శ్రీమద్వాల్మీకీయ రామాయణే సున్దరకాణ్డమ్ ।
అథ ద్వాత్రింశస్సర్గః ।
తతశ్శాఖాన్తరే లీనం దృష్ట్వా చలితమానసా ।
వేష్టితార్జునవస్త్రం తం విద్యుత్సఙ్ఘాతపిఙ్గలమ్ ॥ 1 ॥
సా దదర్శ కపిం తత్ర ప్రశ్రితం ప్రియవాదినమ్ ।
ఫుల్లాశోకోత్కరాభాసం తప్తచామీకరేక్షణమ్ ॥ 2 ॥
మైథిలీ చిన్తయామాస విస్మయం పరమం గతా ।
అహో భీమమిదం రూపం వానరస్య దురాసదమ్ ॥ 3 ॥
దుర్నిరీక్షమితి జ్ఞాత్వా పునరేవ ముమోహ సా ।
విలలాప భృశం సీతా కరుణం భయమోహితా ॥ 4 ॥
రామరామేతి దుఃఖార్తా లక్ష్మణేతి చ భామినీ ।
రురోద బహుధా సీతా మన్దం మన్దస్వరా సతీ ॥ 5 ॥
సా తం దృష్ట్వా హరిశ్రేష్ఠం వినీతవదుపస్థితమ్ ।
మైథిలీ చిన్తయామాస స్వప్నోఽయమితి భామినీ ॥ 6 ॥
సా వీక్షమాణా పృథుభుగ్నవక్త్రం శాఖామృగేన్ద్రస్య యథోక్తకారమ్ ।
దదర్శ పిఙ్గాధిపతే రమాత్యం వాతాత్మజం బుద్ధిమతాం వరిష్ఠమ్ ॥ 7 ॥
సా తం సమీక్ష్యైవ భృశం విసఞ్జ్ఞా గతాసుకల్పేన బభూవ సీతా ।
చిరేణ సఞ్జ్ఞాం ప్రతిలభ్య భూయో విచిన్తయామాస విశాలనేత్రా ॥ 8 ॥
స్వప్నే మయాఽయం వికృతోఽద్య దృష్టశ్శాఖామృగశ్శాస్త్రగణైర్నిషిద్ధః ।
స్వస్త్యస్తు రామాయ స లక్ష్మణాయ తథా పితుర్మే జనకస్య రాజ్ఞః ॥ 9 ॥
స్వప్నోఽపి నాయం నహి మేఽస్తి నిద్రా శోకేన దుఃఖేన చ పీడితాయాః ।
సుఖం హి మే నాస్తి యతోఽస్మి హీనా తేనేన్దుపూర్ణప్రతిమాననేన ॥ 10 ॥
రామేతి రామేతి సదైవ బుద్ధ్యా విచిన్త్య వాచా బ్రువతీ తమేవ ।
తస్యానురూపాం చ కథాం తదర్థమేవం ప్రపశ్యామి తథా శృణోమి ॥ 11 ॥
అహం హి తస్యాద్య మనోభవేన సమ్పీడితా తద్గతసర్వభావా ।
విచిన్తయన్తీ సతతం తమేవ తథైవ పశ్యామి తథా శృణోమి ॥ 12 ॥
మనోరథస్స్యాదితి చిన్తయామి తథాపి బుద్ధ్యా చ వితర్కయామి ।
కిం కారణం తస్య హి నాస్తి రూపం సువ్యక్తరూపశ్చ వదత్యయం మామ్ ॥ 13 ॥
నమోఽస్తు వాచస్పతయే సవజ్రిణే స్వయమ్భువే చైవ హుతాశనాయ చ ।
అనేన చోక్తం యదిదం మమాగ్రతో వనౌకసా తచ్ఛ తథాస్తు నాన్యథా ॥ 14 ॥
ఇత్యార్షే శ్రీమద్రామాయణే వాల్మీకీయ ఆదికావ్యే సున్దరకాణ్డే ద్వాత్రింశస్సర్గః ॥
