శ్రీమద్వాల్మీకీయ రామాయణే బాలకాణ్డమ్ ।
అథ త్రయోవింశస్సర్గః ।
ప్రభాతాయాం తు శర్వర్యాం విశ్వామిత్రో మహామునిః ।
అభ్యభాషత కాకుత్స్థౌ శయానౌ పర్ణసంస్తరే ॥ 1 ॥
కౌసల్యా సుప్రజా రామ పూర్వా సన్ధ్యా ప్రవర్తతే ।
ఉత్తిష్ఠ నరశార్దూల కర్తవ్యం దైవమాహ్నికమ్ ॥ 2 ॥
తస్యర్షేః పరమోదారం వచశ్శ్రుత్వా నృపాత్మజౌ ।
స్నాత్వా కృతోదకౌ వీరౌ జేపతుః పరమం జపమ్ ॥ 3 ॥
కృతాహ్నికౌ మహావీర్యౌ విశ్వామిత్రం తపోధనమ్ ।
అభివాద్యాభిసంహృష్టౌ గమనాయాభితస్థతుః ॥ 4 ॥
తౌ ప్రయాతౌ మహావీర్యౌ దివ్యాం త్రిపథగాం నదీమ్ ।
దదృశాతే తతస్తత్ర సరయ్వాస్సఙ్గమే శుభే ॥ 5 ॥
తత్రాశ్రమపదం పుణ్యమృషీణామగ్య్రతేజసామ్ ।
బహువర్షసహస్రాణి తప్యతాం పరమం తపః ॥ 6 ॥
తం దృష్ట్వా పరమప్రీతౌ రాఘవౌ పుణ్యమాశ్రమమ్ ।
ఊచతుస్తం మహాత్మానం విశ్వామిత్రమిదం వచః ॥ 7 ॥
కస్యాయమాశ్రమః పుణ్యః కోన్వస్మిన్వసతే పుమాన్ ।
భగవన్ శ్రోతుమిచ్ఛావః పరం కౌతూహలం హి నౌ ॥ 8 ॥
తయోస్తద్వచనం శ్రుత్వా ప్రహస్య మునిపుఙ్గవః ।
అబ్రవీచ్ఛ్రూయతాం రామ యస్యాయం పూర్వ ఆశ్రమః ॥ 9 ॥
కన్దర్పో మూర్తిమానాసీత్కామ ఇత్యుచ్యతే బుధైః ।
తపస్యన్తమిహ స్థాణుం నియమేన సమాహితమ్ ॥ 10 ॥
కృతోద్వాహం తు దేవేశం గచ్ఛన్తం సమరుద్గగణమ్ ।
ధర్షయామాస దుర్మేధా హుఙ్కృతశ్చ మహాత్మనా ॥ 11 ॥
అవదగ్ధస్య రౌద్రేణ చక్షుషా రఘునన్దన ।
వ్యశీర్యన్త శరీరాత్స్వాత్సర్వగాత్రాణి దుర్మతేః ॥ 12 ॥
తస్య గాత్రం హతం తత్ర నిర్దగ్థస్య మహాత్మనా ।
అశరీరః కృతః కామః క్రోధాద్దేవేశ్వరేణ హి ॥ 13 ॥
అనఙ్గ ఇతి విఖ్యాతస్తదాప్రభృతి రాఘవ ।
స చాఙ్గవిషయశ్శ్రీమాన్యత్రాఙ్గం ప్రముమోచ హ ॥ 14 ॥
తస్యాయమాశ్రమః పుణ్యస్తస్యేమే మునయః పురా ।
శిష్యా ధర్మపరా నిత్యం తేషాం పాపం న విద్యతే ॥ 15 ॥
ఇహాద్య రజనీం రామ వసేమ శుభదర్శన ।
పుణ్యయోస్సరితోర్మధ్యే శ్వస్తరిష్యామహే వయమ్ ॥ 16 ॥
అభిగచ్ఛామహే సర్వే శుచయః పుణ్యమాశ్రమమ్ ।
స్నాతాశ్చ కృతజప్యాశ్చ హుతహవ్యా నరోత్తమ ॥ 17 ॥
తేషాం సంవదతాం తత్ర తపోదీర్ఘేణ చక్షుషా ।
విజ్ఞాయ పరమప్రీతా మునయో హర్షమాగమన్ ॥ 18 ॥
అర్ఘ్యం పాద్యం తథాఽతిథ్యం నివేద్య కుశికాత్మజే ।
రామలక్ష్మణయోః పశ్చాదకుర్వన్నతిథిక్రియామ్ ॥ 19 ॥
సత్కారం సమనుప్రాప్య కథాభిరభిరఞ్జయన్ ।
యథార్హమజపన్ సన్ధ్యామృషయస్తే సమాహితాః ॥ 20 ॥
తత్ర వాసిభిరానీతా మునిభిస్సువ్రతైః సహ ।
న్యవసన్ సుసుఖం తత్ర కామాశ్రమపదే తదా ॥ 21 ॥
కథాభిరభిరామాభిరభిరామౌ నృపాత్మజౌ ।
రమయామాస ధర్మాత్మా కౌశికో మునిపుఙ్గవః ॥ 22 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాణ్డే త్రయోవింశస్సర్గః ॥
