శ్రీమద్వాల్మీకీయ రామాయణే బాలకాణ్డమ్ ।
అథ షష్టితమస్సర్గః ।
తపోబలహతాన్ కృత్వా వాసిష్ఠాన్ సమహోదయాన్ ।
ఋషిమధ్యే మహాతేజా విశ్వామిత్రోఽభ్యభాషత ॥ 1 ॥
అయమిక్ష్వాకుదాయాదస్త్రిశఙ్కురితి విశ్రుతః ।
ధర్మిష్ఠశ్చ వదాన్యశ్చ మాం చైవ శరణం గతః ॥ 2 ॥
తేనానేన శరీరేణ దేవలోకజిగీషయా ।
యథాఽయం స్వశరీరేణ స్వర్గలోకం గమిష్యతి ॥ 3 ॥
తథా ప్రవర్త్యతాం యజ్ఞే భవద్భిశ్చ మయా సహ ।
విశ్వామిత్రవచ శ్శ్రుత్వా సర్వ ఏవ మహర్షయః ॥ 4 ॥
ఊచుస్సమేత్య సహితా ధర్మజ్ఞా ధర్మసంహితమ్ ।
అయం కుశికదాయాదో మునిః పరమకోపనః ॥ 5 ॥
యదాహ వచనం సమ్యగేతత్కార్యం న సంశయః ।
అగ్నికల్పో హి భగవాన్ శాపం దాస్యతి రోషితః ॥ 6 ॥
తస్మాత్ప్రవర్త్యతాం యజ్ఞ స్సశరీరో యథా దివమ్ ।
గచ్ఛేదిక్ష్వాకుదాయాదో విశ్వామిత్రస్య తేజసా ॥ 7 ॥
తథా ప్రవర్త్యతాం యజ్ఞ స్సర్వే సమధితిష్ఠత ।
ఏవముక్త్వా మహర్షయః చక్రుస్తాస్తాఃక్రియాస్తదా ॥ 8 ॥
యాజకశ్చ మహాతేజా విశ్వామిత్రోఽభవత్క్రతౌ ।
ఋత్విజశ్చానుపూర్వ్యేణ మన్త్రవన్మన్త్రకోవిదాః ॥ 9 ॥
చక్రుః కర్మాణి సర్వాణి యథాకల్పం యథావిధి ।
తతః కాలేన మహతా విశ్వామిత్రో మహాతపాః ॥ 10 ॥
చకారావాహనం తత్ర భాగార్థం సర్వదేవతాః ।
నాభ్యాగమంస్తదాహూతా భాగార్థం సర్వదేవతాః ॥ 11 ॥
తతః క్రోధసమావిష్టో విశ్వామిత్రో మహామునిః ।
స్రువముద్యమ్య సక్రోధస్త్రిశఙ్కుమిదమబ్రవీత్ ॥ 12 ॥
పశ్య మే తపసో వీర్యం స్వార్జితస్య నరేశ్వర ।
ఏష త్వాం సశరీరేణ నయామి స్వర్గమోజసా ॥ 13 ॥
దుష్ప్రాపం సశరీరేణ దివం గచ్ఛ నరాధిప ।
స్వార్జితం కిఞ్చిదప్యస్తి మయా హి తపసఃఫలమ్ ॥ 14 ॥
రాజన్ స్వతేజసా తస్య సశరీరో దివం వ్రజ ।
ఉక్తవాక్యే మునౌ తస్మిన్ సశరీరో నరేశ్వరః ॥ 15 ॥
దివం జగామ కాకుత్స్థ మునీనాం పశ్యతాం తదా ।
దేవలోకగతం దృష్ట్వా త్రిశఙ్కుం పాకశాసనః ॥ 16 ॥
సహ సర్వైస్సురగణైరిదం వచనమబ్రవీత్ ।
త్రిశఙ్కో గచ్ఛ భూయస్త్వం నాసి స్వర్గకృతాలయః ॥ 17 ॥
గురుశాపహతో మూఢ పత భూమిమవాక్ఛిరాః ।
ఏవముక్తో మహేన్ద్రేణ త్రిశఙ్కురపతత్పునః ॥ 18 ॥
విక్రోశమానస్త్రాహీతి విశ్వామిత్రం తపోధనమ్ ।
తచ్ఛ్రుత్వా వచనం తస్య క్రోశమానస్య కౌశికః ॥ 19 ॥
రోషమాహారయత్తీవ్రం తిష్ఠ తిష్ఠేతి చాబ్రవీత్ ।
ఋషిమధ్యే స తేజస్స్వీ ప్రజాపతిరివాపరః ॥ 20 ॥
సృజన్ దక్షిణమార్గస్థాన్ సప్తర్షీనపరాన్ పునః ।
నక్షత్రమాలామపరామసృజత్క్రోధమూర్చ్ఛితః ॥ 21 ॥
దక్షిణాం దిశమాస్థాయ మునిమధ్యే మహాయశాః ।
సృష్ట్వా నక్షత్రవంశం చ క్రోధేన కలుషీకృతః ॥ 22 ॥
అన్యమిన్ద్రం కరిష్యామి లోకో వా స్యాదనిన్ద్రకః ।
దైవతాన్యపి స క్రోధా త్స్రష్టుం సముపచక్రమే ॥ 23 ॥
తతః పరమసమ్భ్రాన్తాస్సర్షిసఙ్ఘాస్సురాసురాః ।
విశ్వామిత్రం మహాత్మానమూచుః సానునయం వచః ॥ 24 ॥
అయం రాజా మహాభాగ గురుశాపపరిక్షతః ।
సశరీరో దివం యాతుం నార్హత్యేవ తపోధన ॥ 25 ॥
తేషాం తద్వచనం శ్రుత్వా దేవానాం మునిపుఙ్గవః ।
అబ్రవీత్సుమహద్వాక్యం కౌశికః సర్వదేవతాః ॥ 26 ॥
సశరీరస్య భద్రం వస్త్రిశఙ్కోరస్య భూపతేః ।
ఆరోహణం ప్రతిజ్ఞాయ నానృతం కర్తుముత్సహే ॥ 27 ॥
స్వర్గోఽస్తు సశరీరస్య త్రిశఙ్కోరస్య శాశ్వతః ।
నక్షత్రాణి చ సర్వాణి మామకాని ధ్రువాణ్యథ ॥ 28 ॥
యావల్లోకా ధరిష్యన్తి తిష్ఠన్త్వేతాని సర్వశః ।
మత్కృతాని సురా స్సర్వే తదనుజ్ఞాతుమర్హథ ॥ 29 ॥
ఏవముక్తాః సురాస్సర్వే ప్రత్యూచుర్మునిపుఙ్గవమ్ ।
ఏవం భవతు భద్రం తే తిష్ఠన్త్వేతాని సర్వశః ॥ 30 ॥
గగనే తాన్యనేకాని వైశ్వానరపథాద్బహిః ।
నక్షత్రాణి మునిశ్రేష్ఠ తేషు జ్యోతిష్షు జాజ్వలన్ ॥ 31 ॥
అవాక్ఛిరాస్త్రిశఙ్కుశ్చ తిష్ఠత్వమరసన్నిభః ।
అనుయాస్యన్తి చైతాని జ్యోతీంషి నృపసత్తమమ్ ॥ 32 ॥
కృతార్థం కీర్తిమన్తం చ స్వర్గలోకగతం యథా ।
విశ్వామిత్రస్తు ధర్మాత్మా సర్వదేవైరభిష్టుతః ॥ 33 ॥
ఋషిభిశ్చ మహాతేజా బాఢమిత్యాహ దేవతాః ।
తతో దేవా మహాత్మానో మునయశ్చ తపోధనాః ।
జగ్ముర్యథాఽఽగతం సర్వే యజ్ఞస్యాన్తే నరోత్తమ ॥ 34 ॥
ఇత్యార్షే శ్రీమద్రామాయణే వాల్మీకీయ ఆదికావ్యే బాలకాణ్డే షష్టితమస్సర్గః ॥
