శ్రీమద్వాల్మీకీయ రామాయణే అరణ్యకాణ్డమ్ ।
అథ సప్తవింశస్సర్గః ।
ఖరం తు రామాభిముఖం ప్రయాన్తం వాహినీపతిః ।
రాక్షసస్త్రిశిరా నామ సన్నిపత్యేదమబ్రవీత్ ॥ 1 ॥
మాం నియోజయ విక్రాన్త సన్నివర్తస్వ సాహసాత్ ।
పశ్య రామం మహాబాహుం సంయుగే వినిపాతితమ్ ॥ 2 ॥
ప్రతిజానామి తే సత్యమాయుధం చాహమాలభే ।
యథా రామం వధిష్యామి వధార్హం సర్వరక్షసామ్ ॥ 3 ॥
అహం వాస్య రణే మృత్యురేష వా సమరే మమ ।
వినివృత్య రణోత్సాహాన్ముహూర్తం ప్రాశ్నికో భవ ॥ 4 ॥
ప్రహృష్టో వా హతే రామే జనస్థానం ప్రయాస్యసి ।
మయి వా నిహతే రామం సంయుగాయోపయాస్యసి ॥ 5 ॥
ఖరస్త్రిశిరసా తేన మృత్యులోభాత్ప్రసాదితః ।
గచ్ఛ యుధ్యేత్యనుజ్ఞాతో రాఘవాభిముఖో యయౌ ॥ 6 ॥
త్రిశిరాశ్చ రథేనైవ వాజియుక్తేన భాస్వతా ।
అభ్యద్రవద్రణే రామం త్రిశృఙ్గ ఇవ పర్వతః ॥ 7 ॥
శరధారాసమూహాన్స మహామేఘ ఇవోత్సృజన్ ।
వ్యసృజత్సదృశం నాదం జలార్ద్రస్య తు దున్దుభేః ॥ 8 ॥
ఆగచ్ఛన్తం త్రిశిరసం రాక్షసం ప్రేక్ష్య రాఘవః ।
ధనుషా ప్రతిజగ్రాహ విధున్వన్సాయకాన్ శితాన్ ॥ 9 ॥
స సమ్ప్రహారస్తుములో రామత్రిశిరసోర్మహాన్ ।
బభూవాతీవ బలినోస్సింహకుఞ్జరయోరివ ॥ 10 ॥
తతస్త్రిశిరసా బాణైర్లలాటే తాడితస్త్రిభిః ।
అమర్షీ కుపితోరామస్సంరబ్ధమిదమబ్రవీత్ ॥ 11 ॥
అహో విక్రమశూరస్య రాక్షసస్యేదృశం బలమ్ ।
పుష్పైరివ శరైర్యస్య లలాటేఽస్మిన్పరిక్షతః ॥ 12 ॥
మమాపి ప్రతిగృహ్ణీష్వ శరాంశ్చాపగుణాచ్చ్యుతాన్ ।
ఏవముక్త్వా తు సంరబ్ధశ్శరానాశీవిషోపమాన్ ॥ 13 ॥
త్రిశిరోవక్షసి క్రుద్ధో నిజఘాన చతుర్దశ ।
చతుర్భిస్తురగానస్య శరైః సన్నతపర్వభిః ॥ 14 ॥
న్యపాతయత తేజస్వీ చతురస్తస్య వాజినః ।
అష్టభిస్సాయకైస్సూతం రథోపస్థాన్న్యపాతయత్ ॥ 15 ॥
రామశ్చిచ్ఛేద బాణేన ధ్వజం చాస్య సముచ్ఛ్రితమ్ ।
తతో హతరథాత్తస్మాదుత్పతన్తం నిశాచరమ్ ॥ 16 ॥
బిభేద రామస్తం బాణైర్హృదయే సోఽభవజ్జడః ।
సాయకైశ్చాప్రమేయాత్మా సామర్షస్తస్య రక్షసః ॥ 17 ॥
శిరాంస్యపాతయద్రామో వేగవద్భిస్త్రిభిశ్శితైః ।
స భూమౌ రుధిరోద్గారీ రామబాణాభిపీడితః ॥ 18 ॥
న్యపతత్పతితైః పూర్వం స్వశిరోభిర్నిశాచరః ।
హతశేషాస్తతో భగ్నా రాక్షసాః ఖరసంశ్రయా ॥ 19 ॥
ద్రవన్తి స్మ న తిష్ఠన్తి వ్యాఘ్రత్రస్తా మృగా ఇవ ।
తాన్ఖరో ద్రవతో దృష్ట్వా నివర్త్య రుషితస్స్వయమ్ ॥ 20 ॥
ఇత్యార్షే శ్రీమద్రామాయణే వాల్మీకీయ ఆదికావ్యే అరణ్యకాణ్డే సప్తవింశస్సర్గః ॥
