శ్రీమద్వాల్మీకీయ రామాయణే అరణ్యకాణ్డమ్ ।
అథ ద్వాదశస్సర్గః ।
సప్రవిశ్యాఽశ్రమపదం లక్ష్మణో రాఘవానుజః ।
అగస్త్యశిష్యమాసాద్య వాక్యమేతదువాచ హ ॥ 1 ॥
రాజా దశరథో నామ జ్యేష్ఠస్తస్య సుతో బలీ ।
రామః ప్రాప్తో మునిం ద్రష్టుం భార్యయా సహ సీతయా ॥ 2 ॥
లక్ష్మణో నామ తస్యాహం భ్రాతా త్వవరజో హితః ।
అనుకూలశ్చ భక్తశ్చ యది తే శ్రోత్రమాగతః ॥ 3 ॥
తే వయం వనమత్యుగ్రం ప్రవిష్టాః పితృశాసనాత్ ।
ద్రష్టుమిచ్ఛామహే సర్వే భగవన్తం నివేద్యతామ్ ॥ 4 ॥
తస్య తద్ వచనం శ్రుత్వా లక్ష్మణస్య తపోధనః ।
తథేత్యుక్త్వాఽగ్నిశరణం ప్రవివేశ నివేదితుమ్ ॥ 5 ॥
స ప్రవిశ్య మునిశ్రేష్ఠం తపసా దుష్ప్రధర్షణమ్ ।
కృతాఞ్జలిరువాచేదం రామాగమనమఞ్జసా ॥ 6 ॥
యథోక్తం లక్ష్మణేనైవ శిష్యోఽగస్త్యస్య సమ్మతః ।
పుత్రౌ దశరథస్యేమౌ రామో లక్ష్మణ ఏవ చ ॥ 7 ॥
ప్రవిష్టావాశ్రమపదం సీతయా సహ భార్యయా ।
ద్రష్టుం భవన్తమాయాతౌ శుశ్రూషార్థమరిన్దమౌ ॥ 8 ॥
యదత్రానన్తరం తత్త్వమాజ్ఞాపయితుమర్హసి ।
తతశ్శిష్యాదుపశ్రుత్య ప్రాప్తం రామం సలక్ష్మణమ్ ॥ 9 ॥
వైదేహీం చ మహాభాగామిదం వచనమబ్రవీత్ ।
దిష్ట్యా రామశ్చిరస్యాద్య ద్రష్టుం మాం సముపాగతః ॥ 10 ॥
మనసా కాఙ్క్షితం హ్యస్య మయాప్యాగమనం ప్రతి ।
గమ్యతాం సత్కృతో రామస్సభార్యస్సహలక్ష్మణః ॥ 11 ॥
ప్రవేశ్యతాం సమీపం మే కిం చాసౌ న ప్రవేశితః ।
ఏవముక్తస్తు మునినా ధర్మజ్ఞేన మహాత్మనా ॥ 12 ॥
అభివాద్యాబ్రవీచ్ఛిష్యస్తథేతి నియతాఞ్జలిః ।
తతో నిష్క్రమ్య సమ్భ్రాన్తశ్శిష్యో లక్ష్మణమబ్రవీత్ ॥ 13 ॥
క్వాసౌ రామో మునిం ద్రష్టుమేతు ప్రవిశతు స్వయమ్ ।
తతో గత్వాఽఽశ్రమపదం శిష్యేణ సహ లక్ష్మణః ॥ 14 ॥
దర్శయామాస కాకుత్స్థం సీతాం చ జనకాత్మజామ్ ।
తం శిష్యః ప్రశ్రితో వాక్యమగస్త్యవచనం బ్రువన్ ॥ 15 ॥
ప్రావేశయద్యథాన్యాయం సత్కారార్హం సుసత్కృతమ్ ।
ప్రవివేశ తతో రామస్సీతయా సహలక్ష్మణః ॥ 16 ॥
ప్రశాన్తహరిణాకీర్ణమాశ్రమం హ్యవలోకయన్ ।
స తత్ర బ్రహ్మణః స్థానమగ్నేః స్థానం తథైవ చ ॥ 17 ॥
విష్ణోః స్థానం మహేన్ద్రస్య స్థానం చైవ వివస్వతః ।
సోమస్థానం భగస్థానం స్థానం కౌబేరమేవ చ ॥ 18 ॥
దాతుర్విధాతుః స్థానేచ వాయోః స్థానం తథైవ చ ।
నాగరాజస్య చ స్థానమనన్తస్య మహాత్మనః ॥ 19 ॥
స్థానం తథైవ గాయత్ర్యా వసూనాం స్థానమేవ చ ।
స్థానం చ పాశహస్తస్య వరుణస్య మహాత్మనః ॥ 20 ॥
కార్తికేయస్య చ స్థానం ధర్మస్థానం చ పశ్యతి ।
స తత్ర బ్రహ్మణః స్థానమగ్నేః స్థానం తథైవ చ ॥ 21 ॥
విష్ణోః స్థానం మహేన్ద్రస్య స్థానం చైవ వివస్వతః ।
సోమస్థానం భగస్థానం స్థానం కౌబేరమేవ చ ॥ 22 ॥
ధాతుర్విధాతుః స్థానం చ వాయోః స్థానం తథైవ చ ।
నాగరాజస్య చ స్థానమనన్తస్య మహాత్మనః ॥ 23 ॥
స్థానం తథైవ గాయత్ర్యా వసూనాం స్థానమేవ చ ।
స్థానం చ పాశహస్తస్య వరుణస్య మహాత్మనః ॥ 24 ॥
కార్తికేయస్య చ స్థానం ధర్మస్థానం చ పశ్యతి ।
స తత్ర బ్రహ్మణః స్థానమగ్నేః స్థానం తథైవ చ ॥ 25 ॥
విష్ణోః స్థానం మహేన్ద్రస్య స్థానం చైవ వివస్వతః ।
సోమస్థానం భగస్థానం స్థానం కౌబేరమేవ చ ॥ 26 ॥
దాతుర్విధాతుః స్థానేచ వాయోః స్థానం తథైవ చ ।
నాగరాజస్య చ స్థానమనన్తస్య మహాత్మనః ॥ 27 ॥
స్థానం తథైవ గాయత్ర్యా వసూనాం స్థానమేవ చ ।
స్థానం చ పాశహస్తస్య వరుణస్య మహాత్మనః ॥ 28 ॥
కార్తికేయస్య చ స్థానం ధర్మస్థానం చ పశ్యతి ।
తతశ్శిష్యైః పరివృతో మునిరప్యభినిష్పతత్ ॥ 29 ॥
తం దదర్శాగ్రతో రామో మునీనాం దీప్తతేజసామ్ ।
అబ్రవీద్వచనం వీరో లక్ష్మణం లక్ష్మివర్ధనమ్ ॥ 30 ॥
ఏష లక్ష్మణ నిష్క్రామత్యగస్త్యో భగవానృషిః ।
ఔదార్యేణావగచ్ఛామి నిధానం తపసామిమమ్ ॥ 31 ॥
ఏవముక్త్వా మహాబాహురగస్త్యం సూర్యవర్చసమ్ ।
జగ్రాహ పరమప్రీతస్తస్య పాదౌ పరన్తపః ॥ 32 ॥
అభివాద్య తు ధర్మాత్మా తస్థౌ రామః కృతాఞ్జలిః ।
సీతయా సహ వైదేహ్యా తదా రామః సలక్ష్మణః ॥ 33 ॥
ప్రతిజగ్రాహ కాకుత్స్థమర్చయిత్వాసనోదకైః ।
కుశలప్రశ్నముక్త్వా చ ఆస్యతామితి చాబ్రవీత్ ॥ 34 ॥
అగ్నిం హుత్వా ప్రదాయార్ఘ్యమతిథీన్ ప్రతిపూజ్య చ ।
వానప్రస్థ్యేన ధర్మేణ స తేషాం భోజనం దదౌ ॥ 35 ॥
ప్రథమం చోపవిశ్యాథ ధర్మజ్ఞో మునిపుఙ్గవః ।
ఉవాచ రామమాసీనం ప్రాఞ్జలిం ధర్మకోవిదమ్ ॥ 36 ॥
అగ్నిం హుత్వా ప్రదాయార్ఘ్యమతిథిం ప్రతిపూజయేత్ ।
అన్యథా ఖలు కాకుత్స్థ తపస్వీ సముదాచరన్ ॥ 37 ॥
దుఃసాక్షీవ పరే లోకే స్వాని మాంసాని భక్షయేత్ ।
రాజా సర్వస్య లోకస్య ధర్మచారీ మహారథః ॥ 38 ॥
పూజనీయశ్చ మాన్యశ్చ భవాన్ ప్రాప్తః ప్రియాతిథిః ।
ఏవముక్త్వా ఫలైర్మూలైః పుష్పైరన్యైశ్చ రాఘవమ్ ॥ 39 ॥
పూజయిత్వా యథాకామం పునరేవ తతోఽబ్రవీత్ ।
ఇదం దివ్యం మహచ్చాపం హేమరత్నవిభూషితమ్ ॥ 40 ॥
వైష్ణవం పురుషవ్యాఘ్ర నిర్మితం విశ్వకర్మణా ।
అమోఘస్సూర్యసఙ్కాశో బ్రహ్మదత్తశ్శరోత్తమః ॥ 41 ॥
దత్తౌ మమ మహేన్ద్రేణ తూణీ చాక్షయసాయకౌ ।
సమ్పూర్ణౌ నిశితైర్బాణైర్జ్వలద్భిరివ పావకైః ॥ 42 ॥
మహారజతకోశోఽయమసిర్హేమవిభూషితః ।
అనేన ధనుషా రామ హత్వా సఙ్ఖ్యే మహాసురాన్ ॥ 43 ॥
ఆజహార శ్రియం దీప్తాం పురా విష్ణుర్దివౌకసామ్ ।
తద్ధనుస్తౌ చ తూణీరౌ శరం ఖఙ్గం చ మానద ॥ 44 ॥
జయాయ ప్రతిగృహ్ణీష్వ వజ్రం వజ్రధరో యథా ।
ఏవముక్త్వా మహాతేజాః సమస్తం తద్వరాయుధమ్ ।
దత్వా రామాయ భగవానగస్త్యః పునరబ్రవీత్ ॥ 45 ॥
ఇత్యార్షే శ్రీమద్రామాయణే వాల్మీకీయ ఆదికావ్యే అరణ్యకాణ్డే ద్వాదశస్సర్గః ॥
