ശ്രീമദ്വാല്മീകീയ രാമായണേ കിഷ്കിംധാകാംഡമ് ।
അഥ സപ്തഷഷ്ടിതമസ്സര്ഗഃ ।
തം ദൃഷ്ട്വാ ജൃംഭമാണം തേ ക്രമിതും ശതയോജനമ് ।
വീര്യേണാപൂര്യമാണം ച സഹസാ വാനരോത്തമമ് ॥ 1 ॥
സഹസാ ശോകമുത്സൃജ്യ പ്രഹര്ഷേണ സമന്വിതാഃ ।
വിനേദുസ്തുഷ്ടുവുശ്ചാപി ഹനൂമംതം മഹാബലമ് ॥ 2 ॥
പ്രഹൃഷ്ടാ വിസ്മിതാശ്ചൈവ വീക്ഷംതേ സ്മ സമംതതഃ ।
ത്രിവിക്രമകൃതോത്സാഹം നാരായണമിവ പ്രജാഃ ॥ 3 ॥
സംസ്തൂയമാനോ ഹനുമാന്വ്യവര്ധത മഹാബലഃ ।
സമാവിധ്യ ച ലാംഗൂലം ഹര്ഷാദ്ബലമുപേയിവാന് ॥ 4 ॥
തസ്യ സംസ്തൂയമാനസ്യ സർവൈർവാനരപുംഗവൈഃ ।
തേജസാപൂര്യമാണസ്യ രൂപമാസീദനുത്തമമ് ॥ 5 ॥
യഥാ വിജൃംഭതേ സിംഹോ വിവൃദ്ധോ ഗിരിഗഹ്വരേ ।
മാരുതസ്യൌരസഃ പുത്രസ്തഥാ സംപ്രതി ജൃംഭതേ ॥ 6 ॥
അശോഭത മുഖം തസ്യ ജൃംഭമാണസ്യ ധീമതഃ ।
അംബരീഷമിവാഽദീപ്തം വിധൂമ ഇവ പാവകഃ ॥ 7 ॥
ഹരീണാമുത്ഥിതോ മധ്യാത്സംപ്രഹൃഷ്ടതനൂരുഹഃ ।
അഭിവാദ്യ ഹരീന്വൃദ്ധാന്ഹനുമാനിദമബ്രവീത് ॥ 8 ॥
അരുജത്സർവതാഗ്രാണി ഹുതാശനസഖോഽനിലഃ ।
ബലവാനപ്രമേയശ്ച വായുരാകാശഗോചരഃ ॥ 9 ॥
തസ്യാഹം ശീഘ്രവേഗസ്യ ശീഘ്രഗസ്യ മഹാത്മനഃ ।
മാരുതസ്യൌരസഃ പുത്രഃ പ്ലവനേനാസ്മി തത്സമഃ ॥ 10 ॥
ഉത്സഹേയം ഹി വിസ്തീര്ണമാലിഖംതമിവാംബരമ് ।
മേരും ഗിരിമസംഗേന പരിഗംതും സഹസ്രശഃ ॥ 11 ॥
ബാഹുവേഗപ്രണുന്നേന സാഗരേണാഹമുത്സഹേ ।
സമാപ്ലാവയിതും ലോകം സപർവതനദീഹ്രദമ് ॥ 12 ॥
മമോരുജംഘാവേഗേന ഭവിഷ്യതി സമുത്ഥിതഃ ।
സമ്മൂര്ച്ഛിതമഹാഗ്രാഹസ്സമുദ്രോ വരുണാലയഃ ॥ 13 ॥
പന്നഗാശനമാകാശേ പതംതം പക്ഷിസേവിതേ ।
വൈനതേയമഹം ശക്തഃ പരിഗംതും സഹസ്രശഃ ॥ 14 ॥
ഉദയാത്പ്രസ്ഥിതം വാപി ജ്വലംതം രശ്മിമാലിനമ് ।
അനസ്തമിതമാദിത്യമഭിഗംതും സമുത്സഹേ ॥ 15 ॥
തതോ ഭൂമിമസംസ്പൃശ്യ പുനരാഗംതുമുത്സഹേ ।
പ്രവേഗേനൈവ മഹതാ ഭീമേന പ്ലവഗര്ഷഭാഃ ॥ 16 ॥
ഉത്സഹേയമതിക്രാംതും സർവാനാകാശഗോചരാന് ।
സാഗരം ക്ഷോഭയിഷ്യാമി ദാരയിഷ്യാമി മേദിനീമ് ॥ 17 ॥
പർവതാംശ്ചൂര്ണയിഷ്യാമി പ്ലവമാനഃ പ്ലവംഗമാഃ ।
ഹരിഷ്യാമ്യൂരുവേഗേന പ്ലവമാനോ മഹാര്ണവമ് ॥ 18 ॥
ലതാനാം വിവിധം പുഷ്പം പാദപാനാം ച സർവശഃ ।
അനുയാസ്യംതി മാമദ്യ പ്ലവമാനം വിഹായസാ ॥ 19 ॥
ഭവിഷ്യതി ഹി മേ പംഥാസ്സ്വാതേഃ പംഥാ ഇവാംബരേ ।
ചരംതം ഘോരമാകാശമുത്പതിഷ്യംതമേവ വാ ॥ 20 ॥
ദ്രക്ഷ്യംതി നിപതിഷ്യംതം ച സർവഭൂതാനി വാനരാഃ ।
മഹാമേരുപ്രതീകാശം മാം ദ്രക്ഷ്യഥ വാനരാഃ ॥ 21 ॥
ദിവമാവൃത്യ ഗച്ഛംതം ഗ്രസമാനമിവാംബരമ് ।
വിധമിഷ്യാമി ജീമൂതാന്കംപയിഷ്യാമി പർവതാന് ॥ 22 ॥
സാഗരം ശോഷയിഷ്യാമി പ്ലവമാനസ്സമാഹിതഃ ।
വൈനതേയസ്യ യാ ശക്തിര്മമ സാ മാരുതസ്യ വാ ॥ 23 ॥
ഋതേ സുപര്ണരാജാനം മാരുതം വാ മഹാജവമ് ।
ന തദ്ഭൂതം പ്രപശ്യാമി യന്മാം പ്ലുതമനുവ്രജേത് ॥ 24 ॥
നിമേഷാംതരമാത്രേണ നിരാലംബനമംബരമ് ।
സഹസാ നിപതിഷ്യാമി ഘനാദ്വിദ്യുദിവോത്ഥിതാ ॥ 25 ॥
ഭവിഷ്യതി ഹി മേ രൂപം പ്ലവമാനസ്യ സാഗരേ ।
വിഷ്ണോർവിക്രമമാണസ്യ പുരാ ത്രീന്വിക്രമാനിവ ॥ 26 ॥
ബുദ്ധ്യാ ചാഹം പ്രപശ്യാമി മനശ്ചേഷ്ടാ ച മേ തഥാ ।
അഹം ദ്രക്ഷ്യാമി വൈദേഹീം പ്രമോദധ്വം പ്ലവംഗമാഃ ॥ 27 ॥
മാരുതസ്യ സമോ വേഗേ ഗരുഡസ്യ സമോ ജവേ ।
അയുതം യോജനാനാം തു ഗമിഷ്യാമീതി മേ മതിഃ ॥ 28 ॥
വാസവസ്യ സവജ്രസ്യ ബ്രഹ്മണോ വാ സ്വയംഭുവഃ ।
വിക്രമ്യ സഹസാ ഹസ്താദമൃതം തദിഹാനയേ ॥ 29 ॥
ലംകാം വാപി സമുത്ക്ഷിപ്യ ഗച്ഛേയമിതി മേ മതിഃ ।
തമേവം വാനരശ്രേഷ്ഠം ഗര്ജംതമമിതൌജസമ് ॥ 30 ॥
പ്രഹൃഷ്ടാ ഹരയസ്തത്ര സമുദൈക്ഷംത വിസ്മിതാഃ ।
തസ്യ തദ്വചനം ശ്രുത്വാ ജ്ഞാതീനാം ശോകനാശനമ് ॥ 31 ॥
ഉവാച പരിസംഹൃഷ്ടോ ജാംബവാന്ഹരിസത്തമഃ ।
വീര കേസരിണഃ പുത്ര ഹനുമാന്മാരുതാത്മജ ॥ 32 ॥
ജ്ഞാതീനാം വിപുലശ്ശോകസ്ത്വയാ താത പ്രണാശിതഃ ।
തവ കല്യാണരുചയഃ കപിമുഖ്യാസ്സമാഗതാഃ ॥ 33 ॥
മംഗലം കാര്യസിദ്ധ്യര്ഥം കരിഷ്യംതി സമാഹിതാഃ ।
ഋഷീണാം ച പ്രസാദേന കപിവൃദ്ധമതേന ച ॥ 34 ॥
ഗുരൂണാം ച പ്രസാദേന പ്ലവസ്വ ത്വം മഹാര്ണവമ് ।
സ്ഥാസ്യാമശ്ചൈകപാദേന യാവദാഗമനം തവ ॥ 35 ॥
ത്വദ്ഗതാനി ച സർവേഷാം ജീവനാനി വനൌകസാമ് ।
തതസ്തു ഹരിശാര്ദൂലസ്താനുവാച വനൌകസഃ ॥ 36 ॥
നേയം മമ മഹീ വേഗം ലംഘനേ ധാരയിഷ്യതി ।
ഏതാനീഹ നഗസ്യാസ്യ ശിലാസംകടശാലിനഃ ॥ 37 ॥
ശിഖരാണി മഹേംദ്രസ്യ സ്ഥിരാണി സുമഹാംതി ച ।
ഏഷു വേഗം കരിഷ്യാമി മഹേംദ്രശിഖരേഷ്വഹമ് ॥ 38 ॥
നാനാദ്രുമവികീര്ണേഷു ധാതുനിഷ്യംദശോഭിഷു ।
ഏതാനി മമ നിഷ്പേഷം പാദയോഃ പ്ലവതാം വരാഃ ॥ 39 ॥
പ്ലവതോ ധാരയിഷ്യംതി യോജനാനാമിതശ്ശതമ് ।
തതസ്തം മാരുതപ്രഖ്യസ്സഹരിര്മാരുതാത്മജഃ ॥ 40 ॥
ആരുരോഹ നഗശ്രേഷ്ഠം മഹേംദ്രമരിമര്ദനഃ ।
വൃതം നാനാവിധൈഃ വൃക്ഷൈര്മൃഗസേവിതശാദ്വലമ് ॥ 41 ॥
ലതാകുസുമസംബാധം നിത്യപുഷ്പഫലദ്രുമമ് ।
സിംഹശാര്ദൂലചരിതം മത്തമാതംഗസേവിതമ് ॥ 42 ॥
മത്തദ്വിജഗണോദ്ഘുഷ്ടം സലിലോത്പീഡസംകുലമ് ।
മഹദ്ഭിരുച്ഛ്രിതം ശൃംഗൈര്മഹേംദ്രം സ മഹാബലഃ ॥ 43 ॥
വിചചാര ഹരിശ്രേഷ്ഠോ മഹേംദ്രസമവിക്രമഃ ।
പാദാഭ്യാം പീഡിതസ്തേന മഹാശൈലോ മഹാത്മനാ ॥ 44 ॥
രരാജ സിംഹാഭിഹതോ മഹാന്മത്ത ഇവ ദ്വിപഃ ।
മുമോച സലിലോത്പീഡാന്വിപ്രകീര്ണശിലോച്ചയഃ ॥ 45 ॥
വിത്രസ്തമൃഗമാതംഗഃ പ്രകംപിതമഹാദ്രുമഃ ।
നാനാഗംധർവമിഥുനൈഃ പാനസംസര്ഗകര്കശൈഃ ॥ 46 ॥
ഉത്പതദ്ഭിശ്ച വിഹഗൈർവിദ്യാധരഗണൈരപി ।
ത്യജ്യമാനമഹാസാനുസ്സന്നിലീനമഹോരഗഃ ॥ 47 ॥
ചലശൃംഗശിലോദ്ഘാതസ്തദാഽഭൂത്സ മഹാഗിരിഃ ।
നിശ്ശ്വസദ്ഭിസ്തദാഽര്തൈസ്തു ഭുജംഗൈരര്ധനിഃസൃതൈഃ ॥ 48 ॥
സപതാക ഇവാഭാതി സ തദാ ധരണീധരഃ ।
ഋഷിഭിസ്ത്രാസസംഭ്രാംതൈസ്ത്യജ്യമാനഃ ശിലോച്ചയഃ ॥ 49 ॥
സീദന്മഹതി കാംതാരേ സാര്ഥഹീന ഇവാധ്വഗഃ ।
സവേഗവാന് വേഗസമാഹിതാത്മാ ഹരിപ്രവീരഃ പരവീരഹംതാ ।
മനസ്സമാധായ മഹാനുഭാവോ ജഗാമ ലംകാം മനസാ മനസ്വീ ॥ 50 ॥
ഇത്യാര്ഷേ ശ്രീമദ്രാമായണേ വാല്മീകീയ ആദികാവ്യേ കിഷ്കിംധാകാംഡേ സപ്തഷഷ്ടിതമസ്സര്ഗഃ ॥
