శ్రీమద్వాల్మీకీయ రామాయణే బాలకాణ్డమ్ ।
అథ షట్షష్టితమస్సర్గః ।
తతః ప్రభాతే విమలే కృతకర్మా నరాధిపః ।
విశ్వామిత్రం మహాత్మానం ఆజుహావ సరాఘవమ్ ॥ 1 ॥
తమర్చయిత్వా ధర్మాత్మా శాస్త్రదృష్టేన కర్మణా ।
రాఘవౌ చ మహాత్మానౌ తదా వాక్యమువాచ హ ॥ 2 ॥
భగవన్ స్వాగతం తేఽస్తు కిం కరోమి తవానఘ ।
భవానాజ్ఞాపయతు మామాజ్ఞాప్యో భవతా హ్యహమ్ ॥ 3 ॥
ఏవముక్తస్స ధర్మాత్మా జనకేన మహాత్మనా ।
ప్రత్యువాచ మునిర్వీరం వాక్యం వాక్యవిశారదః ॥ 4 ॥
పుత్రౌ దశరథస్యేమౌ క్షత్రియౌ లోకవిశ్రుతౌ ।
ద్రుష్టుకామౌ ధను శ్శ్రేష్ఠం యదేతత్వయి తిష్ఠతి ॥ 5 ॥
ఏతద్దర్శయ భద్రం తే కృతకామౌ నృపాత్మజౌ ।
దర్శనాదస్య ధనుషో యథేష్టం ప్రతియాస్యతః ॥ 6 ॥
ఏవముక్తస్తు జనకః ప్రత్యువాచ మహామునిమ్ ।
శ్రూయతామస్య ధనుషో యదర్థమిహ తిష్ఠతి ॥ 7 ॥
దేవరాత ఇతి ఖ్యాతో నిమేష్షష్ఠో మహీపతిః ।
న్యాసోఽయం తస్య భగవన్ హస్తే దత్తో మహాత్మనా ॥ 8 ॥
దక్షయజ్ఞవధే పూర్వం ధనురాయమ్య వీర్యవాన్ ।
రుద్రస్తు త్రిదశాన్ రోషాత్సలీలమిదమబ్రవీత్ ॥ 9 ॥
యస్మాద్భాగార్థినో భాగాన్నాకల్పయత మే సురాః ।
వరాఙ్గాణి మహార్హాణి ధనుషా శాతయామి వః ॥ 10 ॥
తతో విమనసస్సర్వే దేవా వై మునిపుఙ్గవ ।
ప్రసాదయన్తి దేవేశం తేషాం ప్రీతోఽభవద్భవః ॥ 11 ॥
ప్రీతియుక్తస్స సర్వేషాం దదౌ తేషాం మహాత్మనామ్ ।
తదేతద్దేవదేవస్య ధనూరత్నం మహాత్మనః ।
న్యాసభూతం తదా న్యస్తమస్మాకం పూర్వ కే విభో ॥ 12 ॥
అథ మే కృషతః క్షేత్రం లాఙ్గూలాదుత్థితా మయా ।
క్షేత్రం శోధయతా లబ్ధా నామ్నా సీతేతి విశ్రుతా ॥ 13 ॥
భూతలాదుత్థితా సా తు వ్యవర్ధత మమాత్మజా ।
వీర్యశుల్కేతి మే కన్యా స్థాపితేయమయోనిజా ॥ 14 ॥
భూతలాదుత్థితాం తాం తు వర్ధమానాం మమాత్మజామ్ ।
వరయామాసురాగమ్య రాజానో మునిపుఙ్గవ ॥ 15 ॥
తేషాం వరయతాం కన్యాం సర్వేషాం పృథివీక్షితామ్ ।
వీర్యశుల్కేతి భగవన్ న దదామి సుతామహమ్ ॥ 16 ॥
తతస్సర్వే నృపతయ స్సమేత్య మునిపుఙ్గవ ।
మిథిలామభ్యుపాగమ్య వీర్యజిజ్ఞాసవస్తదా ॥ 17 ॥
తేషాం జిజ్ఞాసమానానాం వీర్యం ధనురుపాహృతమ్ ।
న శేకుర్గ్రహణే తస్య ధనుషస్తోలనేఽపి వా ॥ 18 ॥
తేషాం వీర్యవతాం వీర్యమల్పం జ్ఞాత్వా మహామునే ।
ప్రత్యాఖ్యాతా నృపతయస్తన్నిబోధ తపోధన ॥ 19 ॥
తతః పరమకోపేన రాజానో నృపపుఙ్గవ ।
న్యరున్ధన్మిథిలాం సర్వే వీర్యసన్దేహమాగతాః ॥ 20 ॥
ఆత్మానమవధూతం తే విజ్ఞాయ నృపపుఙ్గవాః ।
రోషేణ మహతాఽఽవిష్టాః పీడయన్మిథిలాం పురీమ్ ॥ 21 ॥
తతస్సంవత్సరే పూర్ణే క్షయం యాతాని సర్వశః ।
సాధనాని మునిశ్రేష్ఠ తతోఽహం భృశదుఃఖితః ॥ 22 ॥
తతో దేవగణాన్ సర్వాన్ తపసాఽహం ప్రసాదయమ్ ।
దదుశ్చ పరమప్రీతా శ్చతురఙ్గబలం సురాః ॥ 23 ॥
తతో భగ్నా నృపతయో హన్యమానా దిశో యయుః ।
అవీర్యా వీర్యసన్దిగ్ధా స్సామాత్యాః పాపకర్మణః ॥ 24 ॥
తదేతన్మునిశార్దూల ధనుః పరమభాస్వరమ్ ।
రామలక్ష్మణయోశ్చాపి దర్శయిష్యామి సువ్రత ॥ 25 ॥
యద్యస్య ధనుషో రామః కుర్యాదారోపణం మునే ।
సుతామయోనిజాం సీతాం దద్యాం దాశరథేరహమ్ ॥ 26 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాణ్డే షట్షష్టితమస్సర్గః ॥
