମସଂସ୍ପୃଶ୍ୟ ପୁନରାଗଂତୁମୁତ୍ସହେ ।
ପ୍ରଵେଗେନୈଵ ମହତା ଭୀମେନ ପ୍ଲଵଗର୍ଷଭାଃ ॥ 16 ॥
ଉତ୍ସହେୟମତିକ୍ରାଂତୁଂ ସର୍ଵାନାକାଶଗୋଚରାନ୍ ।
ସାଗରଂ କ୍ଷୋଭୟିଷ୍ୟାମି ଦାରୟିଷ୍ୟାମି ମେଦିନୀମ୍ ॥ 17 ॥
ପର୍ଵତାଂଶ୍ଚୂର୍ଣୟିଷ୍ୟାମି ପ୍ଲଵମାନଃ ପ୍ଲଵଂଗମାଃ ।
ହରିଷ୍ୟାମ୍ୟୂରୁଵେଗେନ ପ୍ଲଵମାନୋ ମହାର୍ଣଵମ୍ ॥ 18 ॥
ଲତାନାଂ ଵିଵିଧଂ ପୁଷ୍ପଂ ପାଦପାନାଂ ଚ ସର୍ଵଶଃ ।
ଅନୁୟାସ୍ୟଂତି ମାମଦ୍ୟ ପ୍ଲଵମାନଂ ଵିହାୟସା ॥ 19 ॥
ଭଵିଷ୍ୟତି ହି ମେ ପଂଥାସ୍ସ୍ଵାତେଃ ପଂଥା ଇଵାଂବରେ ।
ଚରଂତଂ ଘୋରମାକାଶମୁତ୍ପତିଷ୍ୟଂତମେଵ ଵା ॥ 20 ॥
ଦ୍ରକ୍ଷ୍ୟଂତି ନିପତିଷ୍ୟଂତଂ ଚ ସର୍ଵଭୂତାନି ଵାନରାଃ ।
ମହାମେରୁପ୍ରତୀକାଶଂ ମାଂ ଦ୍ରକ୍ଷ୍ୟଥ ଵାନରାଃ ॥ 21 ॥
ଦିଵମାଵୃତ୍ୟ ଗଚ୍ଛଂତଂ ଗ୍ରସମାନମିଵାଂବରମ୍ ।
ଵିଧମିଷ୍ୟାମି ଜୀମୂତାନ୍କଂପୟିଷ୍ୟାମି ପର୍ଵତାନ୍ ॥ 22 ॥
ସାଗରଂ ଶୋଷୟିଷ୍ୟାମି ପ୍ଲଵମାନସ୍ସମାହିତଃ ।
ଵୈନତେୟସ୍ୟ ୟା ଶକ୍ତିର୍ମମ ସା ମାରୁତସ୍ୟ ଵା ॥ 23 ॥
ଋତେ ସୁପର୍ଣରାଜାନଂ ମାରୁତଂ ଵା ମହାଜଵମ୍ ।
ନ ତଦ୍ଭୂତଂ ପ୍ରପଶ୍ୟାମି ୟନ୍ମାଂ ପ୍ଲୁତମନୁଵ୍ରଜେତ୍ ॥ 24 ॥
ନିମେଷାଂତରମାତ୍ରେଣ ନିରାଲଂବନମଂବରମ୍ ।
ସହସା ନିପତିଷ୍ୟାମି ଘନାଦ୍ଵିଦ୍ୟୁଦିଵୋତ୍ଥିତା ॥ 25 ॥
ଭଵିଷ୍ୟତି ହି ମେ ରୂପଂ ପ୍ଲଵମାନସ୍ୟ ସାଗରେ ।
ଵିଷ୍ଣୋର୍ଵିକ୍ରମମାଣସ୍ୟ ପୁରା ତ୍ରୀନ୍ଵିକ୍ରମାନିଵ ॥ 26 ॥
ବୁଦ୍ଧ୍ୟା ଚାହଂ ପ୍ରପଶ୍ୟାମି ମନଶ୍ଚେଷ୍ଟା ଚ ମେ ତଥା ।
ଅହଂ ଦ୍ରକ୍ଷ୍ୟାମି ଵୈଦେହୀଂ ପ୍ରମୋଦଧ୍ଵଂ ପ୍ଲଵଂଗମାଃ ॥ 27 ॥
ମାରୁତସ୍ୟ ସମୋ ଵେଗେ ଗରୁଡସ୍ୟ ସମୋ ଜଵେ ।
ଅୟୁତଂ ୟୋଜନାନାଂ ତୁ ଗମିଷ୍ୟାମୀତି ମେ ମତିଃ ॥ 28 ॥
ଵାସଵସ୍ୟ ସଵଜ୍ରସ୍ୟ ବ୍ରହ୍ମଣୋ ଵା ସ୍ଵୟଂଭୁଵଃ ।
ଵିକ୍ରମ୍ୟ ସହସା ହସ୍ତାଦମୃତଂ ତଦିହାନୟେ ॥ 29 ॥
ଲଂକାଂ ଵାପି ସମୁତ୍କ୍ଷିପ୍ୟ ଗଚ୍ଛେୟମିତି ମେ ମତିଃ ।
ତମେଵଂ ଵାନରଶ୍ରେଷ୍ଠଂ ଗର୍ଜଂତମମିତୌଜସମ୍ ॥ 30 ॥
ପ୍ରହୃଷ୍ଟା ହରୟସ୍ତତ୍ର ସମୁଦୈକ୍ଷଂତ ଵିସ୍ମିତାଃ ।
ତସ୍ୟ ତଦ୍ଵଚନଂ ଶ୍ରୁତ୍ଵା ଜ୍ଞାତୀନାଂ ଶୋକନାଶନମ୍ ॥ 31 ॥
ଉଵାଚ ପରିସଂହୃଷ୍ଟୋ ଜାଂବଵାନ୍ହରିସତ୍ତମଃ ।
ଵୀର କେସରିଣଃ ପୁତ୍ର ହନୁମାନ୍ମାରୁତାତ୍ମଜ ॥ 32 ॥
ଜ୍ଞାତୀନାଂ ଵିପୁଲଶ୍ଶୋକସ୍ତ୍ଵୟା ତାତ ପ୍ରଣାଶିତଃ ।
ତଵ କଲ୍ୟାଣରୁଚୟଃ କପିମୁଖ୍ୟାସ୍ସମାଗତାଃ ॥ 33 ॥
ମଂଗଲଂ କାର୍ୟସିଦ୍ଧ୍ୟର୍ଥଂ କରିଷ୍ୟଂତି ସମାହିତାଃ ।
ଋଷୀଣାଂ ଚ ପ୍ରସାଦେନ କପିଵୃଦ୍ଧମତେନ ଚ ॥ 34 ॥
ଗୁରୂଣାଂ ଚ ପ୍ରସାଦେନ ପ୍ଲଵସ୍ଵ ତ୍ଵଂ ମହାର୍ଣଵମ୍ ।
ସ୍ଥାସ୍ୟାମଶ୍ଚୈକପାଦେନ ୟାଵଦାଗମନଂ ତଵ ॥ 35 ॥
ତ୍ଵଦ୍ଗତାନି ଚ ସର୍ଵେଷାଂ ଜୀଵନାନି ଵନୌକସାମ୍ ।
ତତସ୍ତୁ ହରିଶାର୍ଦୂଲସ୍ତାନୁଵାଚ ଵନୌକସଃ ॥ 36 ॥
ନେୟଂ ମମ ମହୀ ଵେଗଂ ଲଂଘନେ ଧାରୟିଷ୍ୟତି ।
ଏତାନୀହ ନଗସ୍ୟାସ୍ୟ ଶିଲାସଂକଟଶାଲିନଃ ॥ 37 ॥
ଶିଖରାଣି ମହେଂଦ୍ରସ୍ୟ ସ୍ଥିରାଣି ସୁମହାଂତି ଚ ।
ଏଷୁ ଵେଗଂ କରିଷ୍ୟାମି ମହେଂଦ୍ରଶିଖରେଷ୍ଵହମ୍ ॥ 38 ॥
ନାନାଦ୍ରୁମଵିକୀର୍ଣେଷୁ ଧାତୁନିଷ୍ୟଂଦଶୋଭିଷୁ ।
ଏତାନି ମମ ନିଷ୍ପେଷଂ ପାଦୟୋଃ ପ୍ଲଵତାଂ ଵରାଃ ॥ 39 ॥
ପ୍ଲଵତୋ ଧାରୟିଷ୍ୟଂତି ୟୋଜନାନାମିତଶ୍ଶତମ୍ ।
ତତସ୍ତଂ ମାରୁତପ୍ରଖ୍ୟସ୍ସହରିର୍ମାରୁତାତ୍ମଜଃ ॥ 40 ॥
ଆରୁରୋହ ନଗଶ୍ରେଷ୍ଠଂ ମହେଂଦ୍ରମରିମର୍ଦନଃ ।
ଵୃତଂ ନାନାଵିଧୈଃ ଵୃକ୍ଷୈର୍ମୃଗସେଵିତଶାଦ୍ଵଲମ୍ ॥ 41 ॥
ଲତାକୁସୁମସଂବାଧଂ ନିତ୍ୟପୁଷ୍ପଫଲଦ୍ରୁମମ୍ ।
ସିଂହଶାର୍ଦୂଲଚରିତଂ ମତ୍ତମାତଂଗସେଵିତମ୍ ॥ 42 ॥
ମତ୍ତଦ୍ଵିଜଗଣୋଦ୍ଘୁଷ୍ଟଂ ସଲିଲୋତ୍ପୀଡସଂକୁଲମ୍ ।
ମହଦ୍ଭିରୁଚ୍ଛ୍ରିତଂ ଶୃଂଗୈର୍ମହେଂଦ୍ରଂ ସ ମହାବଲଃ ॥ 43 ॥
ଵିଚଚାର ହରିଶ୍ରେଷ୍ଠୋ ମହେଂଦ୍ରସମଵିକ୍ରମଃ ।
ପାଦାଭ୍ୟାଂ ପୀଡିତସ୍ତେନ ମହାଶୈଲୋ ମହାତ୍ମନା ॥ 44 ॥
ରରାଜ ସିଂହାଭିହତୋ ମହାନ୍ମତ୍ତ ଇଵ ଦ୍ଵିପଃ ।
ମୁମୋଚ ସଲିଲୋତ୍ପୀଡାନ୍ଵିପ୍ରକୀର୍ଣଶିଲୋଚ୍ଚୟଃ ॥ 45 ॥
ଵିତ୍ରସ୍ତମୃଗମାତଂଗଃ ପ୍ରକଂପିତମହାଦ୍ରୁମଃ ।
ନାନାଗଂଧର୍ଵମିଥୁନୈଃ ପାନସଂସର୍ଗକର୍କଶୈଃ ॥ 46 ॥
ଉତ୍ପତଦ୍ଭିଶ୍ଚ ଵିହଗୈର୍ଵିଦ୍ୟାଧରଗଣୈରପି ।
ତ୍ୟଜ୍ୟମାନମହାସାନୁସ୍ସନ୍ନିଲୀନମହୋରଗଃ ॥ 47 ॥
ଚଲଶୃଂଗଶିଲୋଦ୍ଘାତସ୍ତଦାଽଭୂତ୍ସ ମହାଗିରିଃ ।
ନିଶ୍ଶ୍ଵସଦ୍ଭିସ୍ତଦାଽର୍ତୈସ୍ତୁ ଭୁଜଂଗୈରର୍ଧନିଃସୃତୈଃ ॥ 48 ॥
ସପତାକ ଇଵାଭାତି ସ ତଦା ଧରଣୀଧରଃ ।
ଋଷିଭିସ୍ତ୍ରାସସଂଭ୍ରାଂତୈସ୍ତ୍ୟଜ୍ୟମାନଃ ଶିଲୋଚ୍ଚୟଃ ॥ 49 ॥
ସୀଦନ୍ମହତି କାଂତାରେ ସାର୍ଥହୀନ ଇଵାଧ୍ଵଗଃ ।
ସଵେଗଵାନ୍ ଵେଗସମାହିତାତ୍ମା ହରିପ୍ରଵୀରଃ ପରଵୀରହଂତା ।
ମନସ୍ସମାଧାୟ ମହାନୁଭାଵୋ ଜଗାମ ଲଂକାଂ ମନସା ମନସ୍ଵୀ ॥ 50 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ କିଷ୍କିଂଧାକାଂଡେ ସପ୍ତଷଷ୍ଟିତମସ୍ସର୍ଗଃ ॥
