శ్రీమద్వాల్మీకీయ రామాయణే యుద్ధకాండమ్ ।
అథ అష్టమస్సర్గః ।
తతోనీలాంబుదనిభః ప్రహస్తోనామరాక్షసః ।
అబ్రవీత్ప్రాంజలిర్వాక్యంశూరస్సేనాపతిస్తదా ॥ 1 ॥
దేవదానవగంధర్వాఃపిశాచపతగోరగాః ।
నత్వాంధర్షయితుంశక్యాఃకింపునర్వానరారణే ॥ 2 ॥
సర్వేప్రమత్తావిశ్వస్తావంచితాస్స్మహనూమతా ।
నహిమేజీవతోగచ్ఛేజ్జీవన్ సవనగోచరః ॥ 3 ॥
సర్వాంసాగరపర్యంతాంసశైలవనకాననామ్ ।
కరోమ్యవానరాంభూమిమాజ్ఞాపయతుమాంభవాన్ ॥ 4 ॥
రక్షాంచైవవిధాస్యామివానరాద్రజనీచర ।
నాగమిష్యతితేదుఃఖంకించిదాత్మాపరాధజమ్ ॥ 5 ॥
అబ్రవీచ్చసుసంకృద్ధోదుర్ముఖోనామరాక్షసః ।
ఇదంనక్షమణీయంహిసర్వేషాంనఃప్రధర్షణమ్ ॥ 6 ॥
అయంపరిభవోభూయఃపురస్యాంతఃపురస్యచ ।
శ్రీమతోరాక్షసేంద్రస్యవానరేణప్రధర్షణమ్ ॥ 7 ॥
అస్మిన్ ముహూర్తేగత్వైకోనివర్తిష్యామివానరాన్ ।
ప్రవిష్టాన్ సాగరంభీమమంబరంవారసాతలమ్ ॥ 8 ॥
తతోఽబ్రవీత్సుసంకృద్ధోవజ్రదంష్ట్రోమహాబలః ।
ప్రగృహ్యపరిఘంఘోరంమాంసశోణితరూషితమ్ ॥ 9 ॥
కింవోహనుమతాకార్యంకృపణేనతపస్వినా ।
రామేతిష్ఠతిదుర్ధర్షేససుగ్రీవేఽపిసలక్ష్మణే ॥ 10 ॥
అద్యరామంససుగ్రీవంపరిఘేణసలక్ష్మణమ్ ।
ఆగమిష్యామిహత్వైకోవిక్షోభ్యహరివాహినీమ్ ॥ 11 ॥
ఇదంమమాపరంవాక్యంశృణురాజన్ యదీచ్ఛసి ।
ఉపాయకుశలోహ్యేవజయేచ్ఛత్రూనతంద్రితః ॥ 12 ॥
కామరూపధరాశ్శూరాస్సుభీమాభీమదర్శనాః ।
రాక్షసావైసహస్రాణిరాక్షసాధిపనిశ్చితాః ॥ 13 ॥
కాకుత్స్థముపసంగమ్యబిభ్రతోమానుషంవపుః ।
సర్వేహ్యసంభ్రమాభూత్వాబ్రువంతురఘుసత్తమమ్ ॥ 14 ॥
ప్రేషితాభరతేనైవభ్రాత్రాతవయవీయసా ।
సహిసేనాంసముత్థాప్యక్షిప్రమేవోపయాస్యతి ॥ 15 ॥
తతోవయమితస్తూర్ణంశూలశక్తిగదాధరాః ।
చాపబాణాసిహస్తాశ్చత్వరితాస్తత్రయామహే ॥ 16 ॥
ఆకాశేగణశస్థ్సిత్వాహత్వాతాంహరివాహినీమ్ ।
అశ్మశస్త్రమహావృష్ట్యాప్రాపయామయమక్షయమ్ ॥ 17 ॥
ఏవంచేదుపసర్పేతామనయంరామలక్ష్మణౌ ।
అవశ్యమపనీతేనజహతామేవజీవితమ్ ॥ 18 ॥
కౌంభకర్ణిస్తతోవీరోనికుంభోనామవీర్యవాన్ ।
అబ్రవీత్పరమక్రుద్ధోరావణంలోకరావణమ్ ॥ 19 ॥
సర్వేభవంతస్తిష్ఠంతుమహారాజేనసంగతాః ।
అహమేకోహనిష్యామిరాఘవంసహలక్ష్మణమ్ ॥ 20 ॥
సుగ్రీవంచహనూమంతంసర్వాంనేవచవానరాన్ ।
తతోవజ్రహనుర్నామరాక్షసఃపర్వతోపమః ॥ 21 ॥
క్రుద్ధః పరిలిహన్సృక్కాంజిహ్వయావాక్యమబ్రవీత్ ।
స్వైరంకుర్వంతుకర్మాణిభవంతోవిగతజ్వరాః ॥ 22 ॥
ఏకోఽహంభక్షయిష్యామితాంసర్వాంహరియూథపాన్ ।
స్వస్థాఃక్రీడంతునిశ్చింతాఃపిబంతుమధువారుణీమ్ ॥ 23 ॥
అహమేకోవధిష్యామిసుగ్రీవంసహలక్ష్మణమ్ ।
సాంగదంచహనూమంతంరామంచరణకుంజరమ్ ॥ 24 ॥
ఇత్యార్షే శ్రీమద్రామాయణే వాల్మీకీయ ఆదికావ్యే యుద్ధకాండే అష్టమస్సర్గః ॥
