ශ්රීමද්වාල්මීකීය රාමායණේ කිෂ්කිංධාකාංඩම් ।
අථ සප්තෂෂ්ටිතමස්සර්ගඃ ।
තං දෘෂ්ට්වා ජෘංභමාණං තේ ක්රමිතුං ශතයෝජනම් ।
වීර්යේණාපූර්යමාණං ච සහසා වානරෝත්තමම් ॥ 1 ॥
සහසා ශෝකමුත්සෘජ්ය ප්රහර්ෂේණ සමන්විතාඃ ।
විනේදුස්තුෂ්ටුවුශ්චාපි හනූමංතං මහාබලම් ॥ 2 ॥
ප්රහෘෂ්ටා විස්මිතාශ්චෛව වීක්ෂංතේ ස්ම සමංතතඃ ।
ත්රිවික්රමකෘතෝත්සාහං නාරායණමිව ප්රජාඃ ॥ 3 ॥
සංස්තූයමානෝ හනුමාන්ව්යවර්ධත මහාබලඃ ।
සමාවිධ්ය ච ලාංගූලං හර්ෂාද්බලමුපේයිවාන් ॥ 4 ॥
තස්ය සංස්තූයමානස්ය සර්වෛර්වානරපුංගවෛඃ ।
තේජසාපූර්යමාණස්ය රූපමාසීදනුත්තමම් ॥ 5 ॥
යථා විජෘංභතේ සිංහෝ විවෘද්ධෝ ගිරිගහ්වරේ ।
මාරුතස්යෞරසඃ පුත්රස්තථා සංප්රති ජෘංභතේ ॥ 6 ॥
අශෝභත මුඛං තස්ය ජෘංභමාණස්ය ධීමතඃ ।
අංබරීෂමිවාऽදීප්තං විධූම ඉව පාවකඃ ॥ 7 ॥
හරීණාමුත්ථිතෝ මධ්යාත්සංප්රහෘෂ්ටතනූරුහඃ ।
අභිවාද්ය හරීන්වෘද්ධාන්හනුමානිදමබ්රවීත් ॥ 8 ॥
අරුජත්සර්වතාග්රාණි හුතාශනසඛෝऽනිලඃ ।
බලවානප්රමේයශ්ච වායුරාකාශගෝචරඃ ॥ 9 ॥
තස්යාහං ශීඝ්රවේගස්ය ශීඝ්රගස්ය මහාත්මනඃ ।
මාරුතස්යෞරසඃ පුත්රඃ ප්ලවනේනාස්මි තත්සමඃ ॥ 10 ॥
උත්සහේයං හි විස්තීර්ණමාලිඛංතමිවාංබරම් ।
මේරුං ගිරිමසංගේන පරිගංතුං සහස්රශඃ ॥ 11 ॥
බාහුවේගප්රණුන්නේන සාගරේණාහමුත්සහේ ।
සමාප්ලාවයිතුං ලෝකං සපර්වතනදීහ්රදම් ॥ 12 ॥
මමෝරුජංඝාවේගේන භවිෂ්යති සමුත්ථිතඃ ।
සම්මූර්ච්ඡිතමහාග්රාහස්සමුද්රෝ වරුණාලයඃ ॥ 13 ॥
පන්නගාශනමාකාශේ පතංතං පක්ෂිසේවිතේ ।
වෛනතේයමහං ශක්තඃ පරිගංතුං සහස්රශඃ ॥ 14 ॥
උදයාත්ප්රස්ථිතං වාපි ජ්වලංතං රශ්මිමාලිනම් ।
අනස්තමිතමාදිත්යමභිගංතුං සමුත්සහේ ॥ 15 ॥
තතෝ භූමිමසංස්පෘශ්ය පුනරාගංතුමුත්සහේ ।
ප්රවේගේනෛව මහතා භීමේන ප්ලවගර්ෂභාඃ ॥ 16 ॥
උත්සහේයමතික්රාංතුං සර්වානාකාශගෝචරාන් ।
සාගරං ක්ෂෝභයිෂ්යාමි දාරයිෂ්යාමි මේදිනීම් ॥ 17 ॥
පර්වතාංශ්චූර්ණයිෂ්යාමි ප්ලවමානඃ ප්ලවංගමාඃ ।
හරිෂ්යාම්යූරුවේගේන ප්ලවමානෝ මහාර්ණවම් ॥ 18 ॥
ලතානාං විවිධං පුෂ්පං පාදපානාං ච සර්වශඃ ।
අනුයාස්යංති මාමද්ය ප්ලවමානං විහායසා ॥ 19 ॥
භවිෂ්යති හි මේ පංථාස්ස්වාතේඃ පංථා ඉවාංබරේ ।
චරංතං ඝෝරමාකාශමුත්පතිෂ්යංතමේව වා ॥ 20 ॥
ද්රක්ෂ්යංති නිපතිෂ්යංතං ච සර්වභූතානි වානරාඃ ।
මහාමේරුප්රතීකාශං මාං ද්රක්ෂ්යථ වානරාඃ ॥ 21 ॥
දිවමාවෘත්ය ගච්ඡංතං ග්රසමානමිවාංබරම් ।
විධමිෂ්යාමි ජීමූතාන්කංපයිෂ්යාමි පර්වතාන් ॥ 22 ॥
සාගරං ශෝෂයිෂ්යාමි ප්ලවමානස්සමාහිතඃ ।
වෛනතේයස්ය යා ශක්තිර්මම සා මාරුතස්ය වා ॥ 23 ॥
ඍතේ සුපර්ණරාජානං මාරුතං වා මහාජවම් ।
න තද්භූතං ප්රපශ්යාමි යන්මාං ප්ලුතමනුව්රජේත් ॥ 24 ॥
නිමේෂාංතරමාත්රේණ නිරාලංබනමංබරම් ।
සහසා නිපතිෂ්යාමි ඝනාද්විද්යුදිවෝත්ථිතා ॥ 25 ॥
භවිෂ්යති හි මේ රූපං ප්ලවමානස්ය සාගරේ ।
විෂ්ණෝර්වික්රමමාණස්ය පුරා ත්රීන්වික්රමානිව ॥ 26 ॥
බුද්ධ්යා චාහං ප්රපශ්යාමි මනශ්චේෂ්ටා ච මේ තථා ।
අහං ද්රක්ෂ්යාමි වෛදේහීං ප්රමෝදධ්වං ප්ලවංගමාඃ ॥ 27 ॥
මාරුතස්ය සමෝ වේගේ ගරුඩස්ය සමෝ ජවේ ।
අයුතං යෝජනානාං තු ගමිෂ්යාමීති මේ මතිඃ ॥ 28 ॥
වාසවස්ය සවජ්රස්ය බ්රහ්මණෝ වා ස්වයංභුවඃ ।
වික්රම්ය සහසා හස්තාදමෘතං තදිහානයේ ॥ 29 ॥
ලංකාං වාපි සමුත්ක්ෂිප්ය ගච්ඡේයමිති මේ මතිඃ ।
තමේවං වානරශ්රේෂ්ඨං ගර්ජංතමමිතෞජසම් ॥ 30 ॥
ප්රහෘෂ්ටා හරයස්තත්ර සමුදෛක්ෂංත විස්මිතාඃ ।
තස්ය තද්වචනං ශ්රුත්වා ජ්ඤාතීනාං ශෝකනාශනම් ॥ 31 ॥
උවාච පරිසංහෘෂ්ටෝ ජාංබවාන්හරිසත්තමඃ ।
වීර කේසරිණඃ පුත්ර හනුමාන්මාරුතාත්මජ ॥ 32 ॥
ජ්ඤාතීනාං විපුලශ්ශෝකස්ත්වයා තාත ප්රණාශිතඃ ।
තව කල්යාණරුචයඃ කපිමුඛ්යාස්සමාගතාඃ ॥ 33 ॥
මංගලං කාර්යසිද්ධ්යර්ථං කරිෂ්යංති සමාහිතාඃ ।
ඍෂීණාං ච ප්රසාදේන කපිවෘද්ධමතේන ච ॥ 34 ॥
ගුරූණාං ච ප්රසාදේන ප්ලවස්ව ත්වං මහාර්ණවම් ।
ස්ථාස්යාමශ්චෛකපාදේන යාවදාගමනං තව ॥ 35 ॥
ත්වද්ගතානි ච සර්වේෂාං ජීවනානි වනෞකසාම් ।
තතස්තු හරිශාර්දූලස්තානුවාච වනෞකසඃ ॥ 36 ॥
නේයං මම මහී වේගං ලංඝනේ ධාරයිෂ්යති ।
ඒතානීහ නගස්යාස්ය ශිලාසංකටශාලිනඃ ॥ 37 ॥
ශිඛරාණි මහේංද්රස්ය ස්ථිරාණි සුමහාංති ච ।
ඒෂු වේගං කරිෂ්යාමි මහේංද්රශිඛරේෂ්වහම් ॥ 38 ॥
නානාද්රුමවිකීර්ණේෂු ධාතුනිෂ්යංදශෝභිෂු ।
ඒතානි මම නිෂ්පේෂං පාදයෝඃ ප්ලවතාං වරාඃ ॥ 39 ॥
ප්ලවතෝ ධාරයිෂ්යංති යෝජනානාමිතශ්ශතම් ।
තතස්තං මාරුතප්රඛ්යස්සහරිර්මාරුතාත්මජඃ ॥ 40 ॥
ආරුරෝහ නගශ්රේෂ්ඨං මහේංද්රමරිමර්දනඃ ।
වෘතං නානාවිධෛඃ වෘක්ෂෛර්මෘගසේවිතශාද්වලම් ॥ 41 ॥
ලතාකුසුමසංබාධං නිත්යපුෂ්පඵලද්රුමම් ।
සිංහශාර්දූලචරිතං මත්තමාතංගසේවිතම් ॥ 42 ॥
මත්තද්විජගණෝද්ඝුෂ්ටං සලිලෝත්පීඩසංකුලම් ।
මහද්භිරුච්ඡ්රිතං ශෘංගෛර්මහේංද්රං ස මහාබලඃ ॥ 43 ॥
විචචාර හරිශ්රේෂ්ඨෝ මහේංද්රසමවික්රමඃ ।
පාදාභ්යාං පීඩිතස්තේන මහාශෛලෝ මහාත්මනා ॥ 44 ॥
රරාජ සිංහාභිහතෝ මහාන්මත්ත ඉව ද්විපඃ ।
මුමෝච සලිලෝත්පීඩාන්විප්රකීර්ණශිලෝච්චයඃ ॥ 45 ॥
විත්රස්තමෘගමාතංගඃ ප්රකංපිතමහාද්රුමඃ ।
නානාගංධර්වමිථුනෛඃ පානසංසර්ගකර්කශෛඃ ॥ 46 ॥
උත්පතද්භිශ්ච විහගෛර්විද්යාධරගණෛරපි ।
ත්යජ්යමානමහාසානුස්සන්නිලීනමහෝරගඃ ॥ 47 ॥
චලශෘංගශිලෝද්ඝාතස්තදාऽභූත්ස මහාගිරිඃ ।
නිශ්ශ්වසද්භිස්තදාऽර්තෛස්තු භුජංගෛරර්ධනිඃසෘතෛඃ ॥ 48 ॥
සපතාක ඉවාභාති ස තදා ධරණීධරඃ ।
ඍෂිභිස්ත්රාසසංභ්රාංතෛස්ත්යජ්යමානඃ ශිලෝච්චයඃ ॥ 49 ॥
සීදන්මහති කාංතාරේ සාර්ථහීන ඉවාධ්වගඃ ।
සවේගවාන් වේගසමාහිතාත්මා හරිප්රවීරඃ පරවීරහංතා ।
මනස්සමාධාය මහානුභාවෝ ජගාම ලංකාං මනසා මනස්වී ॥ 50 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ කිෂ්කිංධාකාංඩේ සප්තෂෂ්ටිතමස්සර්ගඃ ॥
