శ్రీమద్వాల్మీకీయ రామాయణే అరణ్యకాణ్డమ్ ।
అథ ద్వాత్రింశస్సర్గః ।
తతశ్శూర్పణఖా దృష్ట్వా సహస్రాణి చతుర్దశ ।
హతాన్యేకేన రామేణ రక్షసాం భీమకర్మణామ్ ॥ 1 ॥
దూషణం చ ఖరం చైవ హతం త్రిశిరసా సహ ।
దృష్ట్వా పునర్మహానాదం ననాద జలదో యథా ॥ 2 ॥
సా దృష్ట్వా కర్మ రామస్య కృతమన్యైస్సుదుష్కరమ్ ।
జగామ పరమోద్విగ్నా లఙ్కాం రావణపాలితామ్ ॥ 3 ॥
సా దదర్శ విమానాగ్రే రావణం దీప్తతేజసమ్ ।
ఉపోపవిష్టం సచివైర్మరుద్భిరివ వాసవమ్ ॥ 4 ॥
ఆసీనం సూర్యసఙ్కాశే కాఞ్చనే పరమాసనే ।
రుక్మవేదిగతం ప్రాజ్యం జ్వలన్తమివ పావకమ్ ॥ 5 ॥
దేవగన్ధర్వభూతానామృషీణాం చ మహాత్మనామ్ ।
అజేయం సమరే శూరం వ్యాత్తాననమివాన్తకమ్ ॥ 6 ॥
దేవాసురవిమర్దేషు వజ్రాశనికృతవ్రణమ్ ।
ఐరావతవిషాణగ్రైరుద్ఘృష్టకిణవక్షసమ్ ॥ 7 ॥
వింశద్భుజం దశగ్రీవం దర్శనీయపరిచ్ఛదమ్ ।
విశాలవక్షసం వీరం రాజలక్షణ శోభితమ్ ॥ 8 ॥
స్నిగ్ధవైడూర్యసఙ్కాశం తప్తకాఞ్చనకుణ్డలమ్ ।
సుభుజం శుక్లదశనం మహాస్యం పర్వతోపమమ్ ॥ 9 ॥
విష్ణుచక్రనిపాతైశ్చ శతశో దేవసంయుగే ।
అన్యైశ్శస్త్రప్రహారైశ్చ మహాయుద్ధేషు తాడితమ్ ॥ 10 ॥
అహతాఙ్గం సమస్తైశ్చ దేవప్రహరణైస్తథా ।
అక్షోభ్యాణాం సముద్రాణాం క్షోభణం క్షిప్రకారిణమ్ ॥ 11 ॥
క్షేప్తారం పర్వతేన్ద్రాణాం సురాణాం చ ప్రమర్దనమ్ ।
ఉచ్ఛేత్తారం చ ధర్మాణాం పరదారాభిమర్శనమ్ ॥ 12 ॥
సర్వదివ్యాస్త్రయోక్తారం యజ్ఞవిఘ్నకరం సదా ।
పురీం భోగవతీం ప్రాప్య పరాజిత్య చ వాసుకిమ్ ॥ 13 ॥
తక్షకస్య ప్రియాం భార్యాం పరాజిత్య జహార యః ।
కైలాసపర్వతం గత్వా విజిత్య నరవాహనమ్ ।
విమానం పుష్పకం తస్య కామగం వై జహార యః ॥ 14 ॥
వనం చైత్రరథం దివ్యం నలినీం నన్దనం వనమ్ ।
వినాశయతి యః క్రోధాద్దేవోద్యానాని వీర్యవాన్ ॥ 15 ॥
చన్ద్రసూర్యౌ మహాభాగావుత్తిష్ఠన్తౌ పరన్తపౌ ।
నివారయతి బాహుభ్యాం యశ్శైలశిఖరోపమః ॥ 16 ॥
దశవర్షసహస్రాణి తపస్తప్వా మహావనే ।
పురా స్వయమ్భువే ధీరశ్శిరాంస్యుపజహార యః ॥ 17 ॥
దేవదానవగన్ధర్వపిశాచపతగోరగైః ।
అభయం యస్య సఙ్గ్రామే మృత్యుతో మానుషాదృతే ॥ 18 ॥
మన్త్రైరభిష్టుతం పుణ్యమధ్వరేషు ద్విజాతిభిః ।
హవిర్ధానేషు యస్సోమముపహన్తి మహాబలః ॥ 19 ॥
ఆప్తయజ్ఞహరం క్రూరం బ్రహ్మఘ్నం దుష్టచారిణమ్ ।
కర్కశం నిరనుక్రోశం ప్రజానామహితే రతమ్ ॥ 20 ॥
రావణం సర్వభూతానాం సర్వలోకభయావహమ్ ।
రాక్షసీ భ్రాతరం శూరం సా దదర్శ మహాబలమ్ ॥ 21 ॥
తం దివ్యవస్త్రాభరణం దివ్యమాల్యోపశోభితమ్ ।
ఆసనే సూపవిష్టం చ కాలకాలమివోద్యతమ్ ॥ 22 ॥
రాక్షసేన్ద్రం మహాభాగం పౌలస్త్యకులనన్దనమ్ ॥ 23 ॥
రావణం శత్రుహన్తారం మన్త్రిభిః పరివారితమ్ ।
అభిగమ్యాబ్రవీద్వాక్యం రాక్షసీ భయవిహ్వలా ॥ 24 ॥
తమబ్రవీద్దీప్తవిశాలలోచనం ప్రదర్శయిత్వా భయమోహమూర్ఛితా ।
సుదారుణం వాక్యమభీతచారిణీ మహాత్మనా శూర్పణఖా విరూపితా ॥ 25 ॥
ఇత్యార్షే శ్రీమద్రామాయణే వాల్మీకీయ ఆదికావ్యే అరణ్యకాణ్డే ద్వాత్రింశస్సర్గః ॥
