ଶ୍ରୀମଦ୍ଵାଲ୍ମୀକୀୟ ରାମାୟଣେ ୟୁଦ୍ଧକାଂଡମ୍ ।
ଅଥ ଅଷ୍ଟମସ୍ସର୍ଗଃ ।
ତତୋନୀଲାଂବୁଦନିଭଃ ପ୍ରହସ୍ତୋନାମରାକ୍ଷସଃ ।
ଅବ୍ରଵୀତ୍ପ୍ରାଂଜଲିର୍ଵାକ୍ୟଂଶୂରସ୍ସେନାପତିସ୍ତଦା ॥ 1 ॥
ଦେଵଦାନଵଗଂଧର୍ଵାଃପିଶାଚପତଗୋରଗାଃ ।
ନତ୍ଵାଂଧର୍ଷୟିତୁଂଶକ୍ୟାଃକିଂପୁନର୍ଵାନରାରଣେ ॥ 2 ॥
ସର୍ଵେପ୍ରମତ୍ତାଵିଶ୍ଵସ୍ତାଵଂଚିତାସ୍ସ୍ମହନୂମତା ।
ନହିମେଜୀଵତୋଗଚ୍ଛେଜ୍ଜୀଵନ୍ ସଵନଗୋଚରଃ ॥ 3 ॥
ସର୍ଵାଂସାଗରପର୍ୟଂତାଂସଶୈଲଵନକାନନାମ୍ ।
କରୋମ୍ୟଵାନରାଂଭୂମିମାଜ୍ଞାପୟତୁମାଂଭଵାନ୍ ॥ 4 ॥
ରକ୍ଷାଂଚୈଵଵିଧାସ୍ୟାମିଵାନରାଦ୍ରଜନୀଚର ।
ନାଗମିଷ୍ୟତିତେଦୁଃଖଂକିଂଚିଦାତ୍ମାପରାଧଜମ୍ ॥ 5 ॥
ଅବ୍ରଵୀଚ୍ଚସୁସଂକୃଦ୍ଧୋଦୁର୍ମୁଖୋନାମରାକ୍ଷସଃ ।
ଇଦଂନକ୍ଷମଣୀୟଂହିସର୍ଵେଷାଂନଃପ୍ରଧର୍ଷଣମ୍ ॥ 6 ॥
ଅୟଂପରିଭଵୋଭୂୟଃପୁରସ୍ୟାଂତଃପୁରସ୍ୟଚ ।
ଶ୍ରୀମତୋରାକ୍ଷସେଂଦ୍ରସ୍ୟଵାନରେଣପ୍ରଧର୍ଷଣମ୍ ॥ 7 ॥
ଅସ୍ମିନ୍ ମୁହୂର୍ତେଗତ୍ଵୈକୋନିଵର୍ତିଷ୍ୟାମିଵାନରାନ୍ ।
ପ୍ରଵିଷ୍ଟାନ୍ ସାଗରଂଭୀମମଂବରଂଵାରସାତଲମ୍ ॥ 8 ॥
ତତୋଽବ୍ରଵୀତ୍ସୁସଂକୃଦ୍ଧୋଵଜ୍ରଦଂଷ୍ଟ୍ରୋମହାବଲଃ ।
ପ୍ରଗୃହ୍ୟପରିଘଂଘୋରଂମାଂସଶୋଣିତରୂଷିତମ୍ ॥ 9 ॥
କିଂଵୋହନୁମତାକାର୍ୟଂକୃପଣେନତପସ୍ଵିନା ।
ରାମେତିଷ୍ଠତିଦୁର୍ଧର୍ଷେସସୁଗ୍ରୀଵେଽପିସଲକ୍ଷ୍ମଣେ ॥ 10 ॥
ଅଦ୍ୟରାମଂସସୁଗ୍ରୀଵଂପରିଘେଣସଲକ୍ଷ୍ମଣମ୍ ।
ଆଗମିଷ୍ୟାମିହତ୍ଵୈକୋଵିକ୍ଷୋଭ୍ୟହରିଵାହିନୀମ୍ ॥ 11 ॥
ଇଦଂମମାପରଂଵାକ୍ୟଂଶୃଣୁରାଜନ୍ ୟଦୀଚ୍ଛସି ।
ଉପାୟକୁଶଲୋହ୍ୟେଵଜୟେଚ୍ଛତ୍ରୂନତଂଦ୍ରିତଃ ॥ 12 ॥
କାମରୂପଧରାଶ୍ଶୂରାସ୍ସୁଭୀମାଭୀମଦର୍ଶନାଃ ।
ରାକ୍ଷସାଵୈସହସ୍ରାଣିରାକ୍ଷସାଧିପନିଶ୍ଚିତାଃ ॥ 13 ॥
କାକୁତ୍ସ୍ଥମୁପସଂଗମ୍ୟବିଭ୍ରତୋମାନୁଷଂଵପୁଃ ।
ସର୍ଵେହ୍ୟସଂଭ୍ରମାଭୂତ୍ଵାବ୍ରୁଵଂତୁରଘୁସତ୍ତମମ୍ ॥ 14 ॥
ପ୍ରେଷିତାଭରତେନୈଵଭ୍ରାତ୍ରାତଵୟଵୀୟସା ।
ସହିସେନାଂସମୁତ୍ଥାପ୍ୟକ୍ଷିପ୍ରମେଵୋପୟାସ୍ୟତି ॥ 15 ॥
ତତୋଵୟମିତସ୍ତୂର୍ଣଂଶୂଲଶକ୍ତିଗଦାଧରାଃ ।
ଚାପବାଣାସିହସ୍ତାଶ୍ଚତ୍ଵରିତାସ୍ତତ୍ରୟାମହେ ॥ 16 ॥
ଆକାଶେଗଣଶସ୍ଥ୍ସିତ୍ଵାହତ୍ଵାତାଂହରିଵାହିନୀମ୍ ।
ଅଶ୍ମଶସ୍ତ୍ରମହାଵୃଷ୍ଟ୍ୟାପ୍ରାପୟାମୟମକ୍ଷୟମ୍ ॥ 17 ॥
ଏଵଂଚେଦୁପସର୍ପେତାମନୟଂରାମଲକ୍ଷ୍ମଣୌ ।
ଅଵଶ୍ୟମପନୀତେନଜହତାମେଵଜୀଵିତମ୍ ॥ 18 ॥
କୌଂଭକର୍ଣିସ୍ତତୋଵୀରୋନିକୁଂଭୋନାମଵୀର୍ୟଵାନ୍ ।
ଅବ୍ରଵୀତ୍ପରମକ୍ରୁଦ୍ଧୋରାଵଣଂଲୋକରାଵଣମ୍ ॥ 19 ॥
ସର୍ଵେଭଵଂତସ୍ତିଷ୍ଠଂତୁମହାରାଜେନସଂଗତାଃ ।
ଅହମେକୋହନିଷ୍ୟାମିରାଘଵଂସହଲକ୍ଷ୍ମଣମ୍ ॥ 20 ॥
ସୁଗ୍ରୀଵଂଚହନୂମଂତଂସର୍ଵାଂନେଵଚଵାନରାନ୍ ।
ତତୋଵଜ୍ରହନୁର୍ନାମରାକ୍ଷସଃପର୍ଵତୋପମଃ ॥ 21 ॥
କ୍ରୁଦ୍ଧଃ ପରିଲିହନ୍ସୃକ୍କାଂଜିହ୍ଵୟାଵାକ୍ୟମବ୍ରଵୀତ୍ ।
ସ୍ଵୈରଂକୁର୍ଵଂତୁକର୍ମାଣିଭଵଂତୋଵିଗତଜ୍ଵରାଃ ॥ 22 ॥
ଏକୋଽହଂଭକ୍ଷୟିଷ୍ୟାମିତାଂସର୍ଵାଂହରିୟୂଥପାନ୍ ।
ସ୍ଵସ୍ଥାଃକ୍ରୀଡଂତୁନିଶ୍ଚିଂତାଃପିବଂତୁମଧୁଵାରୁଣୀମ୍ ॥ 23 ॥
ଅହମେକୋଵଧିଷ୍ୟାମିସୁଗ୍ରୀଵଂସହଲକ୍ଷ୍ମଣମ୍ ।
ସାଂଗଦଂଚହନୂମଂତଂରାମଂଚରଣକୁଂଜରମ୍ ॥ 24 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ୟୁଦ୍ଧକାଂଡେ ଅଷ୍ଟମସ୍ସର୍ଗଃ ॥
