శ్రీమద్వాల్మీకీయ రామాయణే బాలకాణ్డమ్ ।
అథ సప్తచత్వారింశస్సర్గః ।
సప్తధాతు కృతే గర్భే దితిః పరమదుఃఖితా ।
సహస్రాక్షం దురాధర్షం వాక్యం సానునయాఽబ్రవీత్ ॥ 1 ॥
మమాపరాధాద్గర్భోఽయం సప్తధా విఫలీకృతః ।
నాపరాధోఽస్తి దేవేశ తవాత్ర బలసూదన ॥ 2 ॥
ప్రియం తు కర్తుమిచ్ఛామి మమ గర్భవిపర్యయే ।
మరుతాం సప్తసప్తానాం స్థానపాలా భవన్త్విమే ॥ 3 ॥
వాతస్కన్ధాః ఇమే సప్త చరన్తు దివి పుత్రక ।
మారుతా ఇతి విఖ్యాతా దివ్యరూపా మమాత్మజాః ॥ 4 ॥
బ్రహ్మలోకం చరత్వేక ఇన్ద్రలోకం తథాఽపరః ।
దివి వాయురితి ఖ్యాతస్తృతీయోఽపి మహాయశాః ॥ 5 ॥
చత్వారస్తు సురశ్రేష్ఠ దిశో వై తవ శాసనాత్ ।
సఞ్చరిష్యన్తు భద్రం తే దేవభూతా మమాత్మజాః ॥ 6 ॥
తస్యాస్తద్వచనం శ్రుత్వా సహస్రాక్షః పురన్దరః ।
ఉవాచ ప్రాఞ్జలిర్వాక్యం దితిం బలనిషూదనః ॥ 7 ॥
సర్వమేతద్యథోక్తం తే భవిష్యతి న సంశయః ।
విచరిష్యన్తి భద్రం తే దేవభూతాస్తవాత్మజాః ॥ 8 ॥
ఏవం తౌ నిశ్చయం కృత్వా మాతాపుత్రౌ తపోవనే ।
జగ్మతుస్త్రిదివం రామ కృతార్థావితి నశ్శ్రుతమ్ ॥ 9 ॥
ఏష దేశస్స కాకుత్స్థ మహేన్ద్రాధ్యుషితః పురా ।
దితిం యత్ర తపస్సిద్ధామేవం పరిచచార సః ॥ 10 ॥
ఇక్ష్వాకోఽస్తు నరవ్యాఘ్ర పుత్రః పరమధార్మికః ॥ 11 ॥
అలమ్బుషాయాముత్పన్నో విశాల ఇతి విశ్రుతః ।
తేన చాసీదిహ స్థానే విశాలేతి పురీ కృతా ॥ 12 ॥
ఇక్ష్వాకోఽస్తు నరవ్యాఘ్ర పుత్రః పరమధార్మికః ॥ 13 ॥
అలమ్బుషాయాముత్పన్నో విశాల ఇతి విశ్రుతః ।
తేన చాసీదిహ స్థానే విశాలేతి పురీ కృతా ॥ 14 ॥
విశాలస్య సుతో రామ హేమచన్ద్రో మహాబలః ।
సుచన్ద్ర ఇతి విఖ్యాతః హేమచన్ద్రాదనన్తరః ॥ 15 ॥
సుచన్ద్రతనయో రామ ధూమ్రాశ్వ ఇతి విశ్రుతః ।
ధూమ్రాశ్వతనయశ్చాపి సఞ్జయస్సమపద్యత ॥ 16 ॥
సఞ్జయస్య సుతశ్శ్రీమాన్ సహదేవః ప్రతాపవాన్ ।
కుశాశ్వస్సహదేవస్య పుత్రః పరమధార్మికః ॥ 17 ॥
కుశాశ్వస్య మహాతేజా సోమదత్తః ప్రతాపవాన్ ।
సోమదత్తస్య పుత్రస్తు కాకుత్స్థ ఇతి విశ్రుతః ॥ 18 ॥
తస్య పుత్రో మహాతేజాః సమ్ప్రత్యేష పురీమిమామ్ ।
ఆవసత్యమరప్రఖ్యస్సుమతిర్నామ దుర్జయః ॥ 19 ॥
ఇక్ష్వాకోస్తు ప్రసాదేన సర్వే వైశాలికా నృపాః ।
దీర్ఘాయుషో మహాత్మానో వీర్యవన్తస్సుధార్మికాః ॥ 20 ॥
ఇహాద్య రజనీం రామ సుఖం వత్స్యామహే వయమ్ ।
శ్వః ప్రభాతే నరశ్రేష్ఠ జనకం ద్రష్టుమర్హసి ॥ 21 ॥
సుమతిస్తు మహాతేజా విశ్వామిత్రముపాగతమ్ ।
శ్రుత్వా నరవరశ్రేష్ఠః ప్రత్యుద్గచ్ఛన్మహాయశాః ॥ 22 ॥
పూజాం చ పరమాం కృత్వా సోపాధ్యాయస్సబాన్ధవః ।
ప్రాఞ్జలిః కుశలం పృష్ట్వా విశ్వామిత్రమథాబ్రవీత్ ॥ 23 ॥
ధన్యోఽస్మ్యనుగృహీతోఽస్మి యస్య మే విషయం మునిః ।
సమ్ప్రాప్తో దర్శనం చైవ నాస్తి ధన్యతరో మమ ॥ 24 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాణ్డే సప్తచత్వారింశస్సర్గః ॥
