శ్రీమద్వాల్మీకీయ రామాయణే అరణ్యకాణ్డమ్ ।
అథ అష్టమస్సర్గః ।
రామస్తు సహసౌమిత్రిస్సుతీక్ష్ణేనాభిపూజితః ।
పరిణామ్య నిశాం తత్ర ప్రభాతే ప్రత్యబుధ్యత ॥ 1 ॥
ఉత్థాయ తు యథాకాలం రాఘవస్సహసీతయా ।
ఉపస్పృశ్యసుశితేన జలేనోత్పలగన్ధినా ॥ 2 ॥
అథ తేఽగ్నిం సురాంశ్చైవ వైదేహీ రామలక్ష్మణౌ ।
కాల్యం విధివదభ్యర్చ్య తపస్విశరణే వనే ॥ 3 ॥
ఉదయన్తం దినకరం దృష్ట్వా విగతకల్మషాః ।
సుతీక్ష్ణభిగమ్యేదం శ్లక్ష్ణం వచనమబ్రువన్ ॥ 4 ॥
సుఖోషితాస్స్మభగవంస్త్వయా పూజ్యేన పూజితాః ।
ఆపృచ్ఛామః ప్రయాస్యామో మునయస్త్వరయన్తి నః ॥ 5 ॥
త్వరామహే వయం ద్రష్టుం కృత్స్నమాశ్రమమణ్డలమ్ ।
ఋషీణాం పుణ్యశీలానాం దణ్డకారణ్యవాసినామ్ ॥ 6 ॥
అభ్యనుజ్ఞాతుమిచ్ఛామస్సహైభిర్మునిపుఙ్గవైః ।
ధర్మనిత్యైస్తపోదాన్తైర్విశిఖైరివ పావకైః ॥ 7 ॥
అవిషహ్యాతపో యావత్సూర్యో నాతివిరాజతే ।
అమార్గేణాగతాం లక్ష్మీం ప్రాప్యేవాన్వయవర్జితః ॥ 8 ॥
తావదిచ్ఛామహే గన్తుమిత్యుక్త్వా చరణౌ మునేః ।
వవన్దే సహసౌమిత్రిస్సీతయా సహ రాఘవః ॥ 9 ॥
తౌ సంస్పృశన్తౌ చరణావుత్థాప్య మునిపుఙ్గవః ।
గాఢమాలిఙ్గ్య సస్నేహమిదం వచనమబ్రవీత్ ॥ 10 ॥
అరిష్టం గచ్ఛ పన్థానం రామ సౌమిత్రిణా సహ ।
సీతయా చానయా సార్ధం ఛాయయేవానువృత్తయా ॥ 11 ॥
పశ్యాశ్రమపదం రమ్యం దణ్డకారణ్యవాసినామ్ ।
ఏషాం తపస్వినాం వీర తపసా భావితాత్మనామ్ ॥ 12 ॥
సప్రాజ్యఫలమూలాని పుష్పితాని వనాని చ ।
ప్రశస్తమృగయూథాని శాన్తపక్షిగణాని చ ॥ 13 ॥
ఫుల్లపఙ్కజషణ్డాని ప్రసన్నసలిలాని చ ।
కారణ్డవవికీర్ణాని తటాకాని సరాంసి చ ॥ 14 ॥
ద్రక్ష్యసే దృష్టిరమ్యాణి గిరిప్రస్రవణాని చ ।
రమణీయాన్యరణ్యాని మయూరాభిరుతాని చ ॥ 15 ॥
గమ్యతాం వత్స సౌమిత్రే భవానపి చ గచ్ఛతు ।
ఆగన్తవ్యం చ తే దృష్ట్వా పునరేవాశ్రమం మమ ॥ 16 ॥
ఏవముక్తస్తథేత్యుక్త్వా కాకుత్స్థస్సహలక్ష్మణః ।
ప్రదక్షిణం మునిం కృత్వా ప్రస్థాతుముపచక్రమే ॥ 17 ॥
తతశ్శుభతరే తూణీ ధనుషీ చాయతేక్షణా ।
దదౌ సీతా తయోర్భ్రాత్రోః ఖఙ్గౌ చ విమలౌ తతః ॥ 18 ॥
ఆబధ్య చ శుభే తూణీ చాపే చాదాయ సుస్వనౌ ।
నిష్క్రాన్తావాశ్రమాద్గన్తుముభౌ తౌ రామలక్ష్మణౌ ॥ 19 ॥
శ్రీమన్తౌ రూపసమ్పన్నౌ దీప్యమానౌ స్వతేజసా ।
ప్రస్థితౌ ధృతచాపౌ తౌ సీతయా సహ రాఘవౌ ॥ 20 ॥
ఇత్యార్షే శ్రీమద్రామాయణే వాల్మీకీయ ఆదికావ్యే అరణ్యకాణ్డే అష్టమస్సర్గః ॥
