śrīmadvālmīkīya rāmāyaṇē kiṣkindhākāṇḍam ।
atha saptaṣaṣṭitamassargaḥ ।
taṃ dṛṣṭvā jṛmbhamāṇaṃ tē kramituṃ śatayōjanam ।
vīryēṇāpūryamāṇaṃ cha sahasā vānarōttamam ॥ 1 ॥
sahasā śōkamutsṛjya praharṣēṇa samanvitāḥ ।
vinēdustuṣṭuvuśchāpi hanūmantaṃ mahābalam ॥ 2 ॥
prahṛṣṭā vismitāśchaiva vīkṣantē sma samantataḥ ।
trivikramakṛtōtsāhaṃ nārāyaṇamiva prajāḥ ॥ 3 ॥
saṃstūyamānō hanumānvyavardhata mahābalaḥ ।
samāvidhya cha lāṅgūlaṃ harṣādbalamupēyivān ॥ 4 ॥
tasya saṃstūyamānasya sarvairvānarapuṅgavaiḥ ।
tējasāpūryamāṇasya rūpamāsīdanuttamam ॥ 5 ॥
yathā vijṛmbhatē siṃhō vivṛddhō girigahvarē ।
mārutasyaurasaḥ putrastathā samprati jṛmbhatē ॥ 6 ॥
aśōbhata mukhaṃ tasya jṛmbhamāṇasya dhīmataḥ ।
ambarīṣamivā'dīptaṃ vidhūma iva pāvakaḥ ॥ 7 ॥
harīṇāmutthitō madhyātsamprahṛṣṭatanūruhaḥ ।
abhivādya harīnvṛddhānhanumānidamabravīt ॥ 8 ॥
arujatsarvatāgrāṇi hutāśanasakhō'nilaḥ ।
balavānapramēyaścha vāyurākāśagōcharaḥ ॥ 9 ॥
tasyāhaṃ śīghravēgasya śīghragasya mahātmanaḥ ।
mārutasyaurasaḥ putraḥ plavanēnāsmi tatsamaḥ ॥ 10 ॥
utsahēyaṃ hi vistīrṇamālikhantamivāmbaram ।
mēruṃ girimasaṅgēna parigantuṃ sahasraśaḥ ॥ 11 ॥
bāhuvēgapraṇunnēna sāgarēṇāhamutsahē ।
samāplāvayituṃ lōkaṃ saparvatanadīhradam ॥ 12 ॥
mamōrujaṅghāvēgēna bhaviṣyati samutthitaḥ ।
sammūrchChitamahāgrāhassamudrō varuṇālayaḥ ॥ 13 ॥
pannagāśanamākāśē patantaṃ pakṣisēvitē ।
vainatēyamahaṃ śaktaḥ parigantuṃ sahasraśaḥ ॥ 14 ॥
udayātprasthitaṃ vāpi jvalantaṃ raśmimālinam ।
anastamitamādityamabhigantuṃ samutsahē ॥ 15 ॥
tatō bhūmimasaṃspṛśya punarāgantumutsahē ।
pravēgēnaiva mahatā bhīmēna plavagarṣabhāḥ ॥ 16 ॥
utsahēyamatikrāntuṃ sarvānākāśagōcharān ।
sāgaraṃ kṣōbhayiṣyāmi dārayiṣyāmi mēdinīm ॥ 17 ॥
parvatāṃśchūrṇayiṣyāmi plavamānaḥ plavaṅgamāḥ ।
hariṣyāmyūruvēgēna plavamānō mahārṇavam ॥ 18 ॥
latānāṃ vividhaṃ puṣpaṃ pādapānāṃ cha sarvaśaḥ ।
anuyāsyanti māmadya plavamānaṃ vihāyasā ॥ 19 ॥
bhaviṣyati hi mē panthāssvātēḥ panthā ivāmbarē ।
charantaṃ ghōramākāśamutpatiṣyantamēva vā ॥ 20 ॥
drakṣyanti nipatiṣyantaṃ cha sarvabhūtāni vānarāḥ ।
mahāmērupratīkāśaṃ māṃ drakṣyatha vānarāḥ ॥ 21 ॥
divamāvṛtya gachChantaṃ grasamānamivāmbaram ।
vidhamiṣyāmi jīmūtānkampayiṣyāmi parvatān ॥ 22 ॥
sāgaraṃ śōṣayiṣyāmi plavamānassamāhitaḥ ।
vainatēyasya yā śaktirmama sā mārutasya vā ॥ 23 ॥
ṛtē suparṇarājānaṃ mārutaṃ vā mahājavam ।
na tadbhūtaṃ prapaśyāmi yanmāṃ plutamanuvrajēt ॥ 24 ॥
nimēṣāntaramātrēṇa nirālambanamambaram ।
sahasā nipatiṣyāmi ghanādvidyudivōtthitā ॥ 25 ॥
bhaviṣyati hi mē rūpaṃ plavamānasya sāgarē ।
viṣṇōrvikramamāṇasya purā trīnvikramāniva ॥ 26 ॥
buddhyā chāhaṃ prapaśyāmi manaśchēṣṭā cha mē tathā ।
ahaṃ drakṣyāmi vaidēhīṃ pramōdadhvaṃ plavaṅgamāḥ ॥ 27 ॥
mārutasya samō vēgē garuḍasya samō javē ।
ayutaṃ yōjanānāṃ tu gamiṣyāmīti mē matiḥ ॥ 28 ॥
vāsavasya savajrasya brahmaṇō vā svayambhuvaḥ ।
vikramya sahasā hastādamṛtaṃ tadihānayē ॥ 29 ॥
laṅkāṃ vāpi samutkṣipya gachChēyamiti mē matiḥ ।
tamēvaṃ vānaraśrēṣṭhaṃ garjantamamitaujasam ॥ 30 ॥
prahṛṣṭā harayastatra samudaikṣanta vismitāḥ ।
tasya tadvachanaṃ śrutvā jñātīnāṃ śōkanāśanam ॥ 31 ॥
uvācha parisaṃhṛṣṭō jāmbavānharisattamaḥ ।
vīra kēsariṇaḥ putra hanumānmārutātmaja ॥ 32 ॥
jñātīnāṃ vipulaśśōkastvayā tāta praṇāśitaḥ ।
tava kalyāṇaruchayaḥ kapimukhyāssamāgatāḥ ॥ 33 ॥
maṅgalaṃ kāryasiddhyarthaṃ kariṣyanti samāhitāḥ ।
ṛṣīṇāṃ cha prasādēna kapivṛddhamatēna cha ॥ 34 ॥
gurūṇāṃ cha prasādēna plavasva tvaṃ mahārṇavam ।
sthāsyāmaśchaikapādēna yāvadāgamanaṃ tava ॥ 35 ॥
tvadgatāni cha sarvēṣāṃ jīvanāni vanaukasām ।
tatastu hariśārdūlastānuvācha vanaukasaḥ ॥ 36 ॥
nēyaṃ mama mahī vēgaṃ laṅghanē dhārayiṣyati ।
ētānīha nagasyāsya śilāsaṅkaṭaśālinaḥ ॥ 37 ॥
śikharāṇi mahēndrasya sthirāṇi sumahānti cha ।
ēṣu vēgaṃ kariṣyāmi mahēndraśikharēṣvaham ॥ 38 ॥
nānādrumavikīrṇēṣu dhātuniṣyandaśōbhiṣu ।
ētāni mama niṣpēṣaṃ pādayōḥ plavatāṃ varāḥ ॥ 39 ॥
plavatō dhārayiṣyanti yōjanānāmitaśśatam ।
tatastaṃ mārutaprakhyassaharirmārutātmajaḥ ॥ 40 ॥
ārurōha nagaśrēṣṭhaṃ mahēndramarimardanaḥ ।
vṛtaṃ nānāvidhaiḥ vṛkṣairmṛgasēvitaśādvalam ॥ 41 ॥
latākusumasambādhaṃ nityapuṣpaphaladrumam ।
siṃhaśārdūlacharitaṃ mattamātaṅgasēvitam ॥ 42 ॥
mattadvijagaṇōdghuṣṭaṃ salilōtpīḍasaṅkulam ।
mahadbhiruchChritaṃ śṛṅgairmahēndraṃ sa mahābalaḥ ॥ 43 ॥
vichachāra hariśrēṣṭhō mahēndrasamavikramaḥ ।
pādābhyāṃ pīḍitastēna mahāśailō mahātmanā ॥ 44 ॥
rarāja siṃhābhihatō mahānmatta iva dvipaḥ ।
mumōcha salilōtpīḍānviprakīrṇaśilōchchayaḥ ॥ 45 ॥
vitrastamṛgamātaṅgaḥ prakampitamahādrumaḥ ।
nānāgandharvamithunaiḥ pānasaṃsargakarkaśaiḥ ॥ 46 ॥
utpatadbhiścha vihagairvidyādharagaṇairapi ।
tyajyamānamahāsānussannilīnamahōragaḥ ॥ 47 ॥
chalaśṛṅgaśilōdghātastadā'bhūtsa mahāgiriḥ ।
niśśvasadbhistadā'rtaistu bhujaṅgairardhaniḥsṛtaiḥ ॥ 48 ॥
sapatāka ivābhāti sa tadā dharaṇīdharaḥ ।
ṛṣibhistrāsasambhrāntaistyajyamānaḥ śilōchchayaḥ ॥ 49 ॥
sīdanmahati kāntārē sārthahīna ivādhvagaḥ ।
savēgavān vēgasamāhitātmā haripravīraḥ paravīrahantā ।
manassamādhāya mahānubhāvō jagāma laṅkāṃ manasā manasvī ॥ 50 ॥
ityārṣē śrīmadrāmāyaṇē vālmīkīya ādikāvyē kiṣkindhākāṇḍē saptaṣaṣṭitamassargaḥ ॥
