శ్రీమద్వాల్మీకీయ రామాయణే కిష్కిన్ధాకాణ్డమ్ ।
అథ ఏకషష్టితమస్సర్గః ।
తతస్తద్దారుణం కర్మ దుష్కరం సహసాత్కృతమ్ ।
ఆచచక్షే మునేస్సర్వం సూర్యానుగమనం తథా ॥ 1 ॥
భగవన్వ్రణయుక్తత్వాల్లజ్జయా వ్యాకులేన్ద్రియః ।
పరిశ్రాన్తో న శక్నోమి వచనం పరిభాషితుమ్ ॥ 2 ॥
అహం చైవ జటాయుశ్చ సఙ్ఘర్షాద్ధర్పమోహితౌ ।
ఆకాశం పతితౌ వీరౌ జిజ్ఞాసన్తౌ పరాక్రమమ్ ॥ 3 ॥
కైలాసశిఖరే బద్ధ్వా మునీనామగ్రతః పణమ్ ।
రవిస్స్యాదనుయాతవ్యో యావదస్తం మహాగిరిమ్ ॥ 4 ॥
అథాఽవాం యుగపత్ప్రాప్తావపశ్యావ మహీతలే ।
రథచక్రప్రమాణాని నగరాణి పృథక్పృథక్ ॥ 5 ॥
క్వచిద్వాదిత్రఘోషాంశ్చ బ్రహ్మఘోషాంశ్చ శుశ్రువః ।
గాయన్తీశ్చాఙ్గనా బహ్వీః పశ్యావో రక్తవాససః ॥ 6 ॥
తూర్ణముత్పత్య చాకాశమాదిత్యపథమాశ్రితౌ ।
ఆవామాలోకయావస్తద్వనం శాద్వలసన్నిభమ్ ॥ 7 ॥
ఉపలైరివ సఞ్ఛన్నా దృశ్యతే భూశ్శిలోచ్చయైః ।
ఆపగాభిశ్చ సంవీతా సూత్రైరివ వసున్ధరా ॥ 8 ॥
హిమవాంశ్చైవ విన్ధ్యశ్చ మేరుశ్చ సుమహాన్నగః ।
భూతలే సమ్ప్రకాశన్తే నాగా ఇవ జలాశయే ॥ 9 ॥
తీవ్రస్స్వేదశ్చ ఖేదశ్చ భయం చాసీత్తదాఽఽవయోః ।
సమావిశతి మోహశ్చ తమో మూర్ఛా చ దారుణా ॥ 10 ॥
న దిగ్విజ్ఞాయతే యామ్యా నాగ్నేయీ న చ వారుణీ ।
యుగాన్తే నియతో లోకో హతో దగ్ధ ఇవాగ్నినా ॥ 11 ॥
మనశ్చ మే హతం భూయస్సన్నివర్త్యతు సంశ్రయమ్ ।
యత్నేన మహతా హ్యస్మిన్పునస్సన్ధాయ చక్షుషీ ॥ 12 ॥
యత్నేన మహతా భూయో భాస్కరః ప్రతిలోకితః ।
తుల్యః పృథ్వీప్రమాణేన భాస్కరః ప్రతిభాతి నౌ ॥ 13 ॥
జటాయుర్మామనాపృచ్ఛ్య నిపపాత మహీం తతః ।
తం దృష్ట్వా తూర్ణమాకాశాదాత్మానం ముక్తవానహమ్ ॥ 14 ॥
పక్షాభ్యాం చ మయా గుప్తో జటాయుర్న ప్రదహ్యతే ।
ప్రమాదాత్తత్ర నిర్దగ్ధః పతన్వాయుపథాదహమ్ ॥ 15 ॥
ఆశఙ్కే తం నిపతితం జనస్థానే జటాయుషమ్ ।
అహం తు పతితో విన్ధ్యే దగ్ధపక్షో జడీకృతః ॥ 16 ॥
రాజ్యేన హీనో భ్రాత్రా చ పక్షాభ్యాం విక్రమేణ చ ।
సర్వథా మర్తుమేవేచ్ఛన్పతిష్యే శిఖరాద్గీరేః ॥ 17 ॥
ఇత్యార్షే శ్రీమద్రామాయణే వాల్మీకీయ ఆదికావ్యే కిష్కిన్ధాకాణ్డే ఏకషష్టితమస్సర్గః ॥
