శ్రీమద్వాల్మీకీయ రామాయణే కిష్కిన్ధాకాణ్డమ్ ।
అథ చతుశ్చత్వారింశస్సర్గః ।
విశేషేణ తు సుగ్రీవో హనూమత్యర్థముక్తవాన్ ।
స హి తస్మిన్హరిశ్రేష్ఠే నిశ్చితార్థోఽర్థసాధనే ॥ 1 ॥
అబ్రవీచ్చ హనూమన్తం విక్రాన్తమనిలాత్మజమ్ ।
సుగ్రీవః పరమప్రీతః ప్రభు స్సర్వవనౌకసామ్ ॥ 2 ॥
న భూమౌ నాన్తరిక్షే వా నామ్బరే నామరాలయే ।
నాప్సు వా గతిసఙ్గం తే పశ్యామి హరిపుఙ్గవ ॥ 3 ॥
సాసురాస్సహగన్ధర్వాస్సనాగనరదేవతాః ।
విదితా స్సర్వలోకాస్తే ససాగరధరాధరాః ॥ 4 ॥
గతిర్వేగశ్చ తేజశ్చ లాఘవం చ మహాకపే ।
పితుస్తే సదృశం వీర మారుతస్య మహౌజసః ॥ 5 ॥
తేజసా వాపి తే భూతం న సమం భువి న విద్యతే ।
తద్యథా లభ్యతే సీతా తత్త్వమేవోపపాదయ ॥ 6 ॥
త్వయ్యేవ హనుమ న్నస్తి బలం బుద్ధిః పరాక్రమః ।
దేశకాలానువృత్తిశ్చ నయశ్చ నయపణ్డిత ॥ 7 ॥
తతః కార్యసమాసఙ్గమవగమ్య హనూమతి ।
విదిత్వా హనుమన్తం చ చిన్తయామాస రాఘవః ॥ 8 ॥
సర్వథా నిశ్చితార్థోఽయం హనూమతి హరీశ్వరః ।
నిశ్చితార్థకరశ్చాపి హనూమాన్కార్యసాధనే ॥ 9 ॥
తదేవం ప్రస్థితస్యాస్య పరిజ్ఞాతస్య కర్మభిః ।
భర్త్రా పరిగృహీతస్య ధ్రువః కార్యఫలోదయః ॥ 10 ॥
తం సమీక్ష్య మహాతేజా వ్యవసాయోత్తరం హరిమ్ ।
కృతార్థ ఇవ సంవృత్తః ప్రహృష్టేన్ద్రియమానసః ॥ 11 ॥
దదౌ తస్య తతః ప్రీతస్స్వనామాఙ్కోపశోభితమ్ ।
అఙ్గులీయమభిజ్ఞానం రాజపుత్ర్యాః పరన్తపః ॥ 12 ॥
అనేన త్వాం హరిశ్రేష్ఠ చిహ్నేన జనకాత్మజా ।
మత్సకాశాదనుప్రాప్తమనుద్విగ్నాఽనుపశ్యతి ॥ 13 ॥
వ్యవసాయశ్చ తే వీర సత్త్వయుక్తశ్చ విక్రమః ।
సుగ్రీవస్య చ సన్దేశస్సిద్ధిం కథయతీవ మే ॥ 14 ॥
స తద్గృహ్య హరిశ్రేష్ఠః స్థాప్య మూర్ధ్ని కృతాఞ్జలిః ।
వన్దిత్వా చరణౌ చైవ ప్రస్థితః ప్లవగోత్తమః ॥ 15 ॥
స తత్ప్రకర్షన్ హరీణాం మహద్బలం బభూవ వీరః పవనాత్మజః కపిః ।
గతామ్బుదే వ్యోమ్ని విశుద్ధమణ్డలః శశీవ నక్షత్రగణోపశోభితః ॥ 16 ॥
అతిబల బలమాశ్రితస్తవాహం హరివరవిక్రమ విక్రమైరనల్పైః ।
పవనసుత యథాఽభిగమ్యతే సా జనకసుతా హనుమం స్తథా కురుష్వ ॥ 17 ॥
ఇత్యార్షే శ్రీమద్రామాయణే వాల్మీకీయ ఆదికావ్యే కిష్కిన్ధాకాణ్డే చతుశ్చత్వారింశస్సర్గః ॥
