శ్రీమద్వాల్మీకీయ రామాయణే యుద్ధకాణ్డమ్ ।
అథ అష్టమస్సర్గః ।
తతోనీలామ్బుదనిభః ప్రహస్తోనామరాక్షసః ।
అబ్రవీత్ప్రాఞ్జలిర్వాక్యంశూరస్సేనాపతిస్తదా ॥ 1 ॥
దేవదానవగన్ధర్వాఃపిశాచపతగోరగాః ।
నత్వాన్ధర్షయితుంశక్యాఃకిమ్పునర్వానరారణే ॥ 2 ॥
సర్వేప్రమత్తావిశ్వస్తావఞ్చితాస్స్మహనూమతా ।
నహిమేజీవతోగచ్ఛేజ్జీవన్ సవనగోచరః ॥ 3 ॥
సర్వాంసాగరపర్యన్తాంసశైలవనకాననామ్ ।
కరోమ్యవానరామ్భూమిమాజ్ఞాపయతుమామ్భవాన్ ॥ 4 ॥
రక్షాఞ్చైవవిధాస్యామివానరాద్రజనీచర ।
నాగమిష్యతితేదుఃఖఙ్కిఞ్చిదాత్మాపరాధజమ్ ॥ 5 ॥
అబ్రవీచ్చసుసఙ్కృద్ధోదుర్ముఖోనామరాక్షసః ।
ఇదన్నక్షమణీయంహిసర్వేషాన్నఃప్రధర్షణమ్ ॥ 6 ॥
అయమ్పరిభవోభూయఃపురస్యాన్తఃపురస్యచ ।
శ్రీమతోరాక్షసేన్ద్రస్యవానరేణప్రధర్షణమ్ ॥ 7 ॥
అస్మిన్ ముహూర్తేగత్వైకోనివర్తిష్యామివానరాన్ ।
ప్రవిష్టాన్ సాగరమ్భీమమమ్బరంవారసాతలమ్ ॥ 8 ॥
తతోఽబ్రవీత్సుసఙ్కృద్ధోవజ్రదంష్ట్రోమహాబలః ।
ప్రగృహ్యపరిఘఙ్ఘోరమ్మాంసశోణితరూషితమ్ ॥ 9 ॥
కింవోహనుమతాకార్యఙ్కృపణేనతపస్వినా ।
రామేతిష్ఠతిదుర్ధర్షేససుగ్రీవేఽపిసలక్ష్మణే ॥ 10 ॥
అద్యరామంససుగ్రీవమ్పరిఘేణసలక్ష్మణమ్ ।
ఆగమిష్యామిహత్వైకోవిక్షోభ్యహరివాహినీమ్ ॥ 11 ॥
ఇదమ్మమాపరంవాక్యంశృణురాజన్ యదీచ్ఛసి ।
ఉపాయకుశలోహ్యేవజయేచ్ఛత్రూనతన్ద్రితః ॥ 12 ॥
కామరూపధరాశ్శూరాస్సుభీమాభీమదర్శనాః ।
రాక్షసావైసహస్రాణిరాక్షసాధిపనిశ్చితాః ॥ 13 ॥
కాకుత్స్థముపసఙ్గమ్యబిభ్రతోమానుషంవపుః ।
సర్వేహ్యసమ్భ్రమాభూత్వాబ్రువన్తురఘుసత్తమమ్ ॥ 14 ॥
ప్రేషితాభరతేనైవభ్రాత్రాతవయవీయసా ।
సహిసేనాంసముత్థాప్యక్షిప్రమేవోపయాస్యతి ॥ 15 ॥
తతోవయమితస్తూర్ణంశూలశక్తిగదాధరాః ।
చాపబాణాసిహస్తాశ్చత్వరితాస్తత్రయామహే ॥ 16 ॥
ఆకాశేగణశస్థ్సిత్వాహత్వాతాంహరివాహినీమ్ ।
అశ్మశస్త్రమహావృష్ట్యాప్రాపయామయమక్షయమ్ ॥ 17 ॥
ఏవఞ్చేదుపసర్పేతామనయంరామలక్ష్మణౌ ।
అవశ్యమపనీతేనజహతామేవజీవితమ్ ॥ 18 ॥
కౌమ్భకర్ణిస్తతోవీరోనికుమ్భోనామవీర్యవాన్ ।
అబ్రవీత్పరమక్రుద్ధోరావణంలోకరావణమ్ ॥ 19 ॥
సర్వేభవన్తస్తిష్ఠన్తుమహారాజేనసఙ్గతాః ।
అహమేకోహనిష్యామిరాఘవంసహలక్ష్మణమ్ ॥ 20 ॥
సుగ్రీవఞ్చహనూమన్తంసర్వాన్నేవచవానరాన్ ।
తతోవజ్రహనుర్నామరాక్షసఃపర్వతోపమః ॥ 21 ॥
క్రుద్ధః పరిలిహన్సృక్కాఞ్జిహ్వయావాక్యమబ్రవీత్ ।
స్వైరఙ్కుర్వన్తుకర్మాణిభవన్తోవిగతజ్వరాః ॥ 22 ॥
ఏకోఽహమ్భక్షయిష్యామితాంసర్వాంహరియూథపాన్ ।
స్వస్థాఃక్రీడన్తునిశ్చిన్తాఃపిబన్తుమధువారుణీమ్ ॥ 23 ॥
అహమేకోవధిష్యామిసుగ్రీవంసహలక్ష్మణమ్ ।
సాఙ్గదఞ్చహనూమన్తంరామఞ్చరణకుఞ్జరమ్ ॥ 24 ॥
ఇత్యార్షే శ్రీమద్రామాయణే వాల్మీకీయ ఆదికావ్యే యుద్ధకాణ్డే అష్టమస్సర్గః ॥
