శ్రీమద్వాల్మీకీయ రామాయణే బాలకాణ్డమ్ ।
అథ చతుస్త్రింశస్సర్గః ।
కృతోద్వాహే గతే తస్మిన్ బ్రహ్మదత్తే చ రాఘవ ।
అపుత్రః పుత్రలాభాయ పౌత్రీమిష్టిమకల్పయత్ ॥ 1 ॥
ఇష్ట్యాం తు వర్తమానాయాం కుశనాభం మహీపతిమ్ ।
ఉవాచ పరమోదారః కుశో బ్రహ్మసుతస్తదా ॥ 2 ॥
పుత్రస్తే సదృశః పుత్ర భవిష్యతి సుధార్మికః ।
గాధిం ప్రాప్స్యసి తేన త్వం కీర్తిం లోకే చ శాశ్వతీమ్ ॥ 3 ॥
ఏవముక్త్వా కుశో రామ కుశనాభం మహీపతిమ్ ।
జగామాకాశమావిశ్య బ్రహ్మలోకం సనాతనామ్ ॥ 4 ॥
కస్య చిత్త్వథ కాలస్య కుశనాభస్య ధీమతః ।
జజ్ఞే పరమధర్మిష్ఠో గాధిరిత్యేవ నామతః ॥ 5 ॥
స పితా మమ కాకుత్స్థ గాధిః పరమధార్మికః ।
కుశవంశప్రసూతోఽస్మి కౌశికో రఘునన్దన ॥ 6 ॥
పూర్వజా భగినీ చాపి మమ రాఘవ సువ్రతా ।
నామ్నా సత్యవతీ నామ ఋచీకే ప్రతిపాదితా ॥ 7 ॥
సశరీరా గతా స్వర్గం భర్తారమనువర్తినీ ।
కౌశికీ పరమోదారా ప్రవృత్తా చ మహానదీ ॥ 8 ॥
దివ్యా పుణ్యోదకా రమ్యా హిమవన్తముపాశ్రితా ।
లోకస్య హితకామార్థం ప్రవృత్తా భగినీ మమ ॥ 9 ॥
తతోఽహం హిమవత్పార్శ్వే వసామి నిరతస్సుఖమ్ ।
భగిన్యాం స్నేహసంయుక్తః కౌశిక్యాం రఘునన్దన ॥ 10 ॥
సా తు సత్యవతీ పుణ్యా సత్యే ధర్మే ప్రతిష్ఠితా ।
పతివ్రతా మహాభాగా కౌశికీ సరితాం వరా ॥ 11 ॥
అహం హి నియమాద్రామ హిత్వా తాం సముపాగతః ।
సిద్ధాశ్రమమనుప్రాప్య సిద్ధోఽస్మి తవ తేజసా ॥ 12 ॥
ఏషా రామ మమోత్పత్తిస్స్వస్య వంశస్య కీర్తితా ।
దేశస్య చ మహాబాహో యన్మాం త్వం పరిపృచ్ఛసి ॥ 13 ॥
గతోఽర్ధరాత్రః కాకుత్స్థ కథాః కథయతో మమ ।
నిద్రామభ్యేహి భద్రం తే మా భూద్విఘ్నోఽధ్వనీహ నః ॥ 14 ॥
నిష్పన్దాస్తరవస్సర్వే నిలీనమృగపక్షిణః ।
నైశేన తమసా వ్యాప్తా దిశశ్చ రఘునన్దన ॥ 15 ॥
శనైర్వియుజ్యతే సన్ధ్యా నభో నేత్రైరివావృతమ్ ।
నక్షత్రతారాగహనం జ్యోతిర్భిరివ భాసతే ॥ 16 ॥
ఉత్తిష్ఠతి చ శీతాంశుశ్శశీ లోకతమోనుదః ।
హ్లాదయన్ ప్రాణినాం లోకే మనాంసి ప్రభయా విభో ॥ 17 ॥
నైశాని సర్వభూతాని ప్రచరన్తి తతస్తతః ।
యక్షరాక్షససఙ్ఘాశ్చ రౌద్రాశ్చ పిశితాశనాః ॥ 18 ॥
ఏవముక్త్వా మహాతేజా విరరామ మహామునిః ।
సాధు సాధ్వితి తం సర్వే ఋషయో హ్యభ్యపూజయన్ ॥ 19 ॥
కుశికానామయం వంశో మహాన్ ధర్మపరస్సదా ।
బ్రహ్మోపమా మహాత్మానః కుశవంశ్యా నరోత్తమాః ॥ 20 ॥
విశేషేణ భవానేవ విశ్వామిత్రో మహాయశాః ।
కౌశికీ సరితాం శ్రేష్ఠా కులోద్యోతకరీ తవ ॥ 21 ॥
ఇతి తైర్మునిశార్దూలైః ప్రశస్తః కుశికాత్మజః ।
నిద్రాముపాగమచ్ఛ్రీమాన్ అస్తఙ్గత ఇవాంశుమాన్ ॥ 22 ॥
రామోఽపి సహసౌమిత్రిః కిఞ్చిదాగతవిస్మయః ।
ప్రశస్య మునిశార్దూలం నిద్రాం సముపసేవతే ॥ 23 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాణ్డే చతుస్త్రింశస్సర్గః ॥
