శ్రీమద్వాల్మీకీయ రామాయణే కిష్కిన్ధాకాణ్డమ్ ।
అథ ఏకవింశస్సర్గః ।
తతో నిపతితాం తారాం చ్యుతాం తారామివామ్బరాత్ ।
శనైరాశ్వాసయామాస హనుమాన్హరియూథపః ॥ 1 ॥
గుణదోషకృతం జన్తుస్స్వకర్మ ఫలహేతుకమ్ ।
అవ్యగ్రస్తదవాప్నోతి సర్వం ప్రేత్య శుభాశుభమ్ ॥ 2 ॥
శోచ్యా శోచసి కం శోచ్యం దీనం దీనాఽనుకమ్పసే ।
కస్య కోవాఽనుశోచ్యోఽస్తి దేహేఽస్మిన్ బుద్బుదోపమే ॥ 3 ॥
అఙ్గదస్తు కుమారోఽయం ద్రష్టవ్యో జీవపుత్రయా ।
అయత్యాం చ విధేయాని సమర్థాన్యస్య చిన్తయ ॥ 4 ॥
జానాస్యనియతామేవం భూతానామాగతిం గతిమ్ ।
తస్మాచ్ఛుభం హి కర్తవ్యం పణ్డితేనైహ లౌకికమ్ ॥ 5 ॥
యస్మిన్హరిసహస్రాణి ప్రయుతాన్యర్బుదాని చ ।
వర్తయన్తి కృతాంశాని సోఽయం దిష్టాన్తమాగతః ॥ 6 ॥
యదయం న్యాయదృష్టార్థస్సామదానక్షమాపరః ।
గతో ధర్మజితాం భూమిం నైనం శోచితుమర్హసి ॥ 7 ॥
సర్వే హి హరిశార్దూలాః పుత్రశ్చాయం తవాఙ్గదః ।
ఇదం హర్యృక్షపతిరాజ్యం చ త్వత్సనాథమనిన్దితే ॥ 8 ॥
తావిమౌ శోకసన్తప్తౌ శనైః ప్రేరయ భామిని ।
త్వయా పరిగృహీతోఽయమఙ్గదశ్శాస్తు మేదినీమ్ ॥ 9 ॥
సన్తతిశ్చ యథా దృష్టా కృత్యం యచ్చాపి సామ్ప్రతమ్ ।
రాజ్ఞస్తత్క్రియతాం సర్వమేష కాలస్య నిశ్చయః ॥ 10 ॥
సంస్కార్యో హరిరాజశ్చ అఙ్గదశ్చాభిషిచ్యతామ్ ।
సింహాసనగతం పుత్రం పశ్యన్తీ శాన్తిమేష్యసి ॥ 11 ॥
సా తస్య వచనం శ్రుత్వా భర్తృవ్యసనపీడితా ।
అబ్రవీదుత్తరం తారా హనూమన్తమవస్థితమ్ ॥ 12 ॥
అఙ్గదప్రతిరూపాణాం పుత్రాణామేకతశ్శతమ్ ।
హతస్యాప్యస్య వీరస్య గాత్రసంశ్లేషణం వరమ్ ॥ 13 ॥
న చాహం హరిరాజస్య ప్రభవామ్యఙ్గదస్య వా ।
పితృవ్యస్తస్య సుగ్రీవస్సర్వకార్యేష్వనన్తరః ॥ 14 ॥
న హ్యేషాబుద్ధిరాస్థేయా హనూమన్నఙ్గదం ప్రతి ।
పితా హి బన్ధుః పుత్రస్య న మాతా హరిసత్తమ ॥ 15 ॥
న హి మమ హరిరాజసంశ్రయాత్ క్షమతరమస్తి పరత్ర చేహ వా ।
అభిముఖహతవీరసేవితం శయనమిదం మమ సేవితుం క్షమమ్ ॥ 16 ॥
ఇత్యార్షే శ్రీమద్రామాయణే వాల్మీకీయ ఆదికావ్యే కిష్కిన్ధాకాణ్డే ఏకవింశస్సర్గః ॥
